Quatro Ciàcoe - Un pisnent fora s-ciapo - Marso 2007

Quatro Ciàcoe
Mensile de cultura e tradission vènete

de Dinerio

Sgiansi de sagessa antica

Un pisnent fora s-ciapo

La varda, siora, che la fa on afare!

- Barba, son qua. Sito stà in pensiero che no te me ga visto stamatina? Cossa vuto, co quel tràfico che te cati su le strade oncò, mòvarse de doménega vol dire che te sa co te parti ma no te sa co te torni. Infati rivo 'desso, ficon ficheto, da Porto Buffolè, na sinpàtica sitadina trevisana da le parte de Oderzo, de prestigiose orìgini, dove so' 'ndà co 'l me amigo Enzo che 'l sercava un canfin co la canpana de vero smerilià da picare sora la tola ne la so caseta in montagna. Semo 'ndài a scalumare fra le bancarele de un famoso mercatin de robe vece. Figùrate, barba, ghe n'avemo visti un fraco e de bei anca, ma i costava un ocio de la testa, siché no gavemo tolto gnente. Mi digo che sta zente va propio via co 'l cìrcolo! In conpenso però gavemo snasà na intabacada de insolense spinose, incastràe a maneta fra do piassaròi, de quei inprovisài da la manìa comune de tratare cianfrusalie rancuràe pa' i granari 'ndando in serca de corte in corte. Uno gavéa na destirà de atressi veci, feri da stiro, masenini da cafè, fòli, seradure, merlete, canbre, caéce e altri trapèi onti. Quelo de fianco, co na grèla sora na tola da lavare posà su do cavaleti, el faséa bela mostra de bocài, broche, piàdene, cógome, cicaroni e pignatossi de teracota, vasi e vasiti con de la roba spussolente drento. Esséndose messi propio tacài de postà, i gera drio questionare, sberegando come do scalmanài. Se go ben capìo l'astio dovéa èssare scopià si e no par un metro de marciapìe più 'vanti o più indrìo. Có ghe semo capitài davanti noaltri forse la question gera in bojo da un bel tòco e se gavéa za fato sù un bel bòssolo de curiosi.
"Co poc te vans - go sentìo da uno, - e co gnent te crep, altrochè! Ghe vol de i sarlatan come ti per vegnir a far negossio in piassa co trànse de maltèche smedoeàe che sa più da ponar che da vermuina." E st'altro zo de bruto: "Eh te 'a cali, Gnegno, pisnent da l'ostia, 'dess che t'è restà ti sol, in rota co la maràntega che t'è sparìa da sot i oci per cubiarse insem a un Dio scanpà, chi éla po' che te trae el vin de càndoea da la canèa infassada de canevin forest?"
Tirando la boca da na recia a l'altra: "Sarà bocàe senpre mie quele da inpenir e svodar" ga rebatùo l'altro. "Ti, Bepo, o t'à magnà le brochete del gramofano o t'è dis-ciolt dal tut! Mèjo èsser un pisnent e 'ver la bota piena in càneva pitost de 'ver per casa na bagassa inbriaghela che te inpeniss de corni 'fà quei ch'è t'un sestel de s-ciosi." "Tèndeghe, tèndeghe a la pujana che no la te vante i pitussi!" A sto punto d'urto, co tute ste freciade velenose, ghe mancava poco ch'i se metesse le man 'dosso, alora gavemo tajà de asso, scantonando a le svelte. No so spiegarte come la sia 'ndà a finire, ma de quel batibeco consà in gergo vilanoto, che no so' stà bon capire da dove che 'l vegnesse, forse da l'oltre Piave, me xe restà un gropo tel gargato. Go parà basso tuto el bàgolo che ne ga oferto la sinpàtica corida, foravìa quel "pisnent" che m'incuriosisse propio. Ti, barba, par caso sarìssito bon de darme na spiegassion? De cossa se trata?
- Cossa vuto, Lalo "I schei d'un vilan e i afari d'un can xe le robe che scorlando fa pi bacan." Xe fadiga tèndare do mostri del gènare che le petenèle ghe ga dà al sarvèlo!
Pa star drio a le to domanda, ghe vole solo un sìngano come mi, che co to nono gastaldo, gavemo stomegà l'ingiotaùro de sanpieri, samicheli e samartini co 'e nostre miserie senpre pareciàe su na careta pronta a 'ndar torzio da na provincia a l'altra. Valà, fiosso, métate chieto e scolta: chissà ca riessa tacarte na pèssa anca stavolta.
Quei bocaloni de sicuro no vegnéa fora da na costa d'un re. Par mi i gera do buti d'un ùgnolo talpon inraisài te la stessa tera. Forsi fra le colmegne de l'Alta Marca o come t'à pensà ti, fra i sgrèbani venessiani bagnài dal Basso Piave. A parte la stupida rason del so cagnarse inansi a tanta zente, quei cefi prepotenti se sentìa forti de palanche parché 'ndando in volta pa 'e piasse, uno co' i mosegoti de feri rùzeni e st'altro co 'e rèle de potaci o vaselame de misture stomegose, ga ciavà pi de calche ebeton che se ga lassà incantare. Sicuramente però i ga da 'ver levaùre sgalmarose, de quele da poricani, par rivare a l'ofesa del "pisnént" ca se ghe diséa co dispresso te i me tenpi duri, a un miseràbile inalfabeto che no gavéa propio gnente al mondo. Quela de i pisnenti gera na marùgola che rapresentava la grosta pi desperà de la canpagna vèneta fin te i ani del primoa Novessento.
Gera individui che possedéa solo i brassi, ciamài aposta bracianti, che par sbarcare el lunario gera costreti a ramengare da na tenuta a l'altra fin che i catava el massarioto che li toléa suso a òpara. De lori se la cavava mèjo parfin un boaro salarià. Sul Furlan, me ricordo che i li ciamava disòblighi, ossia ocupài come aventissi par lavori ocasionài, sensa òbligo de scritura. Longo la riviera de la Brenta e fin zo a rivare te la Padovana del Piovese i gera ciamài casonanti e sol Trevisan, 'torno Castelfranco e Conejan i gera considerài de i bisnénti, sarìa come dire de i pórassi do volte sensa gnente.
Manco ofensiva paréa invesse la nomèa de i repetini, tacà a serti furbastri da l'ongia merletà de nero che te le nostre borgade de la canpagna vèneta te ne catavi pareci. Quei gera de i sojeti che possedéa, se fa par dire, na stricheta de tera drio na canaleta o drio un stradon, spesso anca robà al fosso de confina o magari a on drissajo de censo demaniale, dove i se tirava sù na baracheta in pieruni de crèa cota al sole co do camarine strete da farghe stare strucàe te quela martingala, spesso rangiasù de sfroso. Repetin donca, ciapà in dolse, voléa anca dire inzegnin, bon da repetarse in tuto, squasi come sa fare i napoletan che i laóri stranbi i se li inventa.
- Altro che pèssa, barba! No go parole. Questo xe un bel tacon che me conferma le to conossense e le to pressiose esperiense de vita.

[torna sopra]

Archivio

2022