Editoriale

La grande sfida: pace contro guera
Na tragedia senza precedenti. Xe stà colpìa al core tuta la società civile: come reagirà la cossienza de la gente? Co la violenza o la giustizia?

Ghemo 'ncora i oci pieni de chele tremende imàgini de la catàstrofe 'mericana de l'11 setenbre, e ne la mente no se scancela i pensieri nati par forza, a l'inproviso, davanti a chele sène de devastazion che ne pare 'ncora inpossìbile che le fusse vere.
Anca a distanza de qualche setimana, no ghe xe parole adate par comentare tragedie come queste che ga colpìo i Stati Uniti d'America e par esprìmare, insieme, el sgomento e el dolore par gesti che ga fato scopiare l'inferno su tuta la tera e che mete in di-scussion i princìpi e i va-lori che, co tuti i lìmiti che se vole, ga tegnù in piè fin 'desso la convivenza civile.
Gnente sarà pi come prima, el mondo canbiarà pèle, pèle facia e testa. Inprovisamente - ma nò massa - la civiltà, la pace, la tranquilità, un certo benèssare, l'economìa mondiale, ma anca la solidarietà, la bona volontà par scominziare a ridure le difarenze tra i pòpoli... le risulta èssare tuta roba scadùa. Quelo che xe sucesso a New York e a Washington el xe un fato che canbiarà el destin del mondo: la storia de l'umanità xe canbià par senpre!
L'ùndese de setenbre xe scopià na guera contro tuti, na guera de na portata e de na crudeltà incredìbili. Na guera non dichiarà, na guera gnanca conbatùa, contraria a tute le legi umanitarie, direta a colpire obietivi civili, portà vanti con chele pore creature de i kamikaze, incoconà de fanatismo e de paradiso "assicurato"!
Adesso se inacorzemo che semo tuti "vulnerabili". La pi grande potenza del mondo xe stà umilià da quatro cortelini de ceràmica giaponese, tirà fora a l'inproviso, in-pugnà da altretante man salde, guidà da la convinzion che na vita la xe sacra se la vien spesa nel nome de un ideale superiore. Gnente de pèzo e de pi orendo!
E tuti se sente cia-mà a conbàtare contro sto tipo de guera che no ga confini, contro un nemico che no se conosse, ma che se sa de sicuro che'l vole fare un te-rorismo globale, par odio, par cativeria, par invidia, par prepotenza. La religion no ghe entra: la xe un mèzo, non un fine!
Eco: in sto modo xe scopià la guera contro el terorismo. Ma no stemo métarse in te-sta che serva fare na guera militare, parché anca questa la sarìa na guera crudele, do-ve ghe torìa de mèzo le creature inocenti che xe za pi de là che de qua! La pace e la giustizia ga da èssare le armi par liberare el mondo da la violenza e dal terore.
A pensarghe ben, forse, in guera ghe gèrimo za da un tòco, da tanto prima che vegnesse tira zo le Tori Gemele de New York: solo che finora gavévino la possibilità de scansarse, de rimandare, de stare a la finestra, de spetare che se mova qualche altro. 'Desso el canbiamento xe obligatorio: dovemo vardare in facia la realtà, dovemo ridure le difarenze, sicuramente bisogna deventare mèjo, pi concreti e generosi, pi altruisti e umani, pi toleranti, senza mai tradire democrazia e libertà. Credo che'l sia el mèjo modo par "vendicare" i morti che l'America sta pianzendo e che, par tante reson, i xe anca i nostri morti!


[torna sopra]

Dal nùmaro de Otobre:
Editoriale
La grande sfida: pace contro guera
Na tragedia senza precedenti. Xe stà colpìa al core tuta la società civile: come reagirà la cossienza de la gente? Co la violenza o la giustizia?
de Mario Klein
[torna sopra]