|
Editoriale
Cossa ghe èntrelo el boaro?
No se capisse parcossa, par fare na canpagna contro l'abandono del can, sia stà necessario ofèndare el boaro
Sarà stà colpa del caldo o del sole che, quando el bate su i zarvèi descoerti, el fa sicuramente dano, ma de le volte qualchedun va proprio via de testa!
Vegnemo sùbito al caso. Poco prima de la metà de lujo, su i muri de Padova a xe conparso un manifesto strano che, se da na parte el xe da aprezare parché el difende le bestie (in sto caso el can), da naltra el xe da biasimare parché el ghe ga dà de le colpe a na ùmile figura de lavoratore de la tera, che no se mèrita assolutamente né de èssare ofeso, né de èssare paragonà a la persona incivile, egoista, menefreghista, disumana e bestia, che ga corajo de bandonare al so destin quelo che senpre xe stà considerà el mèjo amico de l'omo: el can!
A parte che ormai la xe na categorìa de lavoratore che no esiste pi, e che se la ghe fusse la sarìa modernamente ciamà chef de stala, chauffeur de corni, banbinaio de vedèi o badante de bovini... A parte questo, se ghe jera uno che spartiva la so vita insieme co le bestie, conpreso el can... da pajaro, da corte, da guardia, da cacia, da corsa, el jera proprio el boaro.
Nessun più de elo savéa cossa vol dire èssare bestia: cultura poco o gnente, laorare pi de tuti st'altri, co qualsiasi tenpo e in tute le stajon, gnente riposo o gran poco, gnente lusso, gnente svago, gnente viaji se non quelo del samartin par canbiare paron; tribolare anca massa: proprio come le bestie. E proprio a lu, omo tra le bestie, i xe nà a pensare co se ga tratà de darghe on titolo de ofesa a l'incossiente, busiaro come na pìgrafe, che in piena istà el se lìbera del can par nare pa i fati sui senza trapèi drio!
Xe pur vero che col caldo, co i "esodi" e "controesodi", co le partenze viliache che se lassa a le spale zentenari de bestie (cani, gati, serpenti, pantere o tartarughe...) semo davanti a na vergognosa realtà che disonora la raza umana e che buta fango su le parole civiltà e inteligenza.
E xe altretanto vero che le finalità de na canpagna publicitaria contro l'abandono la xe na roba positiva.
Solo che ne ga parso on controsenso, dopo tuto, regalarghe el vero significato del "boaro" a chi xe on traditore de le bestie!
On boaro no ga mai bandonà le bestie par capricio o par gòdarse in pace le so ferie (magari mai fate!). La so sensibilità no ghe ga mai sugerìo de desfarse de chel'80% de animài da conpagnìa che ogni ano, in ocasion de l'istà, vien bandonà (solo st'istà, 125.000 sani) e che difissilmente ritrova la strada de l'acoliensa afetuosa: la pi parte de ste pore bestie la finisse soto na màchina in autostrada o la va t'on canile.
Par finire, no xe che mi go fato el boaro, o che son fiolo de on boaro: difendo par question de principio la memoria de la so figura, sugerendo che se podéa istesso darghe el so nome da festa a chi bandona on can, ciamàndolo zaltron!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
Cossa ghe èntrelo el boaro?
No se capisse parcossa, par fare na canpagna contro l'abandono del can, sia stà necessario ofèndare el boaro
de Mario Klein
Da Vicenza
La "Jana" e i nani de Vila Valmarana
de Ines Scarparolo
|
