Storia venessiana

El corno del Doge

Corno ducàe (Museo Victoria & Albert, Londra).

El doge Lorenzo Celsi.

Corno, capèo particolar portà dal Dose o Doge. Dopo el sècoeo IX el vegneva portà sora na cufia bianca che ’a ghe somejava a el “camuro” portà dal Papa. El corno ducàe el se rifà al bareto indossà da i soldài bizantini e dal “Dux” venessian fin da i primi tenpi. Ne i sècoi el xe canbià un poco ’a cominciar dal tessuto che el ze deventà de damasco, e co ’a zonta de perle, altre piere pressiose, oro e ricami.
Portar el corno, distingueva el doge da tuti st’altri re che i portava ’a corona. Ne ’a longa storia de ’a Serenissima el se ga ciamà in vari modi: “biretum, corona, zogia.” El gera portà in forma più pìcoea anca da ’a Dogaressa, a coronamento del véo dorà che ’a gaveva in testa. Dal 1367 xe deventà de òbligo che el Doge el portasse senpre ne ’a vita pùblica, quando che el rapresentava Venessia, el corno che el voeva significar ’a dignità unica del Serenissimo.
Sta bareta ’a xe stà modificada durante el longo periodo del so uso, come par esenpio quando el Doge Lorenzo Celsi (1361-1365) el ga fato métar na pressiosa crose parché so pare, ancora vivo, sbassando ’a testa davanti al Doge, so fìo, no fusse par lu, ma par ’a crose.
De corni, i Dogi i ghe ne gaveva più de uno e de diversi coeori par intonarli a i vari vestiti che i portava e i li conprava co schei personài, mai de ’a Repùblica. L’ultima modifica de sta corona, unica par forma, ’a xe stada fata nel 1557 quando xe stà decretà dal Consilio de i Diese l’ultimo modèo che da ’eora no ’a ze stada più canbià. El corno, dopo ogni volta che el vegneva portà, el gera messo quasi come na reiquia ne l’armer de mezo del Tesoro de San Marco.
El xe stà uno de i sìnboi del potere de ’a Serenissima e anca a i giorni nostri, che Venessia no ’a xe più Serenissima, el rapresenta ’a cità ne ’a araldica del Comune, che par mi ’a ze quasi na tolta in giro, vardando indrìo i significati che el corno el ga avùo quando che el Doge lo portava.
Speremo che qualche sindaco che vegnarà no el voja fàrsene uno par far come i Dogi che ga governà ’a potensa marinara più granda che mai fusse esistìa.

[torna sopra]