Vita de na volta (in dialeto rùstego de la Bassa)

La Betina


La jera na bela tartarina, minùa, sanguigna, pèle scura, du uciti vivi e negri 'fa du carbuni e na scavejara de caviji mori cofà el calùdane e on bel sestin che jera spasso a védarla. La ga suparà tute le scole con poca fadiga e la xe passà avocato co 'l màssimo del puntejo; ghe piaséa tanto la conpagnìa, ma de moroso no la ga mai volesto savérgane. Le cause in Pretura la le ga senpre vinte, la ghe n'à bu una de cussì rognosa che tuti credéa che la la perdesse, ma ela la se ga batù cofà on leon e la la ga vinta, e tuta la jente ghe ga batù le man. Ela no se ciapava mai indrìo, no la se 'assava mai intimorire, in boca ghe piovéa senpre le parole che ghe jera da dire e pi de calche volta la confondéa anca el pretore. La prima volta che la xe nà in tribunale tuti i avocati có i ga visto sto schitorcio de fémana i ga tacà a ridaciare pensando a la sòlita meda vigogna che vien da la canpagna, ma có i la ga vista a scadenarse cofà on uragano e cussì sicura e persuasiva i xe restà incantà e i ga tacà a vardarse un co l'altro.
La Betina jera da on tòco che la coava l'idea da farse mùnega e la ghe lo ghea dito domé a so mare. La dona, par no métare la fameja soto-sora, e forse co la speranza che la tosa canbiesse pensiero, la ga senpre tasesto. Coando che Betina se ga palesà la xe stà cofà na sita a cielo seren. 'Nte la prime a tuti ghe paréa inpussìbile, so pare l'è restà muto, so mare la piandéa senpre, so fradelo pi vecio el ga dito: "A ghemo speso on saco de schei par farla studiare e adesso che la tacava a ciapare coatro palanche la n'in dà on tanto de tòco". E so fradelo pi dóvane: "Me sorela adesso che la ghea el mondo in man la mola tuto!". Ma a la fine tuti xe convegnù 'ntel dire che bisogna 'assarla nare par el so destin. I so amizi no i ghin voléa pi, la jente del paese, chi ghin diséa de ben e chi de male, in tribunale e in pretura i xe restà tuti maravejà, el prete inveze el xe stà tuto contento.
Dopo on ano de noviziato Betina xe deventà na vera mùnega. A l'ano drio la ga bu na bruta malatìa, i la ga portà in ospedale e i la ga messa in càmara con tute quele malà de càncaro. Ela no se lamentava mai, la zercava senpre de darghe ajuto, conforto, solievo, speranza a chel'altre e no la ga mai volesto savere che male che la ghea. La sitimana drio el primario ghe ga dito: "Ma ela, sorela, no la vol miga savere che male che la ga?". E ela ga risposto: "Nò, nò, dotore, el me male che 'l sia quel che se vole a conta poco, mi sò ca lo aceto e basta!". Al so tenpo la tosa ga guarìo e l'ano dopo i la ga mandà 'nton lebrosario in tera de mission. La ga senpre laorà a pi non posso e con grande amore. Dopo zinque ani la xe stà ciamà in convento, na sitimana dopo la madre jenarale la la ga numinà badessa de nantro convento. Ela ghe ga fato capire che la gavarìa bu caro a stare co i so lebrusi, ma chel'altra ga tajà curto, menzonàndoghe el voto de obedienza. El novo convento el funzionava a menadéo e la nova badessa vardava che tuto nesse senpre al mèjo. Dopo tri ani xe morto la madre jenarale e ela xe stà ciamà par nare al so posto. 'Nte le prime Betina la ga bu dispiazere parché par ela el so pan el jera quelo da stare in medo a la jente che patisse e che va al Creatore: la jera nà a mùnega proprio par quelo e par stare in medo a le scartofie no la se sentìa tajà; la se ga visto persa e drento de ela la se ga dito: "Sia fata la volontà de Dio!". Inveze co 'l tenpo la s'à ciapà e anca sto novo laoro el ga tacà a piasarghe.
Ogni tanto la vegnéa ciamà a Roma par na spece de concistori; ela saéa senpre consiliare guidare e incorajare e par le robe pi scabrose i ghe domandava el so parere. El destin ga volesto che la vaga a visitare chela mission indo' che ghe jera chel lebrosario indo' che la jera stà zinque ani. Là i ghe ga fato na gran festa e quele che la ghea cognossù le ga fin pianto da la contenteza. Ela la ga bu tanto caro a èssarghe nà. Có xe morto so mare la xe vegnù tri-coatro jurni in fameja: so pare no 'l faséa altro che strucarghe le man e ingroparse, so fradèi, le so cognà e i so neudi i la tratava con tuti i riguardi del mondo, ma ela la voléa èssare tratà come uno de la fameja. In paese la jente la la vardava con curiosità e gran respeto; el prete da la contenteza e sudisfazion no 'l ghe staséa pi drento 'nte la tònega. Betina anca se la saéa da èssare la capa de tute le so mùneghe, la jera senpre a la man e a la bona, ela ghe daséa confidenza a tuti; se la vedéa na carta partera la la tirava sù, se calche sorela 'assava na porta verta o na luce inpizà a rimediare la ghe naséa ela. Guio el jera el canpanaro, el guardian del convento e quelo che faséa tuti i lauri da omo. Na volta el ga visto Betina in ciesa che come al sòlito la disea la corona; l'omo ghe xe nà rente, el ga spetà che la fenissa el mistero e po' el ghe ga dito: "Sorela, se la saesse che da chì diese minuti ghe toca a rèndare l'ànema a Dio, indo' narìssela, cossa farìssela?". Ela ga risposto: "A seguitarìa a dire la corona!".

[torna sopra]