|
“La Sguaratà” – Ciàcole polesane
E ’ndemo dal dotore
 |
| Bona che el gheva da fare presto! |
“S’a ghe tira un pelo i é pronti a ’ndare dal dotore.” Sarà anca perché sti vecioti i ne sa dove ’ndare e, cussì, prima che el lumin el fassa ciaro sora a la pansa, l’é mèio fàrsene in conto e ’ndare dal dotore a cuntarghe dove ca ghé le magagne ca spinze la bua. Da resto, a dire el vero, stare in sala d’atesa l’é un gran gudiolo perché a s’in sente de tuti i colori. Bisogna, prima de tuto, desmentegarse l’orologio perché el tenpo passa e, có se riva in anbulatorio, se trova senpre na marèa de gente. Dizemo subito che el dotore vèrze a le 9 de matina e, fin a le nove e meza el fa rissete. Dopo el taca le visite. Ghé le rissete veloci e ghé quele... ca ne segna tenpo anca perché el dotore riceve telefonà co prenotassion e el tenpo passa. Riva le nove e meza: guài, anca s’a ti é l’ultimo de le rissete, a superare el minuto. Tuti bróntola, spece la vecia ca ne ga gninte da fare a casa, e a te te meti in coa in fondo a le visite. E, qua, scominsia el teatrin co i discorsi de veci e veciote e, ti, a te scolti in silensio perché l’é come éssere a na rapresentassion.
Cunta, la veciota che l’é verso i otanta: “Ogni sera a vago in leto a le oto e a speto mi marì che el vien in càmara a le ùndese e meza. Có ’l riva el dize che el n’à visto gninte a la teievision, perché el s’à indormensà!” Salta sù uno de i presenti: “Védela, signora, se la ghesse trent’ani de manco, el vegnarìa in leto anca lu a le oto.” Se ride. Na ruzeta, come de vrespa, averte che, quelo sentà vissin a ti, el ga la radieta co i auricolari e l’é drio scoltare musica per estraniarse da la conversassion e darse un tono de sapiensa...
“Òstrega – dize na sposeta – bisogna ca cora a canbiare el disco de la màchina sinò i me fa la multa. Me tegnìo el posto?” Ruzando se ghe dize de sì e la parte, solo che la vien sù dopo mez’ora e tuti ghe dize le sue. “Signora – dize un ragasso – a gera mèio che la canbiesse la màchina. La faseva prima!” La sposeta deventa rossa e la tase, broà come un can. “Mi digo – salta sù un vecioto – che quela ca ghé dentro dal dotore l’é drio fare testamento. L’à dito che la faseva presto e invesse... E sì che l’é pìcola de statura e la dovrìa cavàrsela presto!”
Entra un rapresentante de medissine ciamà "informatore medico". Ogni tre passienti a ghe toca a un rapresentante. Borbotìo de scontentessa perché, in te la matina, a ghe n’é vegnù nantri quatro e... el brodo se slunga. Da resto, anca lori deve lavorare. Ghé, po, la mare ca conpagna la fiola de sédese ani. “L’é grande ma la ga paura e a ghe vole ancora so mama che la ghe tegna sù la man” dize na dona. Salta sù la mare: “Ela la pensa ai fati sui che nissun ga domandà gninte.”
Sta per nàssere bordalo ma, el dotore, da dentro a 1’anbulatorio, el sente e l’alsa la voce: “Silensio, sinò a ’ndè a casa tuti.” E silensio riva per qualche minuto. Pare quasi de éssere in cesa. Po, pian pianin, ricominsia el bacan. “S’alo fato le vacinassion lu, siore?” i ghe domanda a un vecioto. “Mi nò, tanto, s’a go da crepare a crepo istesso, sensa che i me sbusa da tute le parte.” Ghé, sul tavolin, na serie de riviste per passare el tenpo. In mezo a ghé i folieti co le racomandassion de l’ASL. "Vuoi smettere di fumare?" e i dà consili. Ghé un omo ca lo leze e, po, el fa el so comento: “De rabia, a fumo. A ne go gnanca i schei per conprarme da magnare perché i m’à lassà a casa dal lavoro. Cossa vorli ca me conpra le sigarete. Per forsa, a smeto, perché la cura i me l’à za fata!” Se taze e se conpianze. Riva na bela ragassa: l’é na informatrice. Mormorìo de disaprovassion. “Nantra ca riva!” Ela se scusa e, come el so colega de prima, bisogna cla lavora . Riva, intanto, el to turno. É passà do ore e meza per na risseta... Almanco fùssela na risseta de dolsi e, invesse... Te va dentro dal dotore. Sona el telefono. “Signora, quanto galo de freva? La ghe faga tore ste pastilie e, s’a riesso, verso sera a vegno a vederlo.” El taca a scrìvere ma riva nantra telefonà. “Galo za le mace rosse in te la pansa? Va ben, va ben, a vegnarò a vederlo.”
“Vito – el dize el dotore – altro che medico. A so’ deventà un inpiegato ca scrive rissete e un viagiatore ca va a trovare i clienti a casa, gnanca ca ghe portesse la benedission de Pasqua...”
Có vegno fora salta sù na vecia: “Siore, bona che el gheva da fare presto!” Ghe tazo e saludo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Guài scandalizarse de i scàndali!
Guài maravejarse de i erori d’i altri, parché vorìa dire giudicare. Questo però no signìfica giustificare, passarghe sora come gnente fusse: vol dire non far deventare pi grando el “male”, magari ricordàndose de la pajeta e de la trave…
de Mario Klein
Da Verona
Poca colaborassion
de Giacinta Dall’Ora
|
