|
Sgiansi de sagessa antica
Ale a i fetoni
 | | Na gran leca angolà ga segna l’uno a zero par lori! |
– Vedìo, crestiani, come che xe ciapà sto pòro panpe par via de le so ganbe salèche? Fin da pipio in età da inboconare a piva so’ sta na spìsima pa’ i mii de mi, ansi vorìa dire na spina ai fianchi. ’Vanti lassar el gnaro no so’ mai stà bon dar ale ai me penini. Invesse lori de casa no ghe voléa crédare che fusse maltapà de nervo da no èssare bon de règiarme da solo su i me posi. In spasseso i me piè paréa fati de puìna, i baonava par cunto suo e mi sbrissavo zo fin a le lasène, sostegnù dal sercio del cariolo co’ tuto el peso del me corpesin, sensa riessire a fare un passo. Lassè che me desbroca co’ voaltri che me parì de le persone par ben, de quele che capisse le desgrassie de i altri. E po’ s’a si qua drento te sto purgatorio, vol dire che gavì anche voaltri i vostri stramassi da despetolare. Penseve,’desso che so’ bon rangiarme da par mi, sensa farme jutare da me mare o da me pare che ultimamente i me vegnéa drio a son de rusuni e brontoluni, vegno sù da Candiana indrio-vanti a tirondelo fin Padova da mimi solo su sta carossina, par fortuna da calche ano motorizà, al marti matina e al vènare dopodisnà. Un colpo me varda el neurologo, martelàndome el sarvelo co’ le so domande che par mi le vale n’aca straca e un colpo me spalpugna i legnassi el fisiatra ’sistìo dal massajin che ’l me tedia co’ le so stìrole de sfreghe. So’ convinto che sti specialisti i s’intenda solo fra de lori, i comenta le lastre, i sbircia le carte che i ga in man, i parla de farme na “ippoterapia”, calche volta i pensa de mandarme soto i feri. No capisso più gnente da sta mastegansa, parché “de professoroni ogni sentanaro ghe n’è solo do de boni.” Che i gai catà tuti do mi? No credo propio... me pare che no i sapia cossa fare gnanca lori; a mi i me dise solo: “Va tuto ben. Ciao, Gelindo, se vedemo al prossimo turno.” Ghe ne go do bisti mi catarme qua intrigà par ore te sto tugurio, do volte a la stimana, fra sti passienti spassientìi, ’fà mi e pi de mi, che cunta tute le sequele de i so torminti. No pensè che sia na frìtola. Forse me darì rason s’a ve digo che anche a scola ’lementare so’ stà un scolareto chieto, ma me catavo isolà da tuti. Insoma dovì capire che gero un toseto diverso da i me conpagni. Lori i me vardava de sbiego có gero ciamà a la lavagna e mi, che no gero stupido, capivo che i se conportava cussì par via de la me falansa fisica e questo me ponzeva el cuore. Le tose a le medie po’ me scansava dal tuto; solo una, la più brutina, se degnava vardarme co l’oceto smalissià e no so’ mai stà bon capire se la lo faséa par sinpatìa o par conpassion. Però fra titubanse, insertesse e tanti momò sensa tòrmela a pèto ghe xe la me vita, la roba più cara che go. Có fasévimo l’ora de ginastica in palestra o tel canpeto in cortile dadrìo, me garìa piasso assè zogare anche mi na partieta a balon, ma el professore me diséa: “Nò, Gelindeto mio, ti no te poi.” E alora mandavo zo boconi amari come el tòrsego, cossì potenti che ’ncora ’desso m’insende el palà. Eh za, gero diverso, parola grossa che a tanti fa fastidio e paura. Par mi la xe na sentensa malspuà tel muso, che no s’inpata puìto in recia de chi te t’inbati par caso e difissilmente la vien acetà e interpretà pa ’l verso giusto. El fato sbrusa maledetamente ai descomodi che, come mi, no pole èssare considerà normali e uguali ai altri. Epure drento de mi no me so’ mai sentìo un bocia difarente da altri, me so’ senpre considerà uno de tanti del me s-ciapo, né balengo né balosso. Forse xe vero, mi me cato mèjo da solo, anche ’desso che no so’ più un putelo in vareso; ansi le me ore più bele de tuta na giornada xe quele dopo sena che passo davanti al conpiuter a cincionare co ’l me videozogo. Me