|
Da Thiene (VI)
Le rogassion
Un contato direto de l’omo e de la natura col so Creatore
 | | Una de le ultime rogassion ne le nostre canpagne. |
Nel culto catòlico, tra le procession che ricoreva ne l’arco de l’ano, le rogassion gaveva na inpronta tuta particolare. Le vigneva fate in do ricorense: la rogassion deta “de San Marco”, el 25 de aprile, ciamà la magiore, e le altre tre, dete minori, el luni, el marti, el mèrcore prima de l’Assensa che cascava de zobia. Procession liturgiche par tigner distante calamità e disgrassie, soratuto par domandare a Dio un racolto abbondante, le rogassion se svolgeva tra i canpi. Quele de San Marco le podeva ridurse a un giro ’torno la cesa o a un percorso de na giornata intiera, tocando i vari punti del teritorio de ’a parochia. Ma in gènere, le rogassion, conossude a i nostri giorni come tali, più sentìe e partecipà, le gera quele che “precedeva” la festa de l’Assensa.
In ste tre matine prima de le cinque, al sono in tèrso de le canpane, la procession partiva da la cesa parochiale e sùbito se inoltrava in meso a i canpi, ogni giorno co itinerario difarente, in modo de ciapare drento tute le zone del paese. Davanti a tuti un “capato” de la Confraternita del Santissimo che portava la bandiera o mèjo un gonfalon, doparà solo ne le rogassion; dopo vegnéa el pàroco conpagnà da i mòcoli, seguìo da i fedeli in do file, co i òmini che precedeva le done. Durante ’l percorso se cantava le litanìe de i Santi co na cantilena e na maniera tute particolari. El prete jutà da i mòcoli intonava la prima litanìa co note lunghe e distese che gera ripetù da i òmeni che se catava subito drio, e ne la stessa maniera, la litanìa vegneva cantà da queli che seguiva, fin a rivare a le ùltime done che sarava la procession, e la se smorsava nel verde de i prà. Alora, sempre caminando, el prete cantava la seconda litanìa e via-via tute le altre. Quando se rivava a na crosara, la procession se fermava. El prete diseva de le preghiere, a cui i fedeli rispondeva in coro, dove se domandava a Dio de tignere distante da la tera i malani del tenpo e de i òmeni e de fare un bon racolto. Terminà le orassion, dopo ’ver sbiansà co l’aqua santa, in segno de benedission, i quatro punti cardinali, le rogassion col gonfalon davanti se rimeteva in marcia. Se nel teritorio de la parochia ghe gera qualche ceseta canpestre, la procession se fermava par far la messa intonà al rito “agreste” de le rogassion, parché drento la sènplice e quasi senpre vecia costrussion da le finestrele sensa veri o verte par mandar via l’odore da sarasù, penetrava oltre che le folà de primavera, anca le vosse familiari de le case vissine, el sbajare de i can, el burlare de le vache in stala, el chichirichì de qualche galo e i rumori de i òmini che lavorava la tera.
El ritorno a la cesa parochiale gera più stravià e più diversivo de l’andata. El nùmaro de i fedeli el calava de continuo man-man che la procession se avissinava a la cesa, massima có ’l giro gera lungo, e i òmini doveva còrare, par le òpare, in te i canpi, cosiché a l’arivo, col prete e i mòcoli, restava solo qualche dona. Ma nel ritorno “traspariva” soratuto el caràtare naturalistico de le rogassion. Pur continuando a caminare par na strada de sassi o sfaltà, par na caveagna o un stroso, l’intaresse de la gente gera pa i canpi e la natura ’torno: na cubia de musséti che ciociolando spariva nel bosco de spincapeléto in fiore, el rosso fogo de i papàvari che se cunava tra el zalo-oro del fromento romai mauro, i grili fora da le tane che i tigneva concerto… Rientrà finalmente in cesa, se terminava le litanìe e dopo la benedission del pàroco se tornava a casa.
Fin che la vita de l’omo xe ’ndà ’vanti pari-pari co la natura, “coltivando” drento l’anima na credensa religiosa, le rogassion ga continuà a èssare par un susseguirse de ani e de secoli, un rito del quale pareva no se podesse far de manco; quando però el progredire paralelo de la vita de l’omo e de la natura se ga roto, anca le rogassion ga finìo el so corso, essendo vignù a mancare el spirito che le mantigneva vive.
(da CIVILTÁ RURALE DI UNA VALLE VENETA, La Val Leogra (Accademia Olimpica, Vicenza, 1976.)
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Schei, schei, schei…
Quei che no ghe xe e quei che se perde par strada, quei che no riva mai e quei che finisse massa in pressia, quei goadagnà onestamente e quei ciapà, inbrojando el prossimo…
de Mario Klein
Da Rovigo
Parlando co Loris
de Gianni Sparapan
Da Thiene (VI)
Le rogassion
Un contato direto de l’omo e de la natura col so Creatore
de Bepin Daecarbonare
Da Verona
San Zen in Oratorio
de Lucia Beltrame Menini
|
