|
Da Isola Vicentina (VI)
Personaji de na volta
 | | Dopo tanta gloria, vardè come la xe messa ’desso la vecia ostaria “Al Castelaro” de Lina Poi. |
Quando ’l ciaror de ’a matina ’ncolorìa l’aurora, anca Nane Bonato, trasendo pararia le cuerte, se alsava e, sfregolàndose le taraine da i oci, el diséa: “Ma sì, ma nò, ma sì, anca oncò me toca mi.”
Lu el diséa de èssare filòsofo, na spece de santone, on predicatore de pace, amico de tuti, on vero fradèo par vocassion, soratuto dopo ’ver trincà chel vinelo “bon come el rosolio”!
Dopo ’ver sistemà a la manco pezo le so esigense, co ’l piato in man da ’a gradèa el toléa tre fete de salado e altre tre slorde de polenta brustolà e, co tuta sta bona roba, el naséa in càneva.
Sentà davanti al vesolo, el s’inpienava na grèpana de vin che ’l parava zo pianelo fin l’ultima giossa fra na sdentegà de poénta e una de salado.
Nane Bonato de mestiere el faséa ’l mediatore, cossì chéa matina, come tante altre, el ga ciapà la strada bianca che lo gavarìa portà in Toresele, regno incontrastà de i so afari. Caressà da on tèpido ventesèo de primavera, sto omo ripetéa: “Chi che ga inventà ’l vin, se no ’l xe in Paradiso, el ghe sta vissin.”
Xe par coesto che, sentindo sta storia, el se ga tanto maravejà.
Tri amissi, dopo ’ver guernà le bestie in stala, i se ga catà par nare a magasin so na fameja de Valugana.
L’atmosfera de gioia che se arfiava so sti posti jera calcossa de màgico, tanto che paréa de èssare sora na nùvoa, in special modo dopo ’ver mandà zo du, tri goti de chel frànbuo maurà in coste al sole so chée splèndide coline. Dopo ’ver magnà e bevù a sassietà, i tri compari se ga messi cantare insieme a le altre conpagnìe.
Pianèo le onbrìe de ’a sera ga fato vegner note e belo xe stà che, pagà ’l conto, du ghe la ga fata alsarse, el terso no. Ciapàndolo uno par brasso, i du ga pensà de strassinàrseo casa co luri. La sorpresa xe che, có i xe rivà casa, i se ga inacorti che fra ’e man i ghéa solo la jacheta... Có xe stà finìa la storia, Nane Bonato tuto ’nrabià xe sbotà dire: “Sangue del me sangue te si, caro vin; no tradirme mai, ti.”
Purtropo però, e no jera passà che poche stimane da sto fato, sarà stà che in chéi dì i afari no i gera 'ndà serto ben, opure parché so ’l magasin de Isola no ’l gavéa catà la so conpagnìa, Nane, par vìnsare la malinconìa, el se ga messo bévare anca par i so amissi.
Sentà so ’n canton de ’a stansa, davanti na botilia ormai guja, el ga sentìo ’n forte bisogno de spàndare aqua.
El savéa che in fondo l’orto ghe jera l’ocorente, ormai tuto ’torno el scuro cuerzéa ogni roba, cossì, có ’l xe rivà a tri passi dal pajaro el se ga intrabucà, finindo, dopo ’n zolo, rento el buso ’ndove ’e galine naséa far l’ovo. La matina, beatamente indormensà, lo ghéa catà ’l paron del magasin che, sentindo ’n forte ronchesare, el gera ’ndà védare parfin rento el staloto.
Do, tre volte l’ano, Nane Bonato ghe piaséa magnare on rosto de poénta onta e osèi. ’Lora, sete oto de ’a so conpagnìa i xe ’ndà a Toresele da la Lina Foi, so l’ostarìa Al Castelaro, a ordinarlo. Chéa doménega, al sonar de vintionora, sto s'ciapo de amissi i xe partìi a pìe, contenti. Te po' mainàrte che gola seca che i gavéa có i xe rivà a l’ostarìa...
Dopo ’ver bevù tre bosse de chel rosso nostran insieme al tìngolo, i se ga messi cantare de bòta, che gera ’n piassere scoltarli.
El bèo xe stà che, có xe rivà ’l rosto, el siénsio jera roto solo da ’e prèdiche de Nane Bonato, ma i lo ga fermà pa’ fare on brindisi al cogo, par chel tanto bon che ’l ghéa cusinà.
Infogà da tuta sta ’bondansa, la festa xe ’ndà ’vanti fin a note fonda.
Caminando de pressa, so chéa strada malmessa del tornare verso casa, pi de calchedun naséa de anda. Solo Nane Bonato, colpa el so predicare, el se ga ciapà da so posta cossì, có so ’n rapeton el xe finìo rento el fosso de ’a strada, nessun ga podesto jutarlo. Al primo ciaror del dì i lo ga catà co ’a pansa al vento, oci verti e boca spalancà, come che ’l fusse drìo contàrghea a le stele. Uno de i so amissi el ga dito: “Despiase, parché ’l gera ’n bonomo”; ’n antro ga continuà: “Có se nasse semo tuti bèi, có se se marida tuti siùri e có se more... tuti boni.”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
No ne resta che vardare in sù
Xe un tòco che vardemo basso, parché ne pare che ne manca la tera soto i piè. L’alternativa xe quela de provare a alzare i oci al zielo e sperare che on filo de luce, on lanpo, na sita, on s-ciantiso el ne ilùmina la strada da ciapare
de Mario Klein
Da Verona
Un indorador gran brao
de Giacinta Dall’Ora
|
