| a cura de Romano Beltramini |
|
"La Sguaratà" - Ciàcoe adriote
Tenpo de diriti e tenpo de doveri
 |
| "Ma i me amici ga za el motorin..." |
"Speta, mama, ca gh'é rosso." "Ma dài, stupido, passa ca ne gh'é nissun"."
Al semaforo, lession de educassion stradale fornì, co senso del dovere, da na mama a so fiolo. Cla stessa mama che, magari el giorno dopo, l'é pronta a dirghe sù a le guardie del Comune perché le ghe fa la multa a na machina ca parchegia in posto sbalià. E la stessa mama lé anca quela ca ghe vansa de dirghe le sue a le mestre de scuola perché le ne ghe insegna abastansa a stare al mondo a chi pori putini ca gh'é capità in classe.
A sto punto vien fato de domandarse fin a che punto papà e mama fa la so parte nel conpito che el Signore ghe afida có el ghe manda un fiolo e el piato pianze de più s'a se vardemo intorno considerando serti risultati.
Ancuò i genitori vole più libertà per lori rispetando de manco la regola ca ghe dèta la so bona dose de sacrificio per tirar sù i fiòi. Na roda che, da generassion, inpegna noni, pari e fiòi in te na lista de regole e consegne che à fato girare la storia e che a tuti ghe domanda na parte de fogo per far buiere la pegnata. Serto no se domanda a un pare e a na mare de serarse in casa sensa dare un minimo de sfogo e de respiro al so vivere, ma va dito che la prima educassion de i fiòi speta a lori, né la toca al mestro, al prete o a altri. Prima papà e mama, dopo st'altri e co regole ben precise che le vole ca se diga anca qualche "no" quando i fiòi no se inpegna in tel studio e quando che i scominsia a robare el filo da la man co pretese de star fora casa, de sera, qualche ora de più e de 'ndare a petare el naso in te le discoteche.
Gh'é regole ben precise per lori, ancuò, come che le ghe gera per nantri, ieri. "Ma i me amici sta fora de più", "ma i me amici ga za el motorin", "ma i me amici..." Ma i so amici ga i so genitori ca decide quel che i vole e ogni casa ga le so regole sensa paura de tirar sù i fiòi asfitici, cesaroi o conplessà. Da resto el tenpo mostra i so risultati e la fameia, ancuò, lé in grossa soferensa, co division, separassion, pianti e lamenti.
Ma el Governo ghe pènsalo? Prima del Governo ghemo da pensarghe noialtri, ga da pensarghe papà e mama perché el primo dovere e i primi sacrifici speta a lori! La roda gira. In fondo l'é question de tenpo perché anca i fiòi cresse e, passà el momento de la tension giovanile, vegnarà quelo de la maturità solevando i genitori da serti pesi e dàndoghe, perché no, anca serte sodisfassion che le sarà el fruto de quelo che i avarà coltivà.
Animo, dunque, a le fameie! Regole precise sensa paura perché gh'é diriti e doveri per ogni età e per ogni tenpo. Sacrifici e sodisfassion da parte de tuti per menar avanti el caréto de la vita.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L'onbra de la dona
Ormai ghe semo: ritorna puntualmente la FESTA DE LA DONA, la data de l'8 marzo, na ricorenza che ga perso el so significato originale. Se domandemo, a sto punto: "Xela na festa par la Dona o par la so onbra?"
de Mario Klein
Ricorensa
Ventisinque ani insieme: 1983-2008
Vènare 15 febraro 2008, al Teatro Verdi de Padova, serata de Gran Gala, co la partecipassion de autorità, el teatro de Bruno Capovilla e tanta, tanta sinpatìa par sto nostro mensile che, non solo no l'inquina la mente, ma adiritura el svèntola nel mondo la bandiera de l'identità vèneta
de Mario Galdiolo
|
