|
El raconto del mese (in Visentin)
Erminio da la Svissera
 |
| El jera partìo co na valisa de carton... |
Erminio jera nato a Merendaore, na frassion de Recoaro e lì, tra tanti stenti, el se gavéa fato omo. So pare jera morto in pressia, pena finìa la guera, par na malatìa polmonare maurà tra la neve e le paure de quando el jera partigian tra i grepani del Pasubio, del Carega e a Canpogrosso. Ma a Recoaro no ghe jera lavoro par chi no gavéa che quatro briche de prà e tre castegnare. So mare, quando non l'andava a legna so 'l bosco, la sferussava a far calsiti e maliuni de lana par rimediare da qualche siora quatro palanche. El poro Erminio savéa ben che le tose e le servete de Recoaro le pretendéa con l'amore anca i schei. Qualcheduna scominsiava a piaserghe. Anca on porocan gavéa el dirito de amare, seben che la miseria ghe metesse tanti pali tra le rue. Senpre el se confidava con so mama e quando la dona ga capìo le pene del toso, la se lo ga tirà vissin, davanti al fogolaro. I ghin'à parlà par tante sere ma, pi i ghe ne parlava, pi cresséa le dificoltà. Ghe ga dà la solussion on paesan che, dopo ani de lavoro a l'èstero, el jera rientrà in paese ben vestìo e con i schei da conprarse na caseta e sposarse. Sto fato ga verto i oci a mare e fiolo. Erminio se ga fato el passaporto e so mare, vendendo le quatro galine e lavorando tanta lana la xe riussìa a méterghe rento na valiseta de carton qualche capo de vestiario. El toso, armà de la volontà propria del montagnaro bituà a tanti stenti, l'è partìo par la Svissera. A Pasqua e Natale el scrivéa lunghe létere: el contava che el gavéa za messo da parte diversi scheiti, ch'el stava ben, che lavoro là ghe ne jera tanto. Fra sinque ani, fasendo i so calcoli, el gavarìa possudo tornare a Merendaore e farse anca lu na fameja. In Svissera el se gavéa fato ben volere par la so gran bonavoltà de lavorare, de contentarse del poco e de rispetare chi ghe dava el pan. Dopo i sinque ani, finalmente xe rivà par Erminio el momento de tornare e abrassare so mama. Quanto el desiderava de strénsersela tra i brassi! A pensarghe el faséa le làgrime. El viajo de ritorno no 'l finìa mai, ma a ogni stassion ch'el passava vissinàndose a Vicensa, se ghe slargava el core. In sità l'è rivà de sera, quando al tranvai no ghe jera pi corse par Recoaro. Come gavarìsselo passà la note?
El jera anca straco morto e par de pi no 'l podéa stacarse da le man la valisa che ghe gavéa conprà sinque ani prima so mama e che 'desso, oltre a on bel regalo par ela, la contegnéa el so tesoro: tuti i so risparmi ingropà rento on fassoleto, sconto rento na fanela. El se ga ricordà che a San Felisse, 'pena fora da la sità, dovéa vìvere ancora na so zia, sorela de so poro popà. El la ga sercà e trovà. Ela, come la lo ga visto, la ghe ga slargà i brassi e parecià on piato caldo e on bon leto.
El toso, che no 'l vedéa l'ora de sfogarse con qualchedun de i sui, el ghe ga contà tuto quelo ch'el gavéa passà in Svissera e (no 'l pensava serto che qualche volta i parenti i xe serpenti) anca quelo che, con tante fadighe, el gavéa messo da parte. Da so zia el se sentìa al sicuro e, dopo on bon sono, la matina drio el ga ciapà el primo treno par Recoaro. A so mama el ga vossudo farghe na sorpresa. I basi, i struconi, le caresse le ga durà ore. Paréa che mama e fiolo mai gavesse possudo dimostrarse tanto ben. La felicità xe stà granda e, ristorà e rilassà, el gavéa dismentegà tute le fadighe e no 'l finìa de contare de i so sinque ani de Svissera. So mare se ga inacorta che ancora el tegnéa tra le ganbe la valisa: "Métela so on canton - la ghe ga dito - pi tardi te la versarè." E, pi tardi, el toso: "Mama, te fasso védare tuti i me risparmi, el fruto de tante fadighe e de tante privassion. Dio solo sa quanto go tribolà par métare da parte anca solo on scheo, sofegando tante voje!" So mama ga fato le làgrime e strenzéndoghe la testa so 'l core, ghe ga dà on baso in fronte. "Mama, eco la ciave. Verzi ti la valisa e ciapa in man el fagotelo rento la fanela fata con le to man." Ma, del fagotelo de schei jera restà solo el fassoleto. Poro Erminio! El ga butà par aria tuto quelo che ghe jera rento la valisa, anca el regalo par so mama ma non xe saltà fora gnente. Alora, sigando, el ga ciapà a peà tuto quelo che ghe jera in cusina. I schei jera sparìi. Ma dove, e quando? So mama, a védare tanto spaventà el toso, terorizà non la savéa quale santo ciamare par calmarlo. A le parole de ela el rispondéa con on sigo e par la prima volta la lo ga sentìo bestemare. Con i oci fora da la testa, urlando, el ga sbatù la porta. I lo ga catà picà a na castegnara. Nessun ga savudo gnente de i schei e anca so zia da Vicensa jera vegnù a piànzare al so funerale.
Come podévela ela, da senpre na poareta, goderse i risparmi robà al nevodo? Non la podéa far védare a la gente de avere, proprio 'desso da vecia, tuti chei schei! So nevodo tra le strussie gavéa consumà la vita e par la so cativeria el se la gavéa tolta. 'Desso non la dormìa pi, tuti ghe faséa paura, el rimorso ghe sgrafava el core e i servèi. Non la gavéa pi gnanca la voja de vardarli chei maledeti schei. E gnanca la podéa pi restituirli, parché lu jera morto. Na man, rento le so fonde scarsele, continuamente strenzéa chel fagotelo che ghe brusava i déi. Da le man i ghe lo ga tirà fora có la ga fato on colpo e tuti i parenti xe restà de sasso. Al so funerale, via del prete e del bechin, no ghe jera gnanca on can ma, forsi, anca se sconto, ghe jera el demonio che da tanto el se la tegnéa tra le grinfie.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Riva l'istà, ma no par tuti
O mèjo: l'istà la riva par conto suo, ma mia tuti pol gòdare i benefici de la bona stajon. Ghe xe chi sogna mari e monti... e lì 'a finisse!
de Mario Klein
Da Belun
Fior de montagna
de Biancamaria De Vecchi
|
