Da Venezia

“Scultura esterna a Venezia”

Pìcoe sculture, piere de arte tacàe su i muri…

’A Libreria Editrice Filippi de Venessia ’a ga più de sento ani de vita, e ’e so publicassion ’e trata de storia, architettura, teatro, fotografia e tanto altro ancora che riguarda ’a cità Serenissima. No ghe ze studioso o apassionà che no ’a conosse.
Mi ’a frequento da quando che gavevo trèdese ani e tanta voja de saver el magior nùmaro de robe de ’a me cità. A chei tenpi no ghe gera altro de inportante che parlasse de el passà storico de Venessia, a cominciar da i libri de scuoea e da i professori de ’e medie. Poder conprar un libro da eori el gera un orgolio e el me faseva sentir inportante, e anca più sicuro parché cussì podevo za controbàtar chi che sputanava ’a me cità o i me ’a contava come che i voeva eori.
Dopo tanto tenpo go pensà che i gera d ei pori grami, invidiosi de tanta beessa, storia, arte. Cussì “Filippi” el me ga conpagnà fin ’desso e proprio in sti giorni na persona a mi tanto cara ’a me ga regaeà ’a ristanpa agiornada de “Scultura esterna a Venezia” de Alberto Rizzi, un libro tanto beo, quanto pressioso.
Un libro de 852 pagine, dove pìcoe sculture, piere de arte, segni de marmo tacài su i muri, so ’e coeone, i cornisoni ’e ze cataeogàe par fàrnee conóssar e par far sì che no ’e continua a èssar robàe o vendùe come xe stà par tanto tenpo. Par far anca che se se acorzemo de ’a sparission de qualcheduna, podendo subito denunciar ’a sconparsa e sperar che ’e vègna ritrovàe insieme a i ladri de storia.
L’intaresse par sti segni antichi el xe unico, parché in nessun altro posto al mondo ghe ne ze ancora cussì tante in giro par ’na cità.
Sti stemi de fameje nòbii, figure de confraternite, pàtere, crosi, fregi veneto-bizantini, statuete, bassorilievi, i ze parte de un anbiente unico che da ’e fondamenta, a i rii, a i canpi, pissine, corti pùbliche e private, i basa Venessia in un unico corpo, tanto da rènderlo a volte parfin inpensàbie che el possa apartegner a un logo de ’a Tera.
Ste òpare ’e se trova da i paeassi più fastosi, a ’e case più puarete, rendendo come na giustissia a tuti i abitanti antichi e atuài. Sta seconda edission de el libro, dopo trenta ani da ’a prima, ’a ga aumentà el numero de i rilievi, conprendéndoi oramai tuti, rendendo verta ’a letura anca “esoterica” che sti sìnboi i rapresenta.
Se voemo dir ancora, dirìa che chi no ga oci par védar na montagna, continuarà a no védar gnente, ma par chi xe bon védar, sto libro el ze un mondo artistico, storico, magico che no ’l finirà mai e ’assarlo a chi che ghe sarà dopo de nialtri el sarà naltro segno che el se zontarà a ’e sculture “erranti”, che ’a zente atenta del mondo, e nialtri venessiani in particoeare gavemo visto e ’èto fin da dove che sti segni i ga ’vùo origine e cioè dal tenpo che se ga formà ogni marmo e argila.

[torna sopra]