|
Tradission del mese (in visentin)
El Vènere Santo
 |
| ... el Cristo co la testa piegà a destra... (particolare del Crocefisso in avorio, del 1700, conservà nel Tesoro de San Salvador, a Venezia9 |
Có jero bocia fasevo el mocoleto (chierichetto). Ai tri Matutini de la Setimana Santa, la cesa jera piena. Serto, i durava ore e qualche malalingua del dì de ancò dirìa che par i pori ignoranti de 'lora no ghe jera altri spetàcoli.
Ai Matutini in cesa capitava tri minuti de vero bacan, anca se el jera on santo bacan par quelo ch'el comemorava: Cristo caturà da i Giudèi fin ch'el pregava so l'Orto de i Ulivi. Par tuta la Qurésima i crocifissi jera coerti da on telo viola ma, al Vènere Santo, el Cristo in crose jera scoerto e la prima inpression che provavo mi jera ch'el fusse tornà in sima l'altare pi pàlido e smorto. Me domandavo anca parché el Cristo el ga la testa piegà in basso e a destra. Fursi parché la destra jera ritegnù la parte bona e la sinistra quela cativa, (infati cussita se divide la polìtica ancò ma, digo mi, xe fadiga savere quale xe la parte mèjo) o fursi solo parché el ladron de destra el se gavéa de colpo convertìo e 'l Signore ghe gavéa sicurà el Paradiso. Quelo de sinistra invesse el tirava i ùltimi seitando a bestemare.
I Matutini se cantava alternà: da na parte del presbiterio Gusto, el sagrestan, da chealtra el prete e nantri mocoleti. Se dàvimo bòta e risposta in latin e nantri e Gusto chissà che latin cantàvimo. Fursi, invesse de "Latin" i jera "Scori" come quei del casaro.
Davanti l'altare ghe stava alto in piè on candelabro de legno moro co tante candelete inpià e tute in scala. Ogni tanto Gusto ghe ne stuava una. Có restava l'ùltima in ponta, tuti nantri bocie jèrimo cursi so le banchete davanti, inzanocià par tera. Jèrimo cussì tanti ca se urtàvimo pa farse posto e tuti co le sgrìsole indosso, prunti pa scaenarse so na sarabanda indiavolà, co racole e racolete. Avere na racoleta te faséa inportante. Chi no la gavéa tirava fora da la scarsela magari on sasso. Finalmente se stuava la luce in ciesa e Gusto, de sotegon, ciapando in man l'ùltima candeleta, el ghe dava on supion.
De colpo paréa se scaenasse el teremoto e parfin i muri de la cesa tremava, jera el finimondo, on pandemonio che solo tusi mati fa nantri podéa scaenare. Par quelo, ai Matutini tuti jèrimo presenti e, pare strano, sensa on urlo, solo pache seche so le tole, on fracasso ch'el paréa na barufa co bòte da orbi. El durava puchi minuti parché presto se inpiava le luci ma, par nantri tusi, jera na roba inpressionante: tri minuti lìberi de fare i mati e proprio in cesa! La nostra cagnara serto jera pi forte de quela che gavéa fato i Giudèi la note che i xe nà a caturare Gesù. El bordelo pi non finìa, tanto che Gusto el pionbava zo dal presbiterio par ciaparne e s-ciafuni. Altro che cesa, casa de Dio! La podéa solo èssere na caverna de ladruni dove al scuro se scaenava i diàvoli. Altri tenpi. Jera da pensare che el Signore diventasse verde da la bile come quando co la scuria el gavéa rabaltà i banchi de i venditori nel Tenpio. Opure, par tanto ingenuo bacan, anca lu ghe faséa na sganassada, godéndose de ch'el momento de baldoria che finalmente podéa torse de i pori tusiti pieni de fame.
Pa far bordelo gavìvimo la "ravola" o la "raganela", on atresso bislungo in legno. El gavéa na steca che batéa so na ruela dentelà e a ogni dente la paca jera seca. Qualche omo ghin'avéa parfin una pi grossa e lunga quasi du metri: el "racolon". Essendo le canpane ligà dal zobia, torno al paese el mesodì lo sonava Gusto. El nava in bici co on grosso racolon soto el brasso e ogni tanto el metéa el piè par tera e 'l smenava la manovela. Ne i paisi soto i monti i sonava dal canpanile el "grolon" ch'el gavéa, al posto de le steche, sete marteliti. Quelo jera el mesodì del Vènere Santo, dì de astinensa e digiuno. Se magnava poco e de magro come se se tolesse la purga par el pranso de Pasqua.
I frati de la Madoneta i sonava el "snataron": na vecia e grossa tola retangolare che da le do parte la gavea na manilia in fero bislunga fata a "U". Smovendolo de qua e de là el smacava cussì forte che bastava i lo sonasse so la porta del convento e i lo sentìa distante, anca in meso ai canpi.
Quela del Vènere Santo i la ciamava la "Messa seca" parché no ghe jera la consacrassion. So on canton de la cesa i faséa el "Sepolcro". Ghe stava na bela statua de Cristo morto steso soto on baldachin. Davanti par tera tanti vasi de verde e lumini; i vasi me maravejava: i jera fili lunghi e de on verde tènero e delicato. I li pareciava le done a posta par el "sepolcro": formento semenà e tegnù a zermojare al scuro e a l'ùmido in stala.
I Matutini del Vènere Santo i scominsiava par tenpo parché dopo ghe jera la prèdica de la passion e la procession 'torno al paese. Paréa che se portasse al simitero parfin Gesù Cristo e la banda sonava da morto e la gente tegnéa lumini in man e tuti nava 'vanti a passo lento e in silensio. Le case gavéa porte e finestre con lumini e baluni a fisarmònica de tanti coluri co rento na candeleta inpià.
La casa de i Romio in meso ai orti, la gavéa i camini rivestìi de carta velina e iluminà pa far risaltare la figura de la crose e a fianco quela de le Madone. La strada davanti casa mia la costejava par dosento metri el canale, in primavera senpre pien de aqua. So ogni paracaro brusava résina e nafta smissìa co gran spussa e fumo. Dal ponte on lungo fil de fero tirava vanti pianin a l'altessa del Cristo de la procession na barca co le figure de la passion e tanti ciariti. Sol monte Rocolo che sorastava el paese, se mirava el calvario: na gran crose iluminà e altre do pi picole.
La matina del Sabo Santo finalmente le canpane sligà le spandéa el solene "Aleluia". L'arieta jera frisante e la vita paréa rinàssere de colpo e dapartuto. Za se provava la letissia del Risorto. Se coréa al mato in meso la corte a bagnarse i oci e le done se dava da fare par pareciare el gran pranso de Pasqua.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Marso:
Editoriale
Pati ciari... amicissia longa
Xe ora de métar zo piere de confine tra le sfaciate pretese de i "diversi" e la normalità de chi vive... come dio comanda!
de Mario Klein
Da Belun
"Promossa a l'Asilo"
de Luigina Tavi
|
