|
Curiosità linguìstiche
Parole squasi conpagne
Ospitemo un dialeto diverso dal nostro, che ga parole che ghe someja a le nostre
In un opùscolo su Ceva, çita piemontese, go visto na poesìa dal titolo: "La Brinda". El tìtolo par conto suo me ga incuriosìo, ma ancora de più me ga colpìo la tradussion in italian de quel tìtolo: "La Brenta".
Me so' domandà cossa gaveva da spartire el nostro Brenta (o mèjo la Brenta) col Piemonte e lezendo la poesìa e l'artìcolo le idee me se ga s-ciarìo. Aprofondindo l'etimologìa del nome go capìo che de esclusivo ghe ze ben poco.
La poesìa gera stà scrita nel 1983 par comemorare i 100 ani de 'na socetà de mutuo socorso che porta quel nome.
Vista la data de fondassion de sta associassion, la ga da èssare una de le più vece d'Italia, come la nostrana Società del Braccio, o de quela del Bocaleto de Cittadella che su par zo le ze del stesso periodo.
Consultà i vocabolari de la lingua italiana: Zingarelli, Cerruti, Petrocchi, Melzi, Premoli, Devoto-Oli, l'Enciclopedia Italiana Treccani e l'Enciclopedia Moderna Italiana Sonzogno, go scoperto che la "brenta" ze na sorta de tinossa par el vin che ze difusa in tuta l'Italia Setentrionale e che varia da zona a zona, un poco par la forma e un poco par la dimension.
La ze na antica misura de capaçità usà par el vin e la va da i litri 49,28 de Torin ai litri 89,80 de Como, co tute le varianti intermedie de le altre zone.
La diversità de forma e de capaçità la me ze stà confermà da la consultassion de altri vocabolari, quei de i dialeti locài, come: Zanette par el vitoriese, Sapienza dei nostri Padri par el vicentin, Lessico dei dialetti del Veronese, Groff par el Trentin, Migliorini e Pellegrini par el feltrin, Beggio par el polesan, Durante e Turato par el padovan, Candiago ancora par el vicentin e cussì pure el Marchetto, Zudini e Dorsi par el muglisano e el dissionario furlan-italian de l'edission Biblioteca dell'immagine par el Friuli che tanto par distìnguarse el ga la finale in "e": Brente.
L'uso particolare de la parola "Brenta" i nostri emigranti de la fine de l'800 verso el Sud-America i se lo ga portà drio, tanto ze vero che in te 'l Stawinski, vocabolario del dialeto Veneto-Riograndense (dialeto conossùo co el nome de "talian") e curà dal prof. U. Bernardi, sto vocàbolo risulta ben confermà in quei Ioghi.
Par rèndare omagio al sior Armando Gallo de Ceva, cultore de la storia e de le tradission de la so çita, che me ga fornìo l'opùscolo in parola e che me ga dà le prime notissie intorno a sta socetà de mutuo socorso, "la Brenta", a ve dago qua de sèguito el testo originale de la poesìa in "cebani", seguìa da na lìbera tradussion de la stessa che go pensà de fare mi.
Na ùltima roba: pensando a la parola "Brenta", go capìo che col me dialeto a posso girare el mondo intiero.
La Brinda (la Brenta)
Luglio 1983 (Carletto 'd Breû)
Per 'n faresté u l'è 'n nom stravagant
ma, per nui 'd Seva u veû di tant
perché a l'è 'n poc la storia de' pais,
tirà giù da 'n grup d'amis.
Quand 'n te' 1883 a l'è stac fundà,
cun na brinda 'n tau e quatr cadreghe sperfundà,
jera crease 'n seva la mutualità,
la fratelansa e la sulidarietà.
Man man che s'ndava avanti
cun le ìscrisiun e i sociu jeru tanti
a frequentè la scola seral
per avei dirit au süfrage üniversal.
Entere famje jan frequentà
dop na giurnà 'd travay la sucetà
per pasese 'n cumpagnia
d'amis due ure 'n alegria.
Dau temp dla sò fundasiun
quante inisiative o manifestasiun
che la Brinda a ja partecipà
per 'l decoru dla sita.
Ades che sent'agn sun pasà
i sociu ringrasiu j'auturità
del pays, present e pasà,
'nsema ai tanci benefatur e persunalìtà.
La Brenta
Par un foresto l'è un nome stranbo,
par nu de Ceva vol dir tanto
parché l'è un fià la storia del paese
spiegà col cuore e sensa gran pretese.
Quando nel 1883 l'è stà fondà,
co na brenta, quatro careghe e na tolà
l'era nata in Ceva la mutualità,
la fradelansa e la solidarietà.
Man man che i iscriti andava vanti
i soci i gera proprio tanti.
Tanti andava a la scola seral
par aver dirito al sufragio universal.
Fameje intiere ga frequentà,
dopo un dì de fadiga, "la Società",
par passare in bona conpagnia
un par de ore in alegria.
Dal tenpo de la so fondassion
quante inissiative e manifestassion;
la Brenta ga partecipà
al bon decoro de tuta la çita.
'Desso che sent'ani ze passà
i soci ringrassia le autorità
quele presenti e quele che ze stà.
Ringrassiemo i benefatori e le personalità.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Novenbre:
Editoriale
Servire la Patria
Tenpo de rievocazion e ricordi, privati e pùblici: el ricordo de i propri cari... el xe senpre preciso, quelo che riguarda avenimenti stòrici che ga canbià el mondo... el se porta drio interogativi che ne fa pensare
de Mario Klein
Curiosità linguìstiche
Parole squasi conpagne
Ospitemo un dialeto diverso dal nostro, che ga parole che ghe someja a le nostre
de Milosc Voutcinitch
|