piase cossì tanto zogare a balon che go convinto me mare a menarme t’un botegon de gènari sportivi par cronparme un paro de scarpe co’ i tacheti, fasendo parfin maravejare la comessa che stentava a crédare che le fusse par mi, vedéndome condanà in carossina. Insoma mi, anche sentà sul divano, me fasso de chele partìe fra Juve-Milan, Juve-Inter o Juve-Roma che vago in leto stralunà se putacaso no so’ stà bon far vìnsare i me begnamini bianconeri. Però de le volte xe anche colpa de l’albitro che ’l me fis-cia contro serti fali inventài o pèso ’ncora el me svèntola soto el naso el cartelin zalo co n’aria strafotente che ’l me fa ’ndare fora da i gàngari e magari sigare: “Albitro beco... cornuto!” Na sera passà che no xe tanto, go incontrà el Mancester, in semifinale de Copa de i Canpioni che ’desso i la ciama Cenpionlighe. Co’ i me conpagni so’ entrà in canpo cargo de morbin e a nervi tirà come le corde d’un violin. Zogando in casa, tribune e scalinade gera stracolme de tifosi nostri che faséa un bacan del diàvolo e in chela ocasion me so’ incaponìo de vìnsare a ogni costo... Da la curva de i foresti, che secondo i comentadori no gera rivà in tanti dal de là de la Mànega, se levava solo fis-ci. El me vispo mister ’vanti entrare in canpo, ciapàndome a brassocolo par incorajarme, se gera racomandà co’ mi, rolà a difensore de fassa sanca, de dare ale ai fetoni e de no pèrdare mai de vista el me aversario direto da marcare a omo streto e casomai de darghe calche peadon te i schinchi pur de no farlo rivare in area co’ la bala ai piè. Mi co’ i me scarpini novi me sentìa come n’aquila in volo libarà dal me castigo. Credìme, a go sfodrà pareci contrasti duri e na filza de schivanele inbriaghine che paréa un bissinelo. El pùblico no credéa ai so oci e batéa le man a le me serade da saltarelo a tripla mandà che, da sanca, garantìa na sicuressa ùgnola a la nostra porta. El me boresso sparsorava par tuti i cantoni e no falavo un contrasto. Verso la metà del secondo tenpo l’albitro, sto càncaro, ga fis-cià un falo da rigore in area, causà dal nostro difensore mezan che ’l ga blocà ’n atacante co’ un tiron de maja. Me so’ sentìo crolare el mondo in testa. Na gran leca angolà, raso tera ga segna l’uno a zero par lori. Da la banchina go sentùo na vosse: “Forsa, tosi, gnente de grave! Dài, Gelindo, svéjate, ghe xe ’ncora altri venti menuti da zogare e pol sucédare de tuto...” Quela vosse “dài svéjate”, insisteva, me rivava in recia senpre più dolse, più morbia; gera quela de me mare che m’invitava a nare in leto, essendo za mezanote gajarda. Verzendo i oci prima inmagonà e po’ rassegnà, me so’ reso conto de ’ver fato un bramoso sogno. Crestiani, scusè el me sfogo.
– Gheto sentìo, barba, che storia dolorosa? Quel pòro desgrassià, lu no lo ga dito, ma penso che ’l ga da èssare nato co’ la spina “bifida” e no ghe xe speranse che ’l staga in piè da solo. Védito, de sventure ghe ne xe per tuti. E ti te te lamenti per la to siatica...
– Va’ farte ciavare, fiosso! Ognun sente i so nervi ca ghe dole. Có te rivarà anca ti a la me età, de sicuro calche carolo te farà tirar la boca.
– Sta’ tranquilo, barba, no gavevo nessuna intension de ofèndarte.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Bisogno de silenzio
Anca se ghemo passà qualche giorno o qualche setimana de vacanza al lago, al mare o ai monti, ma anca a ramocia tra i muri de casa nostra, sentimo, drento, el bisogno de on calcossa che forse ne xe mancà e che oncora ne manca: el silenzio!
de Mario Klein
Memoria euganea
Quando se ’ndava a botega
Quando se ’ndava a botega… ogni botega gheva el so nome.
de Pietro Gattolin
Da la Marca
L’àngelo de i “quatro-sate”
de Emanuele Bellò
Dal Basso Piave (VE)
R a c c o n t i
La Storia del Novecento vista dai “Giovani” degli anni ’20
de Guido De Nobili
|
