L'AMORE VINSARÀ LA MORTE
Sòpe de tera mora
s'ciarà dal fiore zalo
del pissacan.
Nùvole de bonbaso
che cavalca gajarde el celo.
E, sora,
se fa largo el sole.
I àlbari da fruto,
sparpajà su la colina,
i dìndola i rami carghi
de pètali bianchi e rosa
Xe 'l Sabo Santo.
Sul mondo ancora
se alsa l'onbra de la Croze.
Ma la natura vive,
l'omo speta...
E i batòci de le canpane
ligà par la Passion
trema:
Doman xe Pasqua
l'Amore vinsarà la Morte.
Ines Scarparolo (Vicenza)
PRIMAVERA
Ghe xe ne l'aria
odor de Primavera,
odor de viole
sconte in mezo ai prà,
de qualche rosa
'ntel giardin de casa,
de erba fresca,
de canpi 'pena arà.
I àlberi ga za le prime foje,
zo in corte insieme
ai zughi de i putèi
ànare, oche,
cioche e polastrèi;
no manca el xolo
de le faraonzine
e gnanca el galo
co l'harem de galine.
Le róndini le torna
ai veci nidi,
le passa qua l'istà
po' via par altri lidi.
Se sveja la natura
e la te incanta,
la spande i so profumi
su la tera.
Miràcolo de vita:
xe qua la Primavera!
Afra Klein (Montegrotto T. - PD)
SPETO 'NA OSSE AMICA
Serte matine grise de nebia,
le ga drento
'na malinconìa
che fa de i pensieri
on nial de tristesse
e te ruìna el giorno.
Prisoniera ne la casa
me sento,
e speto 'na osse amica
par imbroiar le ore.
Berta Mazzi Robbi
(Castel d'Azzano - VR)
da "Férmete na s-cianta"
PASQUA DE ESULTANSA
Doluri de spàsemo
martorieva la to carne inocente
Signor,
strassinando su le spale a fadiga
la pesante Crose
Te vivi come punto de arivo
el Calvario.
La zente,
quela che Te coreva drio
cò Te insegnivi,
quela beneficiada,
'desso delirando la urleva.
Sol a un omo
te ghe ga fato diòl
pronto de cuor
- el Cireneo -
par un tòco de strada,
da quel insoportàbile peso,
el te ga dò solievo.
Sul monte Calvario
crocefisso come un malfator,
incoronò de spine,
tra le derision
de 'na fola inferocìa
vardàndote,
a la Mare Amada
- 'na spada ghe trafigeva l'ànema -
e la capiva come
se adenpiva cussì le Professìe
del vecio Simeone.
Un ùltimo respir...
la morte Tua Signor
un falimento?
Se quela Crose,
quel sacrificio,
xe stò òpera de salvessa
par i òmini de ogni tenpo
credendo, se ga trasformò
in qualcossa de grando
questo evento.
Alora sarà zorno de esultansa
la Pasqua,
anuncio de pase,
altar de speransa.
Maria Damonte
(Marano Lagunare - UD)
QUANDO 'L ME CANTO 'L S'À PERSO
La barca de i me insògni,
l'ò inpenìa de 'n amor
de 'na fameia granda,
nel splendor de ogni arivo
e de le nostre antiche cante.
Sempre insieme, mi e ti,
nel svolar de le vele
da porto in porto,
co' el sòl sempre drio
a impiturar i nostri giorni
e slargar orizonti fin a l'ùltimo cèl.
Ma, ne la luce de 'na luna sfinìa,
le me làgreme le sa gonfiado
come le onde del mar,
e la barca de i me insògni,
insieme al me omo,
l'è nà sùbito a fondo.
E là, nel gorgo del silensio,
'l me canto 'l s'à perso!
Rita Maestrello (Verona)
FIÓL
Sta bruscà de vita
che sul tardi
nasse dentro
la rinverdisse
i vegri de la tera
la destende
pieghe de l'ànima
la 'mpissa
stele noe
nei stroi
del ciel.
Ida Benedetti Baroni
(Castel d'Azzano - VR)
da "Sensa de ti..."
MATINA DE PASQUA
No sento campane
sonar stamatina...
Solo aqua che picia,
che cìoca, catìa,
su i muri,
su i scuri...
Insucà, intontìa,
me posto a na finestra
e speto...
Come 'l vecio Noè,
speto che tuto se chieta
e dal cel
la torna a sgolar,
drento la me arca,
la colomba bianca!
Nedda Lonardi Sterzi
(Alpo - VR)
Segnalà al "Pescantina-2000" (VR)
UN INVERNO DE TANTI ANI FA
Zè fredo ancùo,
a pi no posso piove e tire vento:
da pe tuto se fa asio le pessine.
In casa la cusina econòmica s'à impissà,
a carbon coke la va, e la piera refrataria,
rossa sfuogonà, la tien el calore ben mucià.
La stansa zè granda, fa fredo lo stesso e alora...
un scaldin pien de bronse, soto el sapapie ò messo,
per scaldarme un puochetin e studiare un s-ciantin.
Serà a mia mama porte e balconi
che no passa corente,
ma le sfesse d'aria zè sempre presente:
el giasso me core per la vita via
e l'ariva financo l'ànema mia.
Se sta ben solo in leto:
la mùnega, soto i nissiòi de fustagno, me meto, e,
remenàndome pian pianin,
ciapo el sono fin matin.
Lucia Penzo
"Gruppo Poeti Città di Chioggia"
|
NO MORE MAI
No móre mai
a na mama
la speransa
che un fiolo perso
no 'l possa tornare.
El xe inpiantà
co rajse cossì fonde
che no le se póe
dal so córe destacare.
