| de Giovanni Rocco Mastella |
|
Da Legnago (VR)
Primavera
 | | I buteleti, al dopodisnà, i scominziava a farse la olanda e farla zolare… |
Prima del vèrzarse de la stagion in t’i canpi se bruscava le vegne e le se tirava ligàndole con i stropèi. I primi pànpani i èra ciapà d’assalto da le zurle che iè rosegava: alora partèa la razion de verderame e de sòlfaro par farle crepare. I buteleti, al dopodisnà, i scominziava a nare par i canpi, zercare i primi gnari de useleti e còrare su l’erba fresca, rispetando el dito “a marzo ogni mato va descalzo”, a farse la olanda e farla zolare, corendo contro a la prima bavesela intiepidìa dal sole. I òmeni i vangava l’orto par somenare e piantare le verdure, tanto care par la tola de i poareti (che i èra tanti assè).
In te sta stagion ghe scade la festa de Pascoa e la setimana prima le done i èra inbroià co le pulizìe generali de la casa: le lavava i veri, le scarpiava (tirava ia le scarpìe, le telarine), le lavava i pavimenti de cimento o de quarèi, broàndoli co l’acoa e zèndare, le canbiava i leti, le fasèa la lissia, le resentava i nizzòi in t’i fossi co l’acoa che vegnèa da le fontane, bela lìnpida, co l’asse da lavare longa. I òmeni i tirava le soghe su la banca de l’argine de l’Adese par destèndarli a sugare al sole, sventolàndose co l’arieta.
Dopo le infumentade invernali i camini ièra tuti intocolà de calùzene. Alora i òmeni i fasèa na fassineta de cai de vegna e, uno sul coèrto e ’n altro sul fogolaro, i gratava la cana del camin e la capa (che l’èra granda coasi come el fogolaro), tiràndola sù e zo par raspare via la grosta mora. A la fine l’omo de soto el parèa on african. Dopo i ghe dasèa na man de bianco-calzina a la cusina.
Par el Sabo Santo i buteleti i se incaparava da le fameie la cadena del camin par fregarla da la calùzene. I se le tacava co on filo de fero a la panza come na zèngia e i la strissiava par le strade ingiarà. In conpenso, dopo on par de orete de caminare e trotare, i ciapava on oveto de galina, che i cosèa al Luni de Pascoa, coloràndolo co le ortighe o carta colorata.
El mezodì de Pascoa el gavèa na tola inasià da festa granda: el brodo bon del capòn e le tadiadele con i figadini. I buteleti, prima de sentarse a tola, descondòn, i metèa la leterina soto el piato del Bopà con scrito i auguri e tante promesse de far pulito: par riconpensa i ciapava na bela mancia.
Intanto rivava magio, el mese del Rosario, dito davanti al Capitelo. Se se catava anca par far coatro ciàcole par strada, missiàndole a coele de meiari de rane e de grili. A la fine del mese ghe scadèa la processiòn col Prete, tra do file de lumini, fati co i sgussi de i bogòni con el stupin de spago che ’l pociava in te na gozza de petrolio, messi longo la strada fin a casa mia, la prima de la Contrà. Finìo, ghèra on po’ de festa con pan biscoto e on goto de vin, de solito in casa da i Cherubin.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cara dona, te vojo ben…
Bisogna dimostrarlo co i fati, ma qualche volta, sto dono de Dio, la se contentarìa de sentirselo dire a parole. Soratuto quando la vèrze i oci e a la fine de na giornata de fadighe; sicuramente prima e dopo de l’8 de marzo!
de Mario Klein
Da Vicenza
Fernando Bandini
el Poeta (1931-2013)
de Ines Scarparolo
Par la Festa de la dona
Na dona de i nostri giorni
Visto che l’è el mese che forsi ghè un poca de pi atenzion par la dona, decidemo de incontrare na dona zóena, specialista de fotografia
de Lucia Beltrame Menini
|
