|
Da San Bonifacio (VR)
El dì de i Morti
 |
| Cimitero de San Bonifacio: le do done le era tra le tonbe a destra. |
El dì de i Morti davanti al cimitero del me paese gh'è 'na spece de marcà che 'l ghe dà un fià de color a sta giornada grisa e par el tenpo, mai massa belo, e par l'ànima che l'è trista e sbatua.
Da distante se sente vegner incontra el profumo de i biscoti che se rostisse su la carbonela, rento un bidon segà a metà e fato proprio par sto uso. Gh'è banchi de bagigi, de nose, de stracaganasse, de caròbole, de ciuci, de patate mericane ingossone bele cote e no manca i fiori. Fiori novenbrini, da la çiera trista e senza profumo, che vien a ingrossar ancor de pi el magon che ghe strenze l'ànima ai cristiani in sti giorni del ricordo.
Ani fa gh'era pi tenpo da star co i morti; 'desso la zente la ga pressia, la mete i fiori rento i vasi, la se fa el segno de la Croce, la màstega 'n'orazion e po'... via a tor la màchina par nar par i so afari. Digo ste robe parché calche ano fà - era el 1989 - m'è capità de far el giro de i me morti, che i è sparpajà qua e là te 'l canposanto. A un çerto momento go isto do done ferme davanti a 'na tonba, là indò i morti i è sepelìi soto tera.
Da lì no le se moéa e alora ghe son nà viçin par sentir cossa che le diséa... L'è stà alora che me son inacorto che se pol pregar e ciacolar in te 'l stesso tenpo, cossì, có so' rivà a casa, go ciapà carta e pena e go çercà de butar zo 'na poesìa che la rispeciasse chel ghe gavéa 'pena sentìo. Eco cossa è vegnù fora:
El dì de i Morti
(do done al cimitero: la Gigia e la Marta)
G. Rechiemeternadonaisdomine...
M. ...etlusperpetualuciatei...
G. ...rechiescantinpace...ame!
M. Ciò!... Varda Bepo "Malta" indò che l'è...!?
No lo vedéa passar da un par de mesi
e te lo trovo chì... no me par vero...
G. Lu che 'l diséa: "Ei, Gigia... massa ben!"
No l'era chì a sponsare al cimitero!?
M. E varda la Luçieta "Baratela"...!?
L'ò ista al marcà l'altra stimana...
La me diseva senpre: "Cara Marta...
Mi, el dotor, sò gnanca cossa el sia"...
... Regina angelorum...
G. ... ora prea...
M. Reginasinelabeoriginaleconceta...
G. ... ora prea...
Ancò ghe semo, ma doman? Cissà!?...
To fiola gala ancora Berto Vale?
S'ala sposà? No go sentìo pi gnente...
... Gloriapatrietfilioetspiritosanto...
M. ...sicuterainprincipioetoraetsenper...
Nò, tasi! è sucesso un gran spegazo...
La casa i la gavéa za bela pronta...
... Fiatvoluntastuasicutinceloetintera...
G. ... donanobispanenostrumcotidianum...
M. ... ma el s'à inzingalà de 'n'antra tosa,
cossì el la ga inpiantà dal dito al fato
e 'l s'à sposà co st'altra de morosa!
G. Viliaco, viliacazo, gran viliaco!
... Etnenosinducaintentazione...
M. ... Sedeliberanos amaluame!
G. Me fiolo el s'à trovà 'n antro laoro...
Adesso sì che 'l ga un bel mistiero...
... O Gesù da moreceso
non ti avessi mai ofeso...
M. ... o mio caro, buon Gesù
facchiotami senpre più...
G. ... 'ndò l'era prima el tirava i oci,
el laorava la pi parte in nero!
M. Ma senti che profumo de biscoti!
Che nemo a conpràrsine un sacheto?
G. Go 'oja de patate mericane,
ma co la dieta go da star indrìo!
M. Dieta o no dieta, varda ben chì torno
quanti cristiani che riposa in Dio!
... Etliberanosamalo......
G. ... Ame!...
M. ... Aportainferi...
G. Anca sto ano emo pregà pa' i cari!
Come se sta racolti in cimitero!
M. ... Eh, sì, qua no se pensa proprio a gnente,
sol a la tonba è ligà el pensiero!...
...Agnusdeiquitolispeccatamundi...
G. ... donanobispace...ame!
Eco, come gavì sentìo, ste do done le era proprio racolte, cossì racolte che a un çerto momento le s'à inacorto che no le era gnanca davanti a la tonba de un so caro. Cossì le s'à messo a çercar qua e là, ma gh'era de i mazi de fiori tanto grossi, che i scondéa i nomi su le làpide e alora go sentìo che le diséa: "Ei, Gigia, pregà ghemo pregà e sicome basta l'intenzion, speremo che le nostre orazion le vaga a bon fine!" Le go iste nar fora dal porton del cimitero, senpre a brazeto e paciolando fin a farse vegner la palaina in boca, po' le s'à fermà davanti ai bancheti de la fiera de i Morti e la Marta la se ga conprà un bel scartozo de biscoti, anca sa i era un fià massa cari (e la ghe l'à dito al maronaro che li cusinava).
La Gigia la ga catà inveçe un banco che 'l gavéa le patate mericane bele cote; la ga fato finta de desmentegarse de la dieta e co in mente el pensier che "chel che no stràngola ingrassa", la ghe n'à magnà una co do sboconà, tanto che l'era cossì ingossà da no èssar gnanca bona de pararla zo. La ga ris-cià de sofegarse e se no gh'era lì Toni "Resentin" co la so botilia de vin in scarsela, par parar zo mèjo i biscoti, me digo che la se sarìa sofegà. La ga butà zo un mezo goto in pressia e la ga ciapà de colpo i so colori che, se anca i tirava normalmente verso el violeto, no i era mia cossì carghi come quando no l'era gnanca bona de respirar.
[torna sopra]
|
