|
Editoriale
E 'desso... tuti a scola?
No lo prevede el disegno de lege del ministro a l'Istruzion, Mariastella Gelmini, ma 'l ne pare necessario, visto che tanti genitori i difende senpre so fiòi, anca quando che i ghe ne conbina de grosse, metendo cossì a ri-scio l'educazion de i fiòi stessi
 |
| E có 'ndàvino casa... naltro bel sculason. A inparàvino sì! |
Intanto disemo subito che no xe vero che, parlando in generale, no ghe xe pi né la voja, né la passion, né la forza de educare i nostri tosi. No xe vero parché ghe xe oncora na magioranza de genitori cossienti e de insegnanti onesti e professionali che realiza pienamente el cònpito che ghe xe stà assegnà da la so condizion de genitori e de educatori. Però, ghe xe senpre el perìcolo che chela minoranza che inveze no fa el so dovere, la possa infetare, col tenpo, anca la parte sana.
Come càpita in tuti i canpi del "naturale": se no te ghe cavi le erbe mate da na conbina de salata che xe drio vegner sù, a te te cati co albioni e gramegna al posto de la verdura; se no te schici le rughe da le verze e i crauti, no te rivi mia a métarli in tecia có riva l'inverno.
Se no se ghe mete rimedio a l'infestamento de maleducazion e insolenza che xe presente nel mondo de i zóvani e altretanto de i adulti, ne tocarà darghe rason a chi dise che semo on pòpolo de maleducati.
Che la pegnata de le cative abitùdini la vaga ormai parsora, lo dimostra le ordinanze de autorità comunali che ga deciso de multare, par esenpio, i tosi che no ghe cede el posto a le persone anziane su autobus, treni e in sale d'aspeto. E qua finisse soto acusa ancora na volta i zóvani. Ma no xe giusto!
Chi xe che ghe ga insegnà le bone maniere de conportamento? A scola mia massa! A casa no se usa pi. I genitori no ga tenpo e i fiòi sì e nò che i li veda... E 'lora? Sistememo tuto co na multa? O sarà mèjo darghe na man a chi finalmente se xe inacorto che educare no vol dire inpongare de nozion, date stòriche, teoremi, sintassi, gramàtica e indotrinamenti laici soltanto, ma che tuta sta "materia de studio" la ga da passare da la bóta o da la damigiana del maestro, professore o genitore ai nostri tosi, traverso el perioto (o inpiria) de le bone maniere, che oncò vien ciamà "educazione civica".
Fin che so i quotidiani lezemo de polèmiche longhe senpre sul "presunto maltrattamento di minore", co tanto de denuncia ai carabinieri da parte de i genitori, e el licenziamento de la maestra, parché la ghe ga dà on sculazon a on toseto rabègolo, me sa che bisogna rimandare a scola anca tanti adulti. Xe mai possìbile che on genitore el reagissa con cativeria e violenza contro on educatore che ghe xe saltà i nervi davanti a sto fuin de toseto? La difesa a ogni costo del fiolo xe pi "diseducativa" del sculazon de la maestra.
Có jèrimo toseti noantri, al maestro, al prete o a la suora che ne gavéa dà on sculazon i nostri genitori i ghe diséa "grazie" e dopo, a casa, a ghin ciapàvino naltro.
Te 'l coartiere che stago mi, a Padova, on s-ciapeto de toseti de 13-14 ani on giorno i se xe inpazà co on anzianoto che 'l spetava l'autobus. Sto omo el ghe ga dito sù. I boce xe sparìi e poco dopo i xe tornà, faséndoghe on gaveton. L'omo ghe n'à ciapà uno e el ghe ga dà on bel scopazon. No 'l lo ghesse mai fato: xe rivà so pare del toseto, el ga ciamà i carabinieri e el lo ga denuncià par "maltrattamento di minore". La gente che ga visto e assistìo al fato, tuti i ga dito che bisognarìa avere denuncià el genitore che xe vegnù a difèndare so fiolo maleducato!
Dunque... no xe mai massa tardi: pìcoli o grandi, fiòi o genitori, bisogna che tornemo a scola de bone e bele maniere, se no volemo nare indrìo inveze che nare 'vanti!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
E 'desso... tuti a scola?
No lo prevede el disegno de lege del ministro a l'Istruzion, Mariastella Gelmini, ma 'l ne pare necessario, visto che tanti genitori i difende senpre so fiòi, anca quando che i ghe ne conbina de grosse, metendo cossì a ri-scio l'educazion de i fiòi stessi
de Mario Klein
|
