Da Adria (RO)

La Diana

I clienti abituali i continuava la so brìscola…

Al canale, a resentare, no la jera da manco de nessun’altra, ansi forse più svelta.

La Diana la staseva inte una de le ultime case in fondo a la stradela. In fameja la jera ela, so fradelo Davide, so sorela Nilde e so mama Cesira. De so pare no s’à mai savesto gran che: se ’l ghe sia stà, se ’l jera in giro pa ’l mondo, se ’l jera morto. La jera zente ch’a staseva un tantinelo par conto suo e pur no essendo d’i musoni, no i dava tanta cunfidensa gnanca a i vissini de porta. Par sto secondo motivo e par la difarensa d’età, no me ne so’ mai intaressà più de tanto d’i fati sui.
Se tratava dunque de na fameja bastansa normale, dato che in Borgo spesso par na porta i ’ndava dentro in siè, sete, oto e anca diese persone tra grandi, pìculi, veci e zóvani, fémene e mas-ci. D’i fradèi, ela la jera la più vecia, vegneva drio la Nilde e par ultimo Davide. La lavorava al canapificio, un lavoro duro, che lo faseva in tante come ela. I òmeni i jera pochi in fàbrica e per lo più adeti a i lavori de fadiga. A la sera, có se smontava, fora dal porton del stabilimento el pareva un furmigaro, tuti a tòrse la so bicicleta e po’, de là dal porton, ognuno ciapava la strada de casa sua.
Anch’ela, montà inte la so bicicleta, na bicicletona da omo che a ela la ghe ’ndaseva benon, parchè la jera un tòco de marcantonia che co ’n sberlon la te rovessava inte ’l fosso, l’inbrocava la strada del ponte ma, rivà a l’ostarìa da la “Gigia” la smontava, la pontelava la bicicleta arente a la porta e, ’pena tacà al bancon, l’ordinava n’onbra de bianco. I clienti abituali che jera sentà a i tavulini i ne ghe faseva caso più de tanto. I ghe diseva solo: “Ciao, Diana” e po’ i continuava la so brìscola, el so tresete o le so ciàcole. S’a capitava, dal caso, qualche cliente foresto, el la vardava come na bestia rara, dato che a chi tenpi le done no le meteva piè in ostarìa, tanto manco par farse n’onbra, tut’al più podeva capitare ch’in rivesse una quando qualchidun el fusse andà a ciamarla parchè la menasse a casa el so omo inbriago spolpo. Ela a sti curiusi gnanca le badava e ansi la se inpissava na sigareta, cussì el merlo el restava più sbasì de prima.
Tute ste robe avrìa fato scàndalo inte ’nantro posto, ma da la “Gigia” tuti i la conosseva. Solo a vardarla se capiva che la gheva chelcossa de particolare: za dal viso la pareva più mas-cio che fémena, sarìa bastà quatro pili de barba e no ghe sarìa stà dubio su che sponda che la stesse. Du brassi e un par de ganbe muscolosi e le fatesse − spale larghe e culo streto − conpletava la prima inpression. Parfin la vose la gheva el ruspio da mas-cio.
Quando ch’è rivà i badoliani e i partigiani, in meso a luri gh’jera parece fémene vestì da omo. Tanto è bastà parchè la Diana la butesse via le còtole e la s’inpiresse un par de braghe da omo co la scusa che le jera più còmode, più pràtiche co tute le so scarsele e le ’ndaseva benissimo par saltar su la bicicleta. Le brute lengue spetegolava che la ghesse la morosa, ma jera tute ciàcole sensa costruto e sensa fondamento, parchè no gh’jera ànema viva ch’ésse visto chelcossa che podesse far pensar ste robe. Fora de sti particolari, altro no gh’jera de difarente da tute st’altre done, parchè la jera brava int’i lavuri de casa come so mama e so sorela: tacà al mastelo o al canale a resentare no la jera da manco de nessun’altra, ansi forse più svelta. Po’ è passà i ani, el canapificio i l’à serà, la so fameja l’à canbià casa e anca mi ò bandonà el Borgo. E cussì de la Diana n’ò più savesto ninte.

[torna sopra]