Da la Bassa Veronese

Mato come marzo…

Sto mese, pare za de sentire la primavera drio l’usso.

… e ’pena tira vento, tute le robe zo par tera!

Dopo l’inverno fredo ’pena passà, sto mese, solo a nominarlo, el me fa canbiare de umore in mèjo e pare za de sentire la primavera drio l’usso. Però mi penso che no ghe sia on mese pi dispetoso e monelo de lu, spesso in conbuta co’ piova e vento. Insoma, marzo l’è on po’ mato, come dise on vecio proverbio: marzo pazzerello, un giorno fa brutto e un giorno fa bello. Se l’è vera! Sì, anca se ghè tanti segni che ne mostra che l’inverno l’è invià fenire, parché ghè fiori e buti novi sora le piante, le giornade jè caldine, i osèi i scuminzia a farse el nial e la natura in gènare la se sveja tuta. Ma l’è mèjo no fidarse parché marzo on giorno el pianze e on giorno el ride, el fa ancora sbalzi inprovisi de fredo che a olte i porta in giro tanto dano, anca se i buti ’pena sbocè i zerca de resìstare.
Comunque, la pi parte de noantri scominziemo a butar da na parte el paletò e al dopodisnar par strada se pol star ben anca solo co na blusa de lana.
In sti giorni quelo che a olte disturba de pi l’è el vento. Fiol d’un can, se l’è dispetoso! Se ghè le robe stese par sugarse al sole el supia forte da farle cascare; el roersa onbrele, el tira sù le còtole a le done… E intanto al 21 de marzo vien ’vanti primavera e co’ ela torna le róndene. Insoma, sto mese l’è tuto na contradizion, l’è tuto e el contrario de tuto. Eco cossa ne dise i proverbi:
- Marzo pazzarelo, varda el sol, ma ciàpete su l’onbrelo.
- Se marzo l’è piovoso, el brolo l’è generoso.
- Marzo senza acoa, aprile senza erba.
- De marzo, ogni mato va descalzo.
- Par san Benedeto, la róndena soto al teto.
- Par l’Anunziata (25 marzo) se sómena la patata.
A sto punto, come no parlar de i poeti che s’à ispirà a sto mese: Angiolo Silvio Novaro el s’à domandà: “Che dice la pioggerellina di marzo?...”, e Antonio Beltramelli el ne conta che: “Le viole in mezzo al prato / escono fuori con l’ombrello. / Oh, bel marzo! Oh marzicello!” E Renzo Pezzani: “Anche l’acqua che era ghiaccio / s’incammina dentro al fosso / con un po’ di cielo indosso.” E po’ Arpalice Cuman Pertile la ghe cria a marzo, disendo: “O Marzo, non fare il cattivo / non rompere i rami fioriti / i rami dei peri e dei meli / che poi daran frutti squisiti!” Anca Diego Valeri: “Un sentore di viole... / Ecco marzo pazzerello / piedi