E co le man
la tien streto
chel cào
e co forsa
la tira a ea 'e rajse
insognàndose
de poderlo strucare.
Maria Elsa Scarparolo
(Vicenza)
Segnalà al "S. Paolo '98" - Treviso
PASQUA 'NTE LA ME TERA
L'amor par chela terra
qua de lontan el se sente,
l'amor par chela gente
che 'n dì gaven là lassà.
Ma 'nte sti giorni de feste
el cor de malinconìa s'impienisse,
pensando a sti ani de lontanansa
sensa le feste de la me contrà.
Oramai vecio mi son
e co sta granda distancia
el cor e le gambe za
no le pol pi soportar.
Lu el pianse, el se sbrega,
ma l'amor la 'n fondo 'l se sente,
par tuta chela gente che
con pi de setant'ani za
un dì gaven lassado là.
En te chel bel paeseto
sul canton de la me contrà...
Giulio C. Franchetto
(Porto Alegre - Brasile)
GIULIANO
Te vedevo rivar da la stradela,
co la valiseta e el to soriso,
che anca nel to laoro
no mancava mai.
On bon consegio ai to clienti
che ne dava fiducia:
saver che mèjo no se podeva far.
Anca in parochia
e nel Consegio comunale,
tante bone inissiative
e poche ma s-cete parole.
Te geri senpre là,
dove che gera da laorar
par fare on mondo pi beo
e pi giusto, pi cristian.
Desso te ghè do boni fioi,
zogia de mama e none,
che ne la so vita
i ga da fare na roba sola,
ma tanto difissile:
deventare do persone pi brave de ti.
Gianni Marcuglia
(Salzano - VE)
A REMENGO
a Mario Ceccarello
De létare ghe n'ò resevùe tante
in sti ani, pi bone che cative,
e ben vardando a colù che me scrive,
Mario, la tóa contien parole sante.
Ti me ga recordà quanto sia vive
le mie, direte al Sìndico, che spante
spero no vaga in sta Sità calante
come l'aqua che méte a nùo le rive.
Ormai la nostra lengua la ze 'ndada
a remengo, che i fiói pi no impara
da so mare. Passando per la strada,
stranij e storti parlari se ne para
davanti, che no ga pi la calada
che ai nostri veci gera tanto cara.
Attilio Carminati
(Venezia)
E CANTO
Un dolse sono
on tènaro viseto.
Streto lì
sora al me sen inpegorìo,
lo sento palpitar
chel pìcolo toseto.
E canto, invento
nove nina... nane;
coro co lu
sora nùvole
de bonbaso,
su primavere
co bòti de canpane.
Ma l'ilusion
no l'è che un s'ciantiso,
na folà de vento
in tramontana.
Da svejo
pa corerghe drio
el core no el ga la forsa
de la mama.
Maria Penello (Vicenza)
LA ROSA BIANCA
Gh'è solo 'na rosa bianca
a guarnir
el ruspio scalin
par l'eterno.
'Na làgrema
sconta tra i pètali
la sbrissia fora
sbregando el vel
de le vece paure,
fasendo tornar
memorie,
fra scaie de infinito.
La conta frégole
de teneresse,
sugàndose
a l'ùltima rasa de sol
e fin che le ombrìe
de la sera
le brassa le piere ingiassade,
la rosa bianca
se spampina a la chiete
drento el so giardin
fiorì de lumini.
Diana Maimeri Lugo
(Isola della Scala - VR)
Segnalà al "Le voci dell'anima" 2001, Cartura (PD)
SFRANTUMI
Quel vento
quel respirar del tenpo
che te involze
cavàndote via el fià
e che te roba ricordi
cofà man de putèi
che tirava sù de scondon graspi
ne le sere de setenbre
quando le ùltime lusariole
stua per senpre i ferài.
Gèrimo sconti drento al fosso
dove la luna luminava musi
da i lavri piturài de mosto
e la panoce vestìe a festa
dindolava scage de oro
desfàndose ne le caldiere che fumava
e che saveva de riti antighi.
'Na stela cadente
scriveva fòle ne 'l sielo
sentìvimo el canto de la zoeta
che inpeniva el cuor de paura
e faseva vegnir i peli de oca.
Lechi lontani portava osi
che tremava de mame
cofà reciami d'amor
no gavévimo gnente tra le man
se no SFRANTUMI de zoventù.
Gianni Vivian
(Mestre - VE)
2° pr. "Alicante -XVI ed."- Vigolo V. (TN)
EL PONTE DE I ÀNGELI
Ponte de i àngeli, quanto te si belo
col sole e co le rondini in cielo!
Con tanta zente che passa a tute le ore
contenta, o co i so pensieri nel core.
Le màchine che vola via a Padova, a Treviso
ma qualche volta, le se ferma
so le strisse co un s-ciantizo.
E po' i tran, ciamémoli a la vecia,
che ne l'ora de punta i xe pieni come na secia.
Soto el ponte passa el Bachilion
che va a la marina
e parsora, a on bòto, i tosi del "Rossi" e del "Farina".
Ma, brava zente, parché gavì pressia? Vè pian!
Alzè la testa e osservè el bel palazo Angaran.
Santa Luzia, el portegheto,
la colona co l'anzoleto,
la Banca, la Farmacìa,
che tuti i mali fa andar via.
Stupenda ne la note de luna,
la tore olìnpica,
e lontan nel verde l'Araceli artìstica.
Ponte de i àngeli, quanta passion
e quanti color!
Par chi va e vien in çerca d'amor!
Oh! Vicenza mia!
a te go dedicà
un angoleto de poesìa.
Milena Zoccai
(Vicenza)
|
