Storia, in triestin

Mayerling, 125 ani dopo

La principessa Stefania del Belgio e l’arciduca Rodolfo d’Asburgo, erede al trono, prossimi al matrimonio.

El 30 genaro 1889 xe morto el principe ereditario Rodolfo d’Asburgo, e la sua sparizion xe el primo anuncio de la fine de l’Impero austro-ungarinco. Se copava in sto modo, no solo l’erede de l’Impero, ma anche l’Impero stesso.
No jera solo el suicidio del principe Rodolfo, ma quel de la Monarchia… Co la morte de uno, mori anca la dinastia.
Co el fato de Mayerling xe ciaro che tute quele nazionalità diverse no le podeva star insieme in un solo impero.
Par che Rodolfo impersoni al maschile i carateri de su mama: un tenperamento pien de fantasia, una personalità instabile ne i so slanci e ne i su abandoni con un fondo anticlericale e anticonformista. Quando el se sposa co Stefania… ghe piaserìa aver de i fiòi, ma sicome no i vien el continua le so aventure. L’ultima, la contessa Maria Vetzera inpizza la sintila finale.

La baronessina Mary Vetsera.

L’imperator Francesco Giuseppe el xe distruto de dentro ma el zerca de tegnir i pie par tera e el guarda a le robe da far: quel castel de Mayerling doverà diventar un logo de preghiera, un convento carmelitano, indove, forsi, se sconderà l’amore tereno e romantico che supera quelo de l’impero civile.
La tragedia de Mayerling resta e resterà senpre un mistero; se trata de un dopio suicidio o de un omicidio-suicidio, ma el resta el sìnbolo de l’amore romantico. Gnanca la létera che el ghe scrivi a la mama Sissi ne dà l’esata spiegazion de sto delito “… Muoio con lei ma non per lei” e cussì no se sa proprio gnente: el come, el perché. Solo dopo el turbamento che porta sta notizia, se poderà ragionar su le conseguenze vizine o future che ’l farà nàsser.

El Castelo de Mayerling, nel bosco vienese.

Rudi el jera un bon vienese, ghe piaseva béver Riesling in te le osterìe de periferìa, ma no ghe dispiaceva i bali e el lusso de Corte e el fasto de l’Opera. El jera senpre in contrasto co se stesso; la su fine xe stada un dolor de cuor per i vienesi che i sentiva che el jera un principe infelice e i prevedeva le dificoltà de l’eredità de la dinastia. Fra i tormenti romantici mancava un obietivo che andassi oltre a sti spasimi per regolar la vita de l’omo e de l’erede al trono. La tragedia de Mayerling toca sopratuto el primo aspeto, che diventa quasi un mito, che xe la causa de la disfata politica. El principe ga vissudo in t’una cità che più romantica de cussì no se pol dar, e se la su morte al momento jera un mistero, tale el resta dopo 125 ani.

* Notizie storiche da Mayerling. Il mito de Romana de Carli Szabados (Lint Editoriale, 2006).

[torna sopra]