Quatro Ciàcoe - Al mar fora stajon - Marso 2007

Quatro Ciàcoe
Mensile de cultura e tradission vènete

de Giacinta Dall'Ora

Da Verona

Al mar fora stajon

Semo stè in Croazia, ne un albergo, ansi ne un hotel, de prima categorìa, 'ndo in'à tratà con i guanti bianchi...

Cato la me amiga dal giornalar. Stento a conósserla. L'è tirà a malta fina, la par na butela: ben vestìa, lustra, trucà giusta, un tajo nóo de cavéi; 'desso l'è bionda e la par propio bona. 'Pena la me vede, la me core 'ncontro e la me sgnaca du basi col stanpo. Par fortuna ancò la ga el rosseto roseta pàlido. Anca mi son contenta de védarla; ne volemo ben piassè che se fùssene sorele.
"Marisi!" ghe digo mi. "Come te t'è tirà fora ben da l'infuensa! Te pari piassè zóina. 'Sa eto fato?"
"Cara" la me risponde ela, "no posso mia spiegàrtelo in do parole. Móete a tor el giornal che nemo a sentarne al bar e beemo un cafè chiete."
"Adìo matina e adìo gnochi" penso mi, oramai pràtica de la facenda.
"Donca" la taca ela, dopo che la s'à cavà la giaca par esibir un decolté che el me fa schiantar da l'invidia. "Son rivà ieri, dopo na stimana de vacansa con el me omo. Semo stè in Croazia, ne un albergo, ansi ne un hotel, de prima categorìa, 'ndo i n'à tratà con i guanti bianchi. E po', te vedi anca ti el risultato de sete giorni."
"Cissà quanto la t'è costà!" ribato mi, pensando che se no l'è tanto caro, podaréa narghe anca mi.
"Bela, làsseme far a mi. Emo speso na miseria, parché semo fora stajon. No l'è che tuti i vaga al mar de febraro e oltretuto à senpre fato bruto."
"Ma alora" insisto mi, "come faséito a far végner sera?"
"Te spiego. Sto albergo l'era na 'beauty farm', cioè un posto 'ndó i te promete che se te rivi gobo te ve via drito, da tanto che i te sta drio. Ghera le terme, do pissine, sàuna, bagno turco, te podéi far massagi, fanghi, ginàstica, i te faséa magnar 'sano' e soratuto poco, tanto che el me omo che el se considera za belo, el naséa fora, ne na tratorieta lì vissin, a cavarse la fame. Mi invesse me son lassà invissiar e cocolar da el 'staff' del centro, no da me marì. Pensa che i me faséa no sò quanti massagi ogni giorno: a la facia, al col, a le ganbe e al pèto, con creme par inpienir le ràpole e par tegner sù el sen. El me omo, che el buta tuto in vaca, el diséa che quele pomate lì i era come el Tempest, che lu el dòpara par stupar i busi de i carói del legno, e che, par far star belo drito el pèto, bisognàa inpastar più spesso le paparele e tirarle fine, fine con la méscola! Ma basta no scoltarlo. Finìa la vacanza, prima ancora de méter piè in casa, me son fermà da el mèjo 'hair stylist' de Verona, cioè un paruchier che el studia el 'look' più adato a ti e che el te 'personalisa' aconciatura e truco e el risultato te ghe l'è davanti a ti."
"E pènsito de narghe ancora?" ghe domando mi, che m'è vegnù voja de partir sùbito par quel posto 'ndó i te ringiovanisse sensa far strologhessi stranbi.
"Se penso a quel che ò catà a casa al ritorno, no vao gnanca più a la Madona de la Corona da la matina a la sera" la me risponde àcida, rabià, come quando la gavéa el so vecio 'look'.
"Parché 'sa eto catà? Ghè stà i ladri?", ghe domando preucupà.
"Nò. Ghè stà me fiol! El gavéa el cònpito de passar da casa mia ogni sera dopo el laoro par controlar che ghe fusse tuto a posto e par darghe da ber a le piante. Prima de partir gavéa spiegà che el ghe desse un gossin de aqua a quele dentro ogni tri giorni e na bela resentada ogni dì a quele sul pontesel."
"E lu s'alo desmentegà?" insisto mi, che no son bona de capir cossa è sucesso.
"Pezo!" la me risponde ela, con la voce che ghe trema dal nervoso. "Pensa che l'à fato a la roersa: el ga dato da ber tute le sere secè de aqua a quele dentro e na làgrima, solo do olte ne na stimana a quele fora."
"Ben alà" la consolo mi, "par sta robeta qua..."
"Bela" la me risponde ela con du oci da mata, "vuto che te la diga tuta? El ga dà da ber anca a quele finte!"

[torna sopra]

Archivio

2022