|
Dal Piovese (PD)
Luigi Bozzato
Un omo da no desmentegare
 |
| Luigi Bozzato |
Luigi Bozzato xe morto. Xe finìa, par éo, 'na vita intessùa de martirio e de soferense. 'Na vita però spesa tuta in te 'na mission che soeo on omo grando come éo podeva portare 'vanti fin a eà fine. Credo che eà storia de Bozzato sia ormai stranota a tantissima zente. Ma forse vae eà pena de riassùmarla in poche righe.
Nato in te 'na numerosa fameja de contadini in te 'l 1923, cressùo e inbevùo de eà propaganda fassista, el xe sta ciamà a miitare in te 'l 1942 e mandà in Jugoslavia. Eà el ga conbatù, el xe stà ferìo, el ga conossù eà soferensa de tanti zóvani massacrà da 'e ferite, el se ga reso conto de eà bestiaità de eà guera. E on poco a eà volta el ga scomissià a rajonare co eà so testa, el ga capìo coanto falsa fusse stàa eà propaganda fassista e coanto assurda fusse eà guera che 'l stava fazendo.
L'8 de setenbre 1943, come tanti soldà sbandà, el ga çercà de tornare casa. El ghe xe riussìo in do mesi. Ma 'na volta tornà a Ponteongo, i fassisti locài voéva mandarlo a conbàtare co i republichini de Salò. Ma éo no 'l jera pi fassista e costreto a scanpare, el se ga unìo ai so ex comiitoni che i jera deventà partijani e che i operava intorno a Tolmezzo. E anca éo xe deventà partijan. El so grupo xe sta tradìo, circondà da i nazifassisti e dopo 'ver conbatù fin che i gheva munission, i partijani ga çercà de scanpare. I xe stà caturà in 42 e portà in te eà preson de Udine. Qua, 27 xe stà inpicà imediatamente e 15 spedìi a Dachau.
Tra coésti ghe jera anca Bozzato.
A Dachau xe scomissià el so calvario: fame, sen, fredo, maeatìe, bote, torture, lavoro durissimo, sporcissia, pulzi, peoci. Chi che no ghe eà fazeva finiva in forno crematorio. No riussindo pi a stare in piè, Bozzato gheva tentà de scóndarse soto i muci de cadavari. Ma i eò ga trovà e par punission i ghe ga dà 50 frustàe. Mèzo morto el xe stà butà in te eà baraca de punission e dopo on çerto tenpo i eò ga caricà so nantro vagon e spedìo a Magdeburgo, on canpo de smistamento. Qua, lavoro pi lesièro e coalche pagnota in più che ghe passava on kapò poeaco, el se ga rimesso on poco in fòrse.
Ma dopo on poco de tenpo i eò ga mandà, senpre in caro bestiame, a Mauthausen. I eò ga messo a lavorare in te eà cava ai piè de 'l canpo e ghe xe tocà anca fare, come tanti altri poari desgrassià, eà scaea de eà morte. A on çerto punto i nazisti se ga incorto che no 'l stava pi in piè. E aeora, dopo 'verlo inpenìo de bòte e fato rodoeare nudo so eà neve, squasi privo de sensi, i eò ga butà davanti eà porta de eà càmara a gas. El se ga svejà davanti a 'l forno crematorio, pronto pa èssare bruzà. El ga 'vù eà forsa de trassinarse fin in te 'na stanseta, eà jera 'na càmara de tortura, indove che 'l ga trovà 'na diezena de cadàvari uncora vestìi. El se ga messo eà veste de uno de eòri e el xe tornà in te 'l canpo. Da chel momento Luigi Bozzato jera uficialmente morto. So i registri de Mauthausen xe scrito che 'l xe morto el 24 de dissenbre 1944. Dopo i eò ga mandà a Allach. Anca eà el xe stà torturà e inpenìo de bòte fin che el 5 de majo 1945 xe rivà i mericani e i eò ga libarà.
Coésta xe eà so storia de deportà. Ma 'na volta fora da 'l lager, jera lìbaro el so corpo, ma no eà so mente. El se ga portà drento de éo tuti coéi orori par tuta eà so vita. Ma no 'l ga voésto desmentegare. Ansi, par 35 ani el ga incontrà mejari de tosi de 'e scuoe de ogni órdene e grado, parché el voeva che se savesse cossa che xe stà fassismo e nazismo, cossa che xe sucesso in te i canpi de sterminio, coanto brutàe possa deventare el omo coando manca el rispeto pa eà dignità, coando se dispressa nantra rassa, coando se fonda el potere so eà vioensa e so 'l terore.
Per non dimenticare jera el so moto. Ma anca el rifiuto de 'l odio e de eà vendeta. Malgrado tuto coéo che 'l ga passà, el suo xe senpre stà on messajo d'amore.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
E 'desso... tuti a scola?
No lo prevede el disegno de lege del ministro a l'Istruzion, Mariastella Gelmini, ma 'l ne pare necessario, visto che tanti genitori i difende senpre so fiòi, anca quando che i ghe ne conbina de grosse, metendo cossì a ri-scio l'educazion de i fiòi stessi
de Mario Klein
|
