|
Editoriale
Chel mal desmentegon…
El fa girare el mondo, el tien in calda la minestra de i sentimenti, el fa stare in piè la casa, la fameja, la socetà, l’umanità. Epure anca in Italia le done le fa manco fiòi. Cossa xe canbià?
 |
| Dopo el male patìo da mama Mara par métarla al mondo, eco Caterina fotografà da papà Gianluca Gaburro. |
L’inaugurazion de na vita nova, qua nel Veneto, la ciamemo “el mal desmentegon”, parché la dona, la mama, dopo che la creatura xe nata, la desméntega in pressia el male patìo par métarla al mondo. Poco dopo, (oncò, on poco manco!) la sarìa disposta a ripètare el miràcolo.
Par fortuna – disemo – parché senò l’umanità la finirìa in pressia e la Tera deventarìa na giungla co qualche Tarzan e tante belve.
Eco parché el futuro de l’omo dipende da quelo che ’l fa par la maternità e par la mama. La dona che deventa mama la dovarìa èssare considerà on valore “inestimabile”, on capitale da difèndare e conservare con cura. Inveze, spece oncò, vien sotovalutà el so valore. In nome del progresso, che ciamemo civile, el patrimonio de poder creare e consegnare al mondo la vita, no ’l xe ’bastanza capìo.
Da quando che la nasse, ogni dona la xe on bòcolo, na gema, on buto de vita nova, senza distinzion de raza, de colore de la pèle, de cultura, profession o religion. E, quando che la deventa mama, la xe on fogo senpre inpizà, on mare de afeto e de amore, on granaro pien de ogni bendedìo, na sorgente de aqua calda, na finestra spalancà, na porta verta, on rifugio sicuro, on altare dove posare el so sacrificio, on tabernàcolo co drento el dono de la vita.
Gnente mai sarà pari al ruolo, a la mission che ga la dona e la mama nel grande mistero de l’esistenza.
Ma, in te na socetà come la nostra, purtropo, no vedo tuta sta sensibilità ne i confronti de la maternità. La dona viene, pitosto, invità a no sentirse cussì tanto preziosa e unica, che in fondo, oncò ghe xe poco de straordinario a métare al mondo on fiolo. Spece in Italia, dove ghe xe le percentuali pi basse de ris-cio de morte a causa de parto, anca se semo quei che rinuncia pi de tuti al “parto naturale”, fasendo ricorso al tajo “cesareo”, dove inveze, stando ai ultimi dati de l’United Kingdom Confidential Enquiry, el perìcolo de morte materna el xe 2,84 volte pi grande.
La globalizassion sa fare anca questo e tante done, in nome de l’emancipassion e de la realizassion de i so diriti le s’à catà a pensare prima a la profession, a la cariera. Cussì, tante le selie de rinunciare a la maternità, rivando anca a interónpare el viajo verso la luce a na creatura che vien privà del so dirito de nàssare.
Quando se parla de mancanza de valori, forse ghe casca drento anca questo: la maternità no la ga pi l’inportanza de na volta, anzi la xe calcossa da evitare, parché la lìmita la libertà de la dona. E po’ insoma, cossa xelo sto doverghe dare la teta… che dopo ghe toca rifarse el petorale! E ’lora pronto el late artificiale. Oncò na mama “moderna” no la ga gnanca pi da sforzarse a capire se el pìcolo el pianze parché el ga fame, sòno o fredo: ghe xe on dispositivo che stabilisse la rason del pianto e te dise cossa fare, come se el pìcolo el fusse on eletrodomestico che se inpiza e se smorza có se vole!
No sò fin a che punto se possa parlare de progresso: me sa che in tuto questo ghe xe na bona dose de egoismo. E la dona, la mama la xe vìtima de sto egoismo. Forse bisogna tornare a trasmétarghe fiducia, sostegno, serenità e protezion, e inpegnarse a rispetare de pi el valore de la maternità.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Chel mal desmentegon…
El fa girare el mondo, el tien in calda la minestra de i sentimenti, el fa stare in piè la casa, la fameja, la socetà, l’umanità. Epure anca in Italia le done le fa manco fiòi. Cossa xe canbià?
de Mario Klein
Memoria viva
El venessian Gaspare Gozzi morto a Padova
Un bel raconto de ’l Papà su ’l tramonto de la Serenissima. Le figure più inportanti in te l’arte del secolo. La vita intensa, gloriosa e tormentà de ’l grande scritore
de Gigi Vaasoin
Teatro e Teatri
’Na rapresentassion dignitosa
Basta co’ i soliti classici inpegnài; ’desso el Teatro ga da divertire!
de Piero De Franceschi
Da Rovigo
L’ùltimo sposalizio
de Gianni Sparapan
|
