Da la Marca

Ricordo de Simon Benetton

L’artista Simon Benetton ne la so oficina.

Antologica del maestro Simon Benetton a Valdobbiadene (TV) nel 2011.

Simon Benetton, Oasi del Tempo, al Museo della Bonifica de Tajo de Po (RO).

Ne ga lassà l’autuno de l’ano passà a 83 ani el scultor Simon Benetton, uno de i artisti trevisani pi conossùi sia in Italia che a l’èstaro dove che tanti monumenti i ricorda la so maestria. El jera fiol de arte, avendo inparà la lavorassion del fero da so pare, Toni Benetton, fondator de l’Accademia del Ferro Battuto de Mojan, che atirava alievi da tuto el mondo, che ga firmà co lu la grandiosa “Porta della Pace” che a San Lazzaro acolie chi che riva a Treviso dal Terajo.
Omo de fede profonda, par tuta la vita el ga lotà col diabete che no ghe ga inpedìo de afermarse ne la so arte, difìçile e fadigosa, in dialogo quotidian col fero e col fogo. Un critico ga scrito che Simon el disegnava col fogo e difati le so sculture in fero le nasseva da la gran forgia del so laboratorio situà in perifarìa de Treviso dove che el ricevéa tanti amiçi e l’ospitava i rondò poetici del circolo de poesia dialetal “El Sil” de Treviso. Parché oltre che artista el jera anca un finissimo poeta, sia in lingua che in dialeto.
La so opera plastica, specialmente a l’inissio, la se ispirava a la tradission figurativa classica del primo Noveçento, ma in seguito, destacàndose da l’esenpio del pare, la se ga manifestà senpre de pi soto el segno de l’astrassion che imàgina forme ben definìe che se inserisse armoniosamente nel spassio secondo i so ritmi e sensa forsature. Ogni so opera la partiva da’na unica lastra de fero o aciaio che vegnéa tajà par far risaltar segmenti de materia acostài secondo un ritmo interior.
La carateristica pi significativa de l’artista a partir da i ani ’60 la xe quela de sessionar la massa del fero in modo da farla traversar da la luce, trovando un percorso de ricerca original che lo ga inposto ne l’anbiente artistico internassional tanto che le so sculture, soratuto quele a gran dimension progetàe par spassi naturali verti le fa parte de l’aredo urban de piasse, giardini e parchi in tante çità.
El lavoro de Benetton el risente de influssi de vari artisti, come l’italian Umberto Mastroianni e i russi Naum Gabo e Anton Pevsner che i privilegiava la possibilità de crear forme aeree che podesse vìvar anca se solevàe nel spassio. Benetton ga esposto i so lavori ne le principali galerìe europee e americane, otegnendo ovunque premi e riconossimenti. Pochi mesi prima de la so sconparsa el ga avùo la sodisfassion de védar che la so çità lo ga onorà co un dùplice tributo: ’na rassegna de le so sculture alestìa ne i vari posti de Treviso e ’na mostra personal al Museo de Santa Caterina co oltre çento fra disegni preparatori e bosseti de le so òpere conservàe no solo in Italia, ma anca a l’èstaro, par esenpio in Giapone, a Sidney, a Toronto e a Bonn.
Ultimamente se ga formà un comitato de çitadini che ga presentà ’na petission a le autorità parché la botega del maestro no la vaga dispersa co tuti i so strumenti, ma la vègna trasformada in un atelier-museo par onorar la memoria de un vero artista che ga tegnùo alta la bandiera de l’arte italiana nel mondo.

[torna sopra]