Da la Bassa Padovana

“Vaca Roma!”

El toro el se ciamava Asso, fiolo de Furio e de Ariana e el jera nato a Forlì, de razza romagnola insoma.

El versoro el lo guidava Ciro, el boaro, deto “el maestro” parché el jera analfabeta.

“Vaca Roma!” el diséa me papà, coando che la so vaca preferìa inveze de girare a man in cavezagna la se fermava a torse na sboconà de erba fresca.
Tute le bestie da laoro le gavéa el nome! No come ’desso che a le vache e a i vedèi i ghe taca un nùmaro de lata in te na recia e a i cani el microchip! Tra on poco i ghe lo metarà anca a i toseti che nasse, cossì i savarà tuto de la so vita e coando che i passarà davanti al “scanner” de i ufici pùblici, par farse la carta d’identità, vegnarà fora na voze che la ghe dirà: “Varda ca non te ghè mia pagà el canone de la television! O la Tasi!”
El nome de le vache el jera scrito in te na tabela de legno, tacà in stala de sora a la “posta” de ogni vaca, che de solito le jera in copia, senpre una “a man”, insoma a sinistra, e l’altra “a fora”, e anca so ’l laoro le naséa in copia cossì. Coela che jera tacà a la “caveza” la jera coela “a man”, parché el paradore e le vache non le dovéa pestare la tera arà, parché el versoro butava la tera “a fora”. ’Desso ghe xe i versori voltarece, ma na volta nò.
El toro, oltre che el nome el gavéa scrito anca i nomi de i genitori; da noantri, in corte a le Grompe de Urbana, el toro el se ciamava Asso, fiolo de Furio e de Ariana e el jera nato a Forlì, de razza romagnola insoma. A gavìvino la “Stazion de Monta Taurina”, con tanto de tabela tacà in tel porton in strada. Ogni tanto a rivava, conpagnà dal so paron, coalche vacheta, magra inpicà ca se ghe contava le coste e su i ossi dedrìo se podéa tacarghe la jacheta. I le menava de drio a la barchessa indó che ghe jera on posto proibìo par noantri toseti. Subito dopo me zio e el boaro i portava in te chel posto Asso, tegnéndolo ligà par i corni, par el colo e par el recin in tel naso, par paura che ’l scapesse. Cossa che ’l fesse sto toro da 11 quintài con ste vachete, noantri toseti non podéino saere, ma me ricordo che dopo le naséa a casa tute sgalonpà. So la boleta che ghe vegnéa dà al paron de la vaca a jera scrito: “Coperta da Asso” e la data. Quando che i ga inventà la fecondazion artificiale i ga scomizià a scrìvare: “Coperta dal dottor…” col nome del veterinario! No jera la stessa roba, solo che i dovéa finire le bolete!
In stala, in copia con la Roma ghe jera naturalmente l’Italia, de fianco ghe jera l’Africa e l’America e pi in là l’Asia e l’Australia e via de sto passo. Coando che i naséa a arare con le vache, i toléa coele che non jera in late, parché i partìa de matina presto, i arava tre ore, po’ i faséa marenda e intanto le vache le magnava l’erba in te la cavezagna, po’ i riprendéa el laoro par altre tre ore, fin poco dopo le óndase, par portarle in stala a ponsarse. Al dopodisnà non se arava e i òmani i faséa altri laori, senpre de tre ore in tre ore, con la marenda in mezo, come le ore canoniche de San Benedeto. A la marenda de la matina ghe jera polenta brustolà con renga, o sardelon, o salado, melanzane frite e on goto o du de acoa e vin, al dopodisnà la marenda i la faséa con coelo che jera vanzà dal mezogiorno: minestron, gnochi con la ueta e zùcaro, zuca cota, patate mericane.
Anca le vache le vegnéa vece e alora i le sostituìa con coele zóvane, slevando de le vedele nate in stala. Par bituarle a stare in copia, unìe dal doelo, i le tacava al caro con le roe de drio blocà da on palo inpirà tra i razi e i le faséa nare sù e zo par la cavezagna fin che ghe passava el morbin!
I arava con coatro vache e me papà el tegnéa a caveza la Roma che, atraverso el doelo, la guidava Italia e insieme le faséa strada a Africa e America o a Asia e Australia. Forsi a me papà a ghe paréa da guidare el mondo cussì, anca se ogni tanto el ghe diséa: “Toh e toh! Vaca Roma!”, coando che la se fermava in cavezagna par tentare de magnare na sboconà de erba fresca, anca se la gavéa el musarolo. Se ’l vegnesse al mondo ’desso, chissà cossa che ’l dirìa che Roma non la se contenta pi de magnare solo l’erba fresca!! Forse bisognarìa métarghe el musarolo, ma grande che mai!!
El versoro el lo guidava Ciro, el boaro, deto “el maestro” parché el jera analfabeta, e coando che ghe scapava de grosso no ’l fermava mia la “boaria”, ma in te on àtimo el molava i “maoni” del versoro, el calava le braghe fin che ’l se cuciava, el faséa coel che ’l ghea da fare, par indrizarse e tirarse sù le braghe e fare du salti par ciapare da novo el versoro. Al giro dopo vegnéa coerto tuto!

[torna sopra]