Ricorensa

Ventisinque ani insieme: 1983-2008
Vènare 15 febraro 2008, al Teatro Verdi de Padova, serata de Gran Gala, co la partecipassion de autorità, el teatro de Bruno Capovilla e tanta, tanta sinpatìa par sto nostro mensile che, non solo no l'inquina la mente, ma adiritura el svèntola nel mondo la bandiera de l'identità vèneta

Da destra, Emanuela Stefani, Vittorio Ingegneri e Mario Klein

La serata xe stà verta da Emanuela Stefani e dal Presidente de l'Editoriale Padova, Vittorio Ingegneri, che i ga ilustrà i motivi de sta manifestassion, le finalità de solidarietà - l'incasso de la serata xe 'ndà a favore de l'Istituto Oncologico Veneto -, ilustrando anca la pìcola ma inportante storia de sta rivista che se ga dimostrà in grado de salvare tanti, se non tuti, i valori che ghe xe drento al nostro dialeto veneto, oncò ciamà lingua. Valori cossì tanto aprezà a l'èstero, tra i Veneti nel Mondo, dove Quatro Ciàcoe riva grazie a la Regione Veneto: el lo ga dimostrà el diretore Mario Klein, lesendo quatro létere rivà da la Tanzania, dal Kenya, dal Brasile e da l'Equador. Sùbito dopo, ghe xe stà la consegna de na targa a personalità che, in un serto qual modo, ga conpagnà la créssita de sta "creatura": el dr. Egidio Pistore, Dirigente Assess. Flussi Migratori de la Region, el dr. Flavio Manzolini, Assess. provinciale a l'Identità Veneta, l'on. Settimo Gottardo, za sìndaco de Padova, la signora Ester Giaretta in sostitussion del sen. Paolo, anca lu za sìndaco de Padova, l'Assess. comunale a la Cultura Monica Balbinot per conto del sìndaco Zanonato e el prof. Pier Carlo Muzzio, Commissario Straordinario del I.O.V. Xe stà presente co na so létera de saludo, l'on. Giustina Destro (anca ela xe stà uno de i sìndaci de Padova).

Saludo finale de la conpagnia al conpleto.

La festa xe rivà in alto co la rèssita de Bruno Capovilla che, prima el ga fato un so profilo del "Sior Todero Brontolon" de Carlo Goldoni, e dopo i tri ati "esilaranti" de La Monaca di Padova. A fine spetàcolo, dopo la consegna de na targa al regista, atore e autore Capovilla, par ricordare i "ventisinque ani insieme" e la serata, xe stà dà a tuti i presenti la riprodussion de la prima copertina de Quatro Ciàcoe, in una incision del maestro Bruno Morato. Tuto questo, par dire che semo rivà fin qua, co la speranza de poder nare 'vanti!

[torna sopra]