|
Da Lendinara (RO)
Fetonte
cascà intel Po polesan
 | | Buonarroti Michelangelo (1475/1564), Caduta di Fetonte (Accademia Carrara, Bergamo). |
Tanti sècoi indrìo, un caro tuto de oro tirà da cavài ca spuava fogo, el sgironzolava pa’ el zielo e, a un zerto momento, caro, cavài e chi li menava in giro, i xe cascà su la Tera. Questa xe la notizia che ne ga dà i jornaisti del tenpo: Esiodo nel 700 a.C., Erodoto nel 430 a.C., Uripide nel 400 a.C., Platone nel 360 a.C. e altri ancora.
I Druidi, de sto fato, i ga precisà che el caro se ga pozà su l’erba dove el fiume Dora el se inmissia col fiume Po e altri inveze, che ’l xe cascà inte i canài Eridanei de Alfonsine. No manca chi ca dise anca che ’l se gabia desfà, sbatendo a tuta cana inte la tera de Crespin, o mèjo inte le aque del Po che ghe passa vizin.
Visto che nissun de preciso sa dove xe capità sto fato, visto anca che a Crepin ghe xe ’na piaza intitolà a Fetonte, che ’l sarìa chel tizio ca menava el caro, go pensà, da bon polesan, de contarve ’sta storia, sistemàndola in provincia de Rovigo.
La storia contà da i greci antighi la dise che pa’ tresento ani, la zente del Basso Po la ga portà el luto pa’ la morte de Fetonte e, quela storia del secolo passà la dise che, vizin a Adria, xe stà trovà soto tera ’na tonba de un gueriero. Drento a ’sta tonba ghe gera un caro fato de oro, che ’l gaveva ancora tacà i resti de i cavài. La zente del posto, che mai ga perso el ricordo de la fòla mitolòica, ga dito che se tratava de Fetonte.
A ’sto punto del raconto, vago a contarve come xe andà le robe. Fetonte, fiolo de Elio, dio che mena el caro del Sole, un dì el ga dito al pare: “Tuti i me tole in giro, disèndome ca no so’ fiolo de un dio. Alora go pensà de domandarte s’a te me inpresti el to caro pa’ un dì. Girando pa’ el zielo ghe farò vèdare a tuti chi ca so’.”
Tanto el ga insistìo el fiolo che el pare ga cedù e, prima de dàrghelo el ghe ga racomandà: “No doparare la scuria, e tien ben struche le rédene. No andar de longo pa’ le zinque porte del zielo ma a la prima crosara gira a zanca, là te trovarè le rodà del me caro. Sta’ ’tento de no andar massa in alto parchè te poi brusare i pianeti e no andar massa basso parchè te poi brusare la Tera.”
Sentìe le racomandazion, Fetonte, contento come ’na pasqua, el salta sul caro e, dopo poco el scuminzia a sbandare de qua e de là, tanto ca ghe scapa le rédene da le man. No lo gavesse mai fato. De bòto nùgole e Tera ga ciapà fogo, e Zeus che lo tegneva de ocio, inrabià, el ghe ga spedìo de bruto un fulmine. El s-ciantiso xe stà cussì forte che el caro xe andà in tòchi e Fetonte de ficheton xe cascà in Po.
La zente del posto che ga visto el fato, subito se ga dà da fare pa’ tirarlo sù e, dopo aver sepelìo Fetonte, caro e cavài, la ga pozà a la tonba ’na targa che la dise: “Hic situs est Phaethon, currus auriga paterni, quem si non tenuit, magnis tamen excidit ausis.” (“In sto posto riposa Fetonte, auriga del caro de so pare, e, se anca no ’l xe stà bon de menarlo, el ga fato istesso ’na gran roba.”)
Le tre sorele de Fetonte: Lampetia, Faetusa e Egle a la tragedia le ga pianzesto pure assè, tanto che Zeus a vèdarle disperà el se ga ingropà e, pa’ consolarle le ga trasformà in piopi, cussì pure le làgrame in anbra. Oncò su la tera del Basso Po tanti piopi i ne ricorda sto fato come anca i ritrovamenti de i scavi archeologici, che ga inpinìo i musei de robe paleovenete fate co l’anbra.
Dovì savere anca che Cicno, re de Liguria, amigo de Fetonte, disperà pa’ la morte del so caro conpagno de zoghi, el rivava a la foçe del Po, morendo de dolore. El so corpo pa’ grazia de i dèi, el ga ciapà le fateze de un cigno. Col passare del tenpo e col trasformarse de le robe i cigni de alora i xe deventà ochi che ’desso i sguaza inte i màsari de le nostre canpagne.
’Desso che ve la go contà, ve saludo caramente.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
’Desso ghemo du novi Santi
No podemo propio non consegnare a la pìcola storia de la nostra rivista el ricordo de on avenimento cossì straordinario: du Papi che fa Santi du Papi. Robe mai viste e che forse mai pi se ripetarà.
de Mario Klein
|
