|
Da Rovigo
Come vala?
 |
| Come voto che la vaga: no se vede? (foto de Paolo Gardin) |
Ma che fastidio quando chi te vede e i te fa: "Come vala?" "Come voto che la vaga? La va e basta!" cussì a bisognarìa rispòndare a la zente. Ma par no parere vilani a se risponde al sòlito modo ca fa tuti: "Ben, grazie; e ti?"
In te sto modo, a ghe tronchemo el bévare. Guai a dirghe che la va male, parché alora no la xe più finìa e i te domanda sùbito parcossa e parcome. E ti, a bisogna ca te ghe cunti le to desgrazie. In conclusion, sa te ghe rispundi che la va ben, a te ghe disi na busìa; e sa te ghe disi che la va male, no i te mola più.
Mèjo ancora a sarìa che ogni uno el se fesse i so intaressi senza tanto inpazarse de i altri. Tanto no canbia gnente: se la va male no i te juta; e se la va ben, i ga rabia.
E po', no ocore gnanca stare lì a domandare: a ghe vuole cussì puòco a capire che la va male par tuti! E difati qualchedun, più furbo de tanti altri, el risponde co filosofìa: "A tiremo vanti!", ca vol dire tuto e gnente. A uno che dise cussì, no se ghe ribate gnente; solo Alfio de Gavelo el precisa ca sarìa mèjo tirare indrìo, come na olta.
Ma par tuta la zente, tirare avanti a vol dire andare avanti par la so strada col ben e col male ca se cata in viajo. Ma par quanto ben che la vaga, a se sa che tuti andemo verso la vechiaja, siché, sa moremo prima, a xe male, e sa moremo dopo, da veci, a xe pezo.
Se po' a metemo in conto che par i altri a paremo senpre più veci de la età ca ghemo, alora a xe anca inùtile stare lì a domandare come che la va.
Anche nantri a pensemo che i altri i sia più veci de la so età e sa ghe disemo chi pare più zòvani, a xe solo par farghe piazere.
Mi a lo posso dire dopo avere scanbià qualche parola co on operaio che a vardarlo in facia el me pareva su i sessanta ani o zo de lì.
Insuma, ciapà da conpassion che a la so età el laorasse sol querto de la me casa, a zerco de andare so la colmegna anca mi par jutarlo, ma lu no 'l vole disendo che a la me età a xe mèjo ca staga tento a no sbrissare sui cupi.
"E quanti ani gogna, secondo lu?" a ghe domando.
"Sessanta-sessantazinque" el me fa.
"E inveze lu, a pare che 'l ghe n'àbia zinquanta" a ghe fago mi, da ipòcrita, e anca on fià intavanà de sentirme dare dal vecio da uno ca se vede in te'l muso che 'l xe più vecio de mi.
"Gajardi - el me fa lu - A so' nato in te'l '44, e donca i xe zinquantasiè."
"Propio come mi!" - a ghe digo, contento par tuti du, ca semo veci conpagni.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Riva l'istà, ma no par tuti
O mèjo: l'istà la riva par conto suo, ma mia tuti pol gòdare i benefici de la bona stajon. Ghe xe chi sogna mari e monti... e lì 'a finisse!
de Mario Klein
Da Belun
Fior de montagna
de Biancamaria De Vecchi
|
