Zente de Padova

Lucrezia Dondi dall’Orologio Obizzi

Lucrezia

Palazzo Obizzi a Padova.

Lucrezia, nata a Padova el 21 setenbre 1612 (opure nel 1610?, no se sa) da na fameja padovana nobile e siorota, famosa parché el capostipite gheva costruìo el famoso orolojo che xe in piassa de i Signori qua a Padova.
Lucrezia, pa la so inclinassion, la gavarìa preferìo na vita de contenplassion, de intime preghiere. La so fameja invesse la ga destinà al matrimonio e i la ga fata sposare el 21 zenaro 1629 a Pio Enea II Obizzi, nobile rico e influente mercenario de la Serenissima. Pio Enea I Obizzi el xe stà quelo che ga inventà el canon che ga ciapà el so nome, l’obice.
Tute dó le fameje, i Dondi dall’Orologio e i Obizzi, le gera fra le più in vista de la sità e el matrimonio xe stà celebrà a la cesa de San Nicolò. Noantri padovani savemo quanto centrale sia sta cesa e quanto ancora de più la fusse de centro a chei tenpi.
Da sto matrimonio, che nel tenpo el xe stà sereno e felisse, xe nati tre fiòi: Ippolita, Roberto e Ferdinando. La vita de sta fameja, come go dito, la se svolgeva serena e i fiòi Ippolita, Roberto e Ferdinando cresseva.
Roberto se gheva fato un amico, Attilio Pavanello, che ga scominsià a frequentare el Palasso Obizzi e a deventare intimo co tuta la fameja. Nessun però se gheva inacorto che sto zóvane se gheva inamorà de Lucrezia, anca se la gera de 17 ani più vecia de lu.
E qua scominsia el mistero. Ne la note tra el 15 e el 16 novenbre 1654 Lucrezia Dondi dall’Orologio Obizzi ne la càmara da leto del palasso Obizzi, qua a Padova, la xe stà copà. L’assassin ga aprofità del fato che tuta la fameja gera fora del palasso, fata ecession del pìcolo Ferdinando che dormiva nel leto co so mare. Sto disgrassià xe entrà in càmara, el ga ciapà in brasso el pìcolo indormensà e lo ga messo su na càmara vissin, po’ evidentemente el ga sercà de violentare la Lucrezia che se ga difeso e alora lu la ga copà co un colpo de rasojo su la gola. I servitori, svejài da i rumori e da i sighi de la pòvara dona, i la ga trovà morta in càmara in un lago de sangue.
El fato ga ’vudo na gran risonansa in sità. A i funerài ga partecipà la nobiltà e anca la zente comune co granda comossion. La pòvara vìtima la xe stà sepeìa ne la Basilica del Santo e un busto comemorativo xe stà esposto in Salon.
Tuti domandava giustissia. Xe stà subito sospetài e messi in preson de i òmini che i gaveva vudo de i duri contrasti co Pio Enea II, el marìo. Però xe subito saltà fora che no i ghe entrava par gninte e liberài.
Pio Enea II, el marìo, visto che le indagini scominsiava a ’ndare pa le longhe, el ga vossùo védarghe ciaro. El se ga intajà del toso che frequentava casa, Attilio Pavanello, e el se ga inacorto che el gaveva un profondo tajo ne la man destra. Un controlo fato ne la casa de sto tozo ga fato trovare el fodero del rasojo conpatìbile co la lama rota trovà sul logo del delito. Le vossi che circolava contava del fato che l’Attilio ghesse perso la testa par Lucrezia e el pòvaro marìo se ga convinto de aver trovà l’assassin. De conseguensa lo ga denuncià a l’Auditore de Ferrara e el zóvane Attilio Pavanello xe stà arestà. Però no ’l ga mai confessà. Attilio Pavanello el gera nobile, non de altissimo rango, e el gaveva bone amicissie sia a Padova che a Ferrara e anca a Venezia. Dopo cinque mesi de preson, no saltando fora gninte, el xe stà liberà.
Pio Enea II el ga considerà sta liberassion come na ofesa personale e el ga sospetà che drio la man assassina ghe fusse quela de i venessiani.
Attilio Pavanello ’pena liberà el ga pensà de tajare la corda e el xe espatrià par paura de la vendeta de la fameja Obizzi. Par trèdese ani el xe stà lontan dal teritorio de la Repùblica, fin al 1667, quando, pensando che i se ghesse desmentegà de lu, el xe tornà a Padova. Ma el gaveva fato i conti sensa l’osto: la matina del 12 febraro 1667 su la strada che conduzeva a Ponte Corvo, qua a Padova, el xe sta afrontà da Ferdinando, proprio el fioleto che dormiva co so mama la note del delito. Co i so òmini el ga trucidà quelo che i considerava l’assassin de Lucrezia a colpi de archibugio e de cortèi par infine tajarghe la testa co la so spada.
Ferdinando xe scanpà a Ferrara e so pare xe stà messo in preson parché i pensava che el fusse stà cònplice de so fiolo. Ma dopo pochi giorni de galera el xe stà liberà e tuta la pratica xe stà insabià.
Attilio Pavanello xe stà sepolto ne la tonba de fameja nel chiostro de la Basilica del Santo e par secoli ga regnà el più assoluto silensio su de lu e su tuta la tragedia.
Come xe intuìbile su sta storia xe fiorìa la legenda. Nel Castelo del Catajo, a l’epoca de proprietà de i Obizzi, xe conservà la “pietra insanguinata”, insanguanà del sangue de Lucrezia e el so fantasma che gira par el castelo. Ancora uncò se se domanda se xe stà veramente el zóvane Attilio Pavanello a copare la nostra protagonista, se la so man sia stà armà dai venessiani e po’ parché, e cossa sconde ne la realtà storica sto atroce delito.

[torna sopra]