|
Sbiansi de Sagessa Popolare
Spìriti e fantasmi
Da un gelatin veloce, l'ocasion par viajare tra raconti e legende de la tera nostra che parla de
 |
| ... fata 'sassinare te la so càmara da leto... |
"Dài, Sandra, manésate a ciuciare sto gelato che se la catemo a le svelte prima che ne riva tra copa e colo un scravasson de quei bruti. Varda che scuro furioso che xe drio vegnere vanti. Duminti vien basso le crocalete e anca Saraval co le so mussete, quelo che xe bon negare i stròpoli assieme ai spiriti de Papadòpoli."
Gero da Roco in Pra de la Vale quela sera, drio rinfrescarme la gola anche mi, quando go sentìo de sbrisson pronunsiare sta frase da na sioreta distinta con la so permanente grisa ben in órdine che scanpava a ganbe levà tegnendo par man na creaturina de pochi ani sora la sinquina. "Cossa disèla, siora?" me sarìa vegnùo da domandarghe a bota salda, ma le do spasemàe coreva cussì svelte che no go 'vùo modo né maniera de portarme casa gnente de più, parché spessegando co 'l me cono in man no vedevo l'ora de finire e mocàrmela, cussì spaurìo da quele ràfiche de vento che supiava in alto nùgoli de pólvare insenbrài da fojame e cartasse varie. Scanpare in tenpo da quel inferno de tron e lanpi podeva significare la salvessa de la màchina da na probàbile tonpestada senpre più 'minente. Sichè, zio, da asfissiante ficanaso, aprofito par girarte quela domanda che me gera vegnùa drita in mente alora, siben che gero inpensierìo da quel tenporalon che, par fortuna, no 'l ga fato gnissun disastro. Xe vegnùo zo apena quatro giosse che ga sì e nò insupà la pólvare pa 'e strade.
Malediti i ossi de salata! Questa po' in che vaniesa sito 'ndà sunarla? Par to bona sorte te ghe el vantajo ca no so' mai agro có se trata de darte d'un pan tri tòchi fetài co do panade in sima, parché te cato senpre cussì tanto intaressà che xe anca un spasso vegnerte drio co 'i discursi. Questo, caro neòdo, xe un argomento da ciapare co 'e molesine pi che darghe un dessora co un scorlon de spale. Con quante volte ca ghe ne go rajonà, forse parché da pìcolo so' sta scotà da qualche episodio spetrale vissùo in direta sul posto, me so' senpre sentìo par drento un serto smissiamento che metéa in balansa la fede e in bruso la me devossion pa 'i santi. Me contava to nona, có gero un tosato in vareso, che te l'antico feudo de Ca' Dolfina, dove so' nato mi, de note se senteva spesso de i laminti misteriosi che vegnéa da i granari con de i rebaltaminti strani che tegnéa tuti co 'l fià sospeso. Me ricordarò fin ca canpo quela sera d'inverno che i òmani s'à radunà dopo sena in tinelo al scuro co 'e candele morte in man e i ferài pronti par farghe la tira a sti fantasmi che a note fonda i sfandéa pi le rece ca no fa i oci. Ben, có se ga fato sentire el primo segnale, par sfida i ga inpissà i so argagni ciapando driti la scala de le biave. Poco prima de rivare sul tolà de i sachi i s'à sentìo tuti te na volta un sbesigolare lesiero tel muso che daséa l'inpression de tante scarpìe fissàe traversovìa come par sbararghe el passo e de colpo s'à smorsà insieme tuti i ciari. Gavemo ciapà na spaga tuti quanti có xe rivà basso i òmani e i lo ga contà a le done e ai fioi che gera drio dire el rosario davanti al fogolaro co 'l canfin inpissà su la napa. A quel punto to nona ga tacà sberegare preocupà: "Sequeri, sequeri! Xe qua le àneme de i nostri morti che se fa sentire parché le ga bisogno de ben, cade farghe dire de le messe sensa stufarse tacando domatina sùbito." E cussì xe stà fato. Sa te credi in Dio, dopo poco xe cessà sto purgatorio. I m'à senpre fato crédare da bocia che qua in padovana bàgoli del gènare ghe ne xe capità pareci. I diséa infati che te la regia de i Cararesi, par sècoli se ga sentìo de le stranbarìe tenebrose che tegneva a l'erta tuto el vissinado de la corte par note intiere. Anca la lussuosa residensa de i Novelo-Papafava pare che la sia stà inpestada da arcane lumasse, par ani anorum. Fati curiosi de 'parission e sparission spirìtiche vegnéa segnalàe a l'època anca da foravìa, come dal Castelo de San Zen, tacà Montagnana, dove inspiegabili tranbusti da notanbuli tegnéa in palpitassion la zente castelana dando la colpa al fantasma de Tomaso da Mantova, sassinà a le porte del maniero. Anca tel castelo de Monsélese, ai pìe de la famosa roca, pare gabia dimorà par un bel tòco do spìriti famosi: quelo de Jacopino da Carara e quelo de Avala, l'amante de Ezelino da Romano. Invesse al castelo de Monte Siròtolo, rente a Abano Terme, fin qualche ano fà, i n'à fato crédare che faséa tor le brighe l'ánema de Speronela Delesmanini, rapìa par órdene de Federico Barbarossa e libarà da i padovani tel 1165. I dise che de note cade vardarse da le fleme, ancora 'desso, tel castelo del Catajo, drio la canaleta vissin a Batalia Terme, dove insprìta i sentimenti pi de na volta l'onbra de Lucressia Dondi, mojere de Enea dei Obizi che 'l la ga fata 'sassinare te la so càmara da leto dopo 'verla caponà co un pretendente ingalossìo che 'l tentava de farlo beco e pare che ela ghe stesse in calda. Se di-
score che ogni tanto se vede ancora bójare la pàciara de sangue sul posto che la xe stà scortelada.
Fra i toriuni merlài del castelo de Valbona vien notà de tanto in tanto la presensa spetrale de la fiola de Germano Ghibelli, morta da la disperassion parché so pare el ghe gavéa proibìo de maridare el so spasimante pa 'l quale la gavéa perso la testa. Pènsate che anca al castelo de San Pelagio, queste xe notissie fresche, i dise che l'ànema de Melissa, quela tosata copà soto na màchina qualche ano fà, in strada Batalia, la faga balare i sorzi in piviale a chi s'inbate de note drio quei saloni te i momenti che la se fa védare.
Altre vile antiche, signorili dimore setecentesche del patrissiato venessian, a Pionbino Dese, Galliera Veneta, Castelfranco e altre che 'desso no me vien, xe deventàe famose par la presensa de fantasmi pi o manco insolenti. Miga storti sti spìriti, i se ponava senpre in loghi prestigiosi! Schersi a parte, pol èssare che le sia fandonie inventàe o legende sensa fondamento, roba d'altri tenpi, ma mi ca so' sta scotà da putelo, te sicuro có ghe ne parlo, le me fa strénzar el vermegale e giassare el sangue te le vene. 'Desso te ghe ne sa calcossa de pi anca ti. Te s'à indrissà i peli te la schina?
Nò, nò, so' tranquilo parché me ritegno sodisfà a la granda.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Otobre:
Editoriale
Salvemo la doménega!
Da tanti pùlpiti se sta levando, forte, on zigo de alarme: la doménega la xe deventà on giorno come tuti st'altri; la gente no la va gnanca pi a Messa
de Mario Klein
Sbiansi de Sagessa Popolare
Spìriti e fantasmi
Da un gelatin veloce, l'ocasion par viajare tra raconti e legende de la tera nostra che parla de
de Dinerio
Da Verona
No ghè gnente de mèjo de casa sua
de Giacinta Dall'Ora
|
