|
Robe de Ciósa
Gigi el piparo
 |
| ...el bon Gigi a stèva sentà de fianco al so bancheto su 'na vecia carega impagià... |
El quadreto del vecio pescaore ciosòto co la clàssica pipa in boca ze deventà quasi un "classico" de la ritratìstica ciosòta. La famosa pipa de créa ciosòta, fabricà a Ciósa e che vegniva esportà in grande quantità, ze stà eternà anche ne la leteratura vernacolare locale (Garlato, Fusinato, Nardo, M. Padoan...). Nata al prinsipio del 1600 come atività artigianale, l'arte de far pipe ze tramontà del tuto co l'ùltimo de i pipari ciosòti, un sèrto Gigi Padoan, che aveva el so "punto-vendita", come se dize ancùo, soto i pòrteghi verso Vigo. A gera lu stesso che a provedeva a la cotura de le pipe a casa sóa, in te 'na cale, a pochi metri da la riva del canal Lombardo, dopo avere impastà, rodolà, pressà la créa su de le spessiali tolete, che aveva scavài i stampi e che podeva sfornare in gran quantità pipe ogni giorno.
Ghe gera a Ciósa nel tempo passà dó "laboratori" de pipe, che se trovava in dó cale diverse. Sto ansian fabricante de pipe gera ancora ativo nel 1930, quando che ze stà scatà la foto che se vede in sta pàgina. Pare che 'na volta la produssion quotidiana de pipe a Ciósa superasse i ùndeze mila esemplari. 'Na cifra che me pare sproposità, ma che podarìa anche èssere vera.
Dopo de averla usà, i fumadori de pipa i buteva quela vecia ne i canài o ne i gàtoli (= fogne a sièlo vèrto, esistenti in mezo a le cale e in comunicassion co i canài). Se spiega in sto modo el fato che ze stà trovà un bel nùmaro de pipe durante i scavi fati in sità, sia ne i canài sia ne le cale.
Ormai del vècio Gigi el piparo nessun se ricorda pi: l'aveva el so caretin pien de pipe ben disposte a seconda de la misura, del tipo e del presso. D'istà o d'inverno, el bon Gigi a stèva sentà (come se vede ne la foto) de fianco al so bancheto su 'na vecia carega impagià, aspetando i so afessionati clienti, che no mancava mai.
A la pipa ze colegà 'na curiosità, che se contèva 'na volta a Ciósa. Le zóvani popolane, sempre abituà a far filò ne le cale, tante volte le se fermava su el sogèro de la porta de casa. Co la so camiséta de fustagno, el grembiule de cotonina e i cavéi col cocon, le stava anche de le ore a ciaciarare col scaldin in man d'inverno, pien de bronse, vardando el via vai de i zóvani pescaori. L'aspirante moroso, alora, col beréto rosso in testa, le calse de rassa (= lana grezza) rimbocà sora i pantaloni e co le spale coverte col famoso capoto de Salonicio, dopo èssare passà e ripassà, socolando davanti ai oci de la bela, a ghe se avissinava per domandarghe a pian: "Dizé, puta, voléu regalarme 'na brónsa che me impissa la pipa?..." Se la tósa dizeva de sì, voleva dire, secondo i usi e i costumi del popolino ciosòto, che ghe gera un recìproco scambio de simpatìe e che la fia gera disposta a farse cortegiare e a farse morosa al pi presto. Se invesse no la gera d'acordo, la ghe rispondeva: "Me despiaze tanto, ma no posso darve gnente perché mia mare me le à contàe!..."
Tornando al Gigi el piparo, oramai passà da tempo al mondo de là, l'omo de le pipe, a ze deventà - come che dize un antico modo de dire ciosòto - anche lu, come tuti i trapassà, "tera da pipe"...
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Lo ricordaremo par senpre
Ghemo caro lassare, a la pìcola storia del nostro giornale, na parola de rinpianto par aver perso un Santo Papa, el Papa de tuti
de Mario Klein
Memoria viva
La còmoda de me Nono Toni
Le me risserche in te la sofita de la casa vecia de fameja. La scoperta de robe antiche e interessanti. La còmoda me sbalordisse par la so inponenza. La filosofìa de me Nono sul come 'ndare de corpo
de Gigi Vasoin
|
