Da Belun

Primi a fiorir

L'Uficio Tecnico del Comune andè che 'l laoréa me papà a l'era na olta in Piaza Castelo e a l'era mess de fianco a le sère comunali che le degradéa come na scalinada drio al Municipio andè che le atuali scalete le va in via Sotocastelo.
Me papà al conosséa ben i giardinieri e al profitéa par domandarghe consili par al giardin de casa nostra e qualche olta al rivéa a casa co qualche piantina par sistemarlo e abelirlo.
Ricorde che la nostra casa e 'l nostro giardin i era i pi ridenti de tute le Coste de Mussói par la so posizion: a primavera l'era na festa de colori e de fiori.
Có tornée da scola e inbochée la stradela cuerta da giara bianca e afiancada da na parte e l'altra, propio come an vialet, da na ziesa de ligustro, ere senpre contenta: incontro baiando me vegnéa Dog, al nostro bastardin, e qualche olta le pite in libertà...
Passà al cancelo, a destra ghe n'era sùbito, te na strissa longa 25-30 metri, streta e paralela al vialet, an poche de piante da alto fusto: an bredol, piantà da me papà có son nata mi (adess l'è ancora là: alt, flessuoso, elegante!), tre tuie (del tipo "conifera"), an pomèr, an susinèr, an "cedro deodara", an "lauro ceraso" e vizin a la zieseta an boscatel de sicomoro, na magnolia da i fior violacei, an pirus e na forsizia. A sinistra inveze ghe n'era an bel toc de teren; longo la strada Agordina che no l'era a quei tenp sfaltada, coréa an zieson pien de pólver e in órdine dal vialet, cresséa an talpon che a giugno al lasséa cascar tanti fiochet legeri e bianchi par terrache paréa na nevegada, do noghèr e an canpet de patate; pi vanti senpre paraleli al vialet tre perèr e do cachi, ma prima de salir ghe n'era an gran canp de sòlito coltivà a forment, po' l'era al colet co le vide.
Al canp semenà a otobre l'avea riposà sot la neve e a primavera l'era tut vert de piantine sotili ben alineade che le spetéa al sol de magio e giugno.
Mi caminée pian pian su par la stradela in dolce salita e presto ere a casa, ma i me oci i se soferméa a vardar al giardin che al fea an setor circolare da la casa al colet: là ghe n'era an muret a sec, na ziesa de evonimo e al de là de i boscat: al calicantus invernal e quel primaveril, an melograno, diversi roser e de le rosete rosse le fea da borbura a la curva; te la zima ancora piante da fior: peonie, ortensie, lavanda, magnolia bianca e, te l'aiola, tazete (narcisi), tronbói (giunchiglie), garofanin, aquilegie, turchi, grossi papaveri... e te 'l pian se catéa al bersò col tavolin e na panca de piera e marmo e sora al glìcine e 'l gelsomin che fea da cuert.
De là del giardin te 'l pian del col ghe n'era l'ort.
Zà d'inverno fiorìa al calicantus invernal, se al tenp l'era bon anca a genaro, e i stec aromatici i se ricaméa de fioret zal pàlido e rosso bruno al centro e i mandéa an profumo da slargar al nass e al cor.
Ma a la fin de marz, quando che da noi la primavera la è in ritardo, i primi a fiorir e i pi coragiosi l'era la forsizia e al pirus, la prima co i so fior che par stele a quatro ponte de 'n bel gialo oro, al secondo co i so ciot de fior a scudeleta d'en ross aceso.
Tuti sti fior i ornéa la nostra tola e al giardin che par quasi tut a l'an l'era fiorì e se finìa co i setenbrini, le dalie e i crisantemi in autuno.
Ve assicure che me incantée sì, a osservar sti fiori che i richiedéa tante cure (difati me mama la dovéa farse iutar da'n òn de fadiga e da la Angela, na doneta sghenba che se adatéa a cavar le erbace), ma me atiréa de pi i primi, ùmili e pìcioi fior del prà e de i frutèr!
Te l prà libero cressea spontaneamente le pratoline dal coletin bianch e rosa, le prìmole de'n zal delicato (me nona la me avéa contà che na olta i magnéa le foie de sti fior in insalata), violete màmole de'n viola e de'n profumo cussì intensi che prima te le sentìa co'l nass e po' te le scovéa tra l'erbeta!
Anca drio al col de casa l'era na festa de fiori: propio in fondo ghe n'era tanti àlberi e boscat che servìa par far i fassin e anca da confin con la strada de passagio de i contadin, i Toni.
Là tra le foie seche ingrumade spuntéa bucaneve e anèmoi (erba trinità) e da i ran se sentìa la perùssola che la cantéa: "Cepì - cepì", quasi a dirghe ai contadin: "Zerpì - zerpì! L'è l'ora!".

[torna sopra]

Dal nùmaro de Aprile:
Editoriale
Tanto par capirse...
"S-ciàrate, marso, ché xe qua aprile", dise un vecio proverbio
Sarà dunque ben che se liberemo sùbito... de sto cataro!
de Mario Klein
[torna sopra]

Salute:
El spessiale ´spedaliero
de Mario Galdiolo
[torna sopra]

El canton de'e poesìe
Poesie in dialeto
*** (Autori vari)
[torna sopra]

Da Belun:
Primi a fiorir
de Biancamaria De Vecchi
[torna sopra]