Memoria viva

Arrigo Boito e Victor Hugo
te na tragedia padovana del 1500

Arrigo Boito, padovan, nato in te 'l 1843 in Contrada de i Morsari (ancò via Cavour) e morto a Milano in te 'l 1918. Musicista, conpositore, poeta, leterato, oltre a le do so òpere lìriche "Mefistofele" e "Nerone", el ga scrito i libreti de le òpere "Gioconda", de Ponchielli, "Otello" e "Falstaff", de Verdi.

'Na bea "Gioconda" prima de la guera al canpo de la Betina. El me viajo tuto solo da la canpagna a la sità, da putèo.
L'incontro tanti ani prima par caso de la me futura morosa e mujere.
La profonda poesìa de le parole de Arrigo Boito e de la mùsica de Ponchielli.
La ispirassion a 'na tragedia padovana de Victor Hugo

Gero in te'l '39 in canpagna co' i mii, quando che in tola go sentìo da me Papà che a Padova poche sere dopo sarìa stà rapresentà a l'aperto l'òpera lìrica "Gioconda". Sicome gero apassionà de mùsica e che d'inverno in sità 'ndavo qualche volta al Teatro Verdi, me so' interessà e el Papà me ga sicurà ch'el me gavarìa conprà el bilieto. Naturalmente la Mama ga fato un poche de storie, ma mi, d'acordo co 'l Papà, go dito: "A le 7 e meza togo l'ùltimo tran de la Veneta che vien da Bagnoli, smonto al Bassanelo, vado al spetàcolo, e el Papà me vien a tore par tornare a casa!" A la fine xe 'ndà tuto ben, e mi me so' preparà. Me so' fato portare da casa a Padova el libreto de l'òpera, par capirla mèjo, so' 'ndà a vardare in te'l vocabolario artìstico cossa che gera scrito soto el nome de Amilcare Ponchielli, el musicista, e cussì xe stà.
La sera del spetàcolo so' partìo in tran vestìo ben; la Mama ga vossudo che metesse 'na camizeta bianca e el vestito novo conpleto a scacheti bianchi e neri. "Métete le scarpe nere, seto! A teatro no' se va co' le scarpe maron!" Robe giuste, de 'na volta!

Victor-Marie Hugo, nato a Besançon in te 'l 1802 e morto a Parigi in te 'l 1885, poeta, romansiere, dramaturgo, omo polìtico, fra i più grandi artisti francesi de tuti i tenpi. El ga scrito el drama teatrale "Angelo, tiranno di Padova".

In tran gero beato, no' solo par el spetacolo, ma parché me sentivo lìbaro, come un grando! So' smontà al Bassanelo e a pie, svelto, longo via Giordano Bruno, la vecia circonvalassion de alora, so' rivà al canpo de la Betina. 'Desso ghe xe el Centro Universitario Sportivo. Me so' presentà a l'entrada e acorto ch'el Papà gaveva conprà un bilieto de una de le prime file, proprio soto el palco. El canpo de la Betina gera tuto ocupà da poltronsine e da careghe e, nel quadro de i bastioni "cinquecenteschi" de Santa Croce su 'l sfondo, el dava un bel spetàcolo. Ghe gera za tanta zente e se capiva parché a Padova l'òpera lìrica ga senpre avudo tanti apassionài. El spetàcolo gera fato da un punto de vista organizativo come "Carro di Tespi lirico". Cussi se ciamava tuti i spetàcoli de òpere a l'aperto, squasi senpre in istà. Tespi gera el nome de l'atore e autore de tragedie, nato in Grecia in te i ani 500 prima de Cristo. El gera stà el primo a divìdare la parte de i atori più inportanti da la parte del coro che fin alora gera stà la dominante in te le tragedie greche. El gera stà in più el primo che, co' la so conpagnìa de atori, musicanti, "scenografia", ga scominsià a spostarse de sità in sità. Da questo el nome de "Carro di Tespi".
L'òpera xe stà belìssima, in te la mùsica, el canto, le parole, la messa in sèna ne la Venezia de secoli fà. Go scoltà soratuto le romanse "A te questo rosario!", "Cielo e mar!", in più la mùsica a tuta orchestra e baleto de la famosa "Danza delle ore" co' 'na infinita sensassion romàntica e sentimentale, che me bateva el core. El fato vive nel periodo del màssimo splendore de la Serenissima Repubblica de Venezia, co' tute le so grandesse de storia, de polìtica diplomàtica e militare, de comerci orientali, de arte, ma anca de intrighi, soto la potensa e l'opression del famoso "Consiglio dei Dieci". Laura, la belìssima mujere del potente patrissio Alvise, xe l'amante del zóvane genovese Enzo, che, travestìo da ùmile pescadore, se ferma in sità. De lu xe inamorà anca l'atrice Gioconda. A conossensa del tradimento de la mujere, Alvise fa avelenare Laura. Enzo copa Alvise e vien messo in prezon. Ma el velen, par òpera de Gioconda, xe solo un potente sonìfero. Gioconda se concede a Barnaba, potente e "cinico" manegion del Consiglio dei Dieci, che da tanto tenpo la desidera, e cussì riesse a liberare Enro, che scapa co' Laura. A la fine Gioconda, che ga provà schifo e odio par Barnaba, se copa.

Na vecia fotografia de Porta Altinate, nominà da Victor Hugo, ne la so tragedia padovana.

La zente se ga divertìo e tanti xe stà i batiman a la fine de i quatro ati e più de qualche volta a sèna 'verta. Ma, a 'sto punto vojo contare la birbantada che pur scoltando co' atension e comossion l'òpera, go fato. In 'na poltronsina proprio davanti de mi, gera sentà, voltàndome le spale, 'na putèa che gavarà 'vudo dieze, ùndeze ani. La pareva un bonbonsin: la testina bionda pareva d'oro e soto de i risseti se vedeva un colesin bianco e ben fato, la figureta gera ancora più bela par el vestitin de colore intonà e ben fato. "Boia can!" go dito dentro de mi, "vojo védarla in viso". Me so' messo, ogni tanto a sufiarghe sul colo, ma ela, cofà 'na statua, no' se ga mai mossa. Più ch'el tenpo passava, più cresseva la me curiosità! A la fine, go fato un pìcolo giro e la go vardà in viso, ela no' se ga sconposta, ma so' restà incantà. Quea sera de "Gioconda" sarìa stà fatale par el me destin! Go rivisto la putèa par strada, za signorineta, in te'l '42; la gavarìa conossuda par caso do ani dopo e la sarìa deventà me morosa e in te'l '52 me mujere e mama de i me tre fioi. Tanto par dire cossa che xe el destin!
Me Papà me ga spetà fora del canpo. Da la strada el gaveva 'scoltà tuto l'ùltimo ato. El gera un pochetin inboressà e sùbito el me ga dito: "Cossa xea quea facia scura? Almanco dame sodisfassion dizéndome che te te si divertìo, òstrega!" "Sì, sì, Papà, xe stà belìssimo; ansi te ringrassio parché el posto gera proprio indovinà!". In màchina semo 'ndà verso la casa de canpagna. Durante el viajo, el Papà me ga contà che el libreto de "Gioconda", gera stà scrito verso el 1870 dal nostro padovan Arrigo Boito, musicista, poeta, crìtico leterario. El gera la passion de me Papà parché el gaveva scrito parole e mùsica de quel colosso de òpera che xe "Mefistofele" ispirà al "Faust" de Goethe. El Papà gaveva portà a casa tanti dischi de 'sta òpera co' le vossi de Nazareno De Angelis, basso, e del padovan Aureliano Pertile, tenore. Mi me li scoltavo raquante volte, co 'l gramòfono alora a manovela co 'l marchio de la "Voce del Padrone". Continuando el so discorso, el Papà ga dito: "Ma sul conto de Arrigo Boito e de l'òpera che stasera te ghe sentìo, go da contarte un particolare che pochìssimi padovani conosse, ma 'desso xe massa tardi! Semo squasi 'rivà! Te lo conto doman in tola."

Altra vecia fotografia de Porta Molino, nominà in te el drama "Angelo, tiranno di Padova" de Victor Hugo.

Quea sero so' 'ndà in leto sereno, pàcifico, contento, ma, più che le bele note de mùsica e de canto, me coreva in te'l servèo el pensiero de la toseta che gavevo visto, i so rissoli biondi, el colesin bianco dove che, inutilmente, gavevo sufià tuta la me curiosità. Pareva che calcossa me dizesse che la gavarìa rivista, come che xe stà. El giorno dopo in tola, el Papà ga ciapà l'inissiativa: "Gheto contà a la Mama de ieri sera?" "Nò". "Bel menarosto! Mi insisto parché la te lassa 'ndare a inparare 'ste bee robe e ti te tazi!" Alora go contà par filo e par segno tuto, da la mùsica al canto, da i cantanti al baleto, da la "scenografia" al pùblico, da i tanti batiman a le domande de "bis". Go d'averlo fato tanto ben parché el Papà continuava a vardarme co' sodisfassion. Anca la Mama finalmente gera contenta e, par dire che da seno la gera stà in pensiero a saverme solo, distante, via de sera, la me ga confessà de èssare restà sveja fin al nostro ritorno. De 'ste prove de amore e teneressa in casa ghe ne go 'vudo tante. A la fine el Papà ga continuà el discorso interoto.
El me ga contà quel particolare conossudo da pochìssimi padovani alora e anca 'desso dopo più de sessant'ani. Arrigo Boito, servèo pien de fantasìa, dopo aver studià al Conservatorio de mùsica de Milano e partecità a batalie risorgimentali, ga fato de tuto, musicista, conpositore, poeta, leterato, crìtico d'arte. No' se sa parché, forse par i tanti inpegni in prima persona, el ga conposto el libreto de "Gioconda" firmando non co 'l so nome ma co' un "anagramma" del nome stesso, cioè Tobia Gorrio. Scrivendo el fato de "Gioconda", Boito se ga ispirà a 'na tragedia rapresentà fra i ani 1830 e 1840 da Victor Hugo a la Comedie Francaise a Parigi. La tragedia gera "Angelo, tiranno di Padova" e viveva proprio ne la Padova del 1550. El fato xe pressapoco queo stesso de "Gioconda". La nostra sità gera soto el dominio pesante e difidente de la Republica de Venezia atraverso l'órdine potente e cìnico del Podestà venessian, Angelo Malipieri. Questo ga 'na mujere, Catarina, inamorà del valoroso cavaliere Rodolfo, un lontan dissendente de i Ezzelini da Romano. Dopo 'na longa serie de intrighi, disgrassie, contrasti, i do poe coronare el so sogno de amore par l'òpera generosa de 'na atrice, Tisbe, praticamente ne la stessa parte de Gioconda, che a la fine se sacrìfica morendo. El spìrito de la tragedia xe "cupo" e oprimente, dominà da la duressa venessiana, soratutto par òpera del Consiglio dei Dieci, presente, in ogni ato de la vita de Padova.
"Bravissimo el nostro padovan Arrigo Boito!" ga concluso el Papà, "anca se la tragedia de Victor Hugo ga 'vudo al so tenpo un grande sucesso e ga espresso la situassion de l'època, la "Gioconda" xe in te le parole de Boito e ne la mùsica de Ponchielli più romàntica, più umana, più rafinà!"

[torna sopra]