Da la Bassa Veronese

Ida Murari, 'na maestra speciale

Ne ste do foto, i sposi 'pena fora de cesa e la sposa... in vestito bianco co la coa e tanto de damigele.

Al giorno de ancó, se uno de San Piero de Morubio el passa par la Vila, ('desso l'è via Vittorio Veneto) el pol gustar, propio inpeto al vecio municipio, la vista del novo giardin, sistemà ben, co le so piere "messe zo a penel" (come dise el poeta Berto Barbarani) e na fontana al centro, colma de spianzi. Inveze, quando mi era picolina, lì ghera le scole comunali, co na gran corte de tera batùa, 'ndó che i buteleti in ricreazion i zugava a balon e le scolare a caranpana o a balete.
I maestri, in pausa anca lori, i se metéa in croco a discùtare de le so robe, anca de i so diriti, parché problemi, in chel primo dopoguera, ghe n'era tanti assè. Mi, a olte, curiosa come che era, tirava le rece par 'scoltarli... Anca 'desso, ne la me mente, ghè na oze de sora a chialtri, forte piassè de tute, tonda, bela, inpastà: l'è quela de la maestra Ida Murari che vojo ricordar (a febrar iè stè 51 ani da la so morte) propio in sti giorni de marzo, dedicà a la dona.
Ida Murari, pur nel so modo ordinario de far scola, l'è stà na maestra speciale. L'è nata nel 1904, fiola de Michele Murari e de Romana Beltrame Pomè, na fameja benestante de Roverchiara. Purtropo, Ida l'è restà òrfana presto de i so genitori, cussì l'è stà afidà a so zio Alessandro Beltrame che, insieme a so soreleta Maria, el le à messe in colegio a Verona da le Orsoline, fin che le s'à diplomè maestre.

La maestra Ida Murari Marconcin co la so classe del 1956-57.

Ida Murari l'à scominzià cussì a insegnare: prima a Cologna Veneta e po' in Val Pósina. Far la maestra, a chei tenpi, l'era na fadiga granda assè. Anca la nostra Ida bisognava che la se levesse sù al canto del galo, fare on'ora de strada a pié, rivare a casa del canpanaro, po' tórse la bicicleta e pedalare tanto fin da rivare a scola. D'istà però la tornava a casa da so zio Sandro a Roverchiara. L'è stà lì che l'à conossùo Lino Marconcin, on bel butel, alto e senpre vestìo ben. Ela l'à continuà a insegnare in Val Pósina par on bel tòco, cussì, de festa, el moroso el 'ndava a catarla in bicicleta. Pi tardi, la maestra Ida l'à otegnù el trasferimento a le scole de Roverciareta. Quando l'è stà l'ano 1933 la s'à sposà col so amor ne la cesa de Roverchiara. L'à fato, par chei tenpi, on matrimonio in ponpa magna: la sposa in àbito longo, on velo co la coa e le damigele tute vestìe de bianco.
Ben presto i sposi i à messo sù fameja: nel 1934 è nata la fiola Romana e nel 1935 el fiol Gian Michele. Dopo, la maestra, co i sui de casa, la s'à trasferìo a Forcate de Fontana Fredda, in Friuli, par sete ani, parché so marì el laorava là. In sto paese, sia i so scolari che la banbinaia de so fiói i se la ricorda ancora, parché l'era na maestra bona e piena de premure par tuti. La gavéa scolari che, dopo la scola, i 'ndava anca a casa sua.
I ani passè in Friuli i è stè particolarmente dolorosi e difìcili, causa soratuto la seconda guera mondiale. La maestra Murari l'à dovù star destacà par on bel tòco da so fiói, ma par fortuna, pi tardi, nel 1943, l'à podù 'ndar a stare con lori a Roverchiara, dove è nata la terza fiola, Galilea, e l'è 'ndà a insegnare a San Piero de Morubio, fin al 1968, quando l'è 'ndà in pension . L'è morta el 3 febrar 1990 e l'à lassà on ricordo indelèbile del so insegnamento, pien de umanità e dedizion senza lìmiti. L'era come na seconda mama e la tratava i so scolari come se i fusse stà buteleti sui.
A la fine de la so cariera, l'à passà idealmente el testimone a so neoda Margherita che, 'desso, la calca le orme de so nona. La maestra Margherita l'è cussì orgoliosa de sto fato, al punto che la sèita a dire: "Mi son la neoda de la maestra Murari" e l'è cussì apassionà del so laoro che, nel modo de fare, se pol dire che la ghe someja assè a so nona.

[torna sopra]