Editoriale

Na vergogna da scancelare
On delito contro la dona, che xe soto i oci de tuti. E tuti fa finta de no védare! Anzi, nò: qualchedun zerca anca de profitàrghene...

Quando che se 'ndava scola, pi de mezo sècolo fa, se gavéa senpre on quaderno de bela e uno de bruta che 'l ne servìa par farghe tuti i esercizi che la maestra ne daséa da fare par casa. Su sto qua jera consentìo sbaliare, farghe i scaraboci, e dopo la maestra la ghe faséa i soi co la matita blu e rossa, e tuto servìa par inparare, par no ripètare i sbali, e dopo se copiava te'l quaderno de bela.
Forse anca ne la vita xe da fare come a scola: i sbali che ne vien sotolineà da la cossienza, da la morale, dal bon senso, dal senso cìvico, sociale e umano, no gavemo pi da ripètarli, da rifarli, có tornemo a vìvare... "in bela" la vita! Femo on esenpio. Chi xe che no vede de giorno, de sera e de note chel squalido spetàcolo de tose e tosete, nel fiore de i so ani, lì so 'l marciapiè, drio el zejo de la strada, putine cressùe massa in pressa, sbeletà come sgualdrine de profession, meze nude e col dedrìo descoerto come simiete dal cul pelà? Solo le suore de clausura pol dire de no védare sta vergogna!
E noaltri? Noaltri vardemo, vedemo e tiremo drito. Brontolemo on fià, in casa no gh'in parlemo: el xe on argomento massa scabroso. Intanto el fenòmeno prostituzion el cresse e pi grando deventa el delito che se consuma su la pèle de la dona, ridota in schiavitù, propio so 'l pi belo che xe drio bojire chel processo de emancipazion de la dona, che xe drio inbocare la strada giusta. El riscato de ste "schiave" el xe on inpegno serio. Scomiziemo col dire, inanzi tuto, che ne la magior parte de i casi se trata de violenza e come tale la va afrontà. Démoghe drento con la cacia a le organizazion criminali che sfruta e organiza la prostituzion e fa comercio de èssari umani.
La storia de ste done imigrate clandestine che se vende (africane, sudamericane, moldave, rumene, albanesi, slave, slovene...) la xe quasi senpre la stessa: cronpà da le fameje in miseria o portà via con ingano dal so paese par "catare fortuna" in Italia. Na bela fortuna le ga catà, pore disgrazià: on branco de òmeni-lupo, famà come le belve, che, disponendo de na màchina e de quatro palanche, i pol permétarse la so dose de "sesso quotidiano" - ... perché io pago, caro lei! - senza gnanca pensare al ris-cio malatìe, e a la "tratta" de èssari umani, che ghe sta drio al "sesso a pagamento". Se dise che l'oferta aumenta, parché aumenta la domanda. Ma cossa femo par scorajare la domanda? Savendo quanto semo ipòcriti, gavarìa fato el so efeto, come forma provisoria de freno pi che de repression, la misura ciapà da alcuni sìndaci de multare i clienti e sequestrare le auto.
Mi credo che el vero rimedio sia un progeto educativo ne i confronti de i "clienti", de i gióvani, e ridare fiducia e un lavoro onesto a la dona, e non quelo de creare zone de "riserva di caccia", na spece de "zoo", dove confinare ste pore disgraziate che restarìa comunque in condizion de sfrutamento e de violenza. No xe spostando la piaga che se riva a la guarigion. Ocore darghe na man a le associazion de volontariato che se dà da fare par "liberare" ste schiave e le aiuta a canbiare mestiere. No credo che tuto questo meta in crisi la libertà personale, come va sostegnendo qualche rapresentante per i diriti civili: anca la libertà ga de i lìmiti so na società civile!
El spetàcolo de la prostituzion so le strade, e non solo, el xe la bruta pàgina da no ricopiare so 'l quaderno de bela!

[torna sopra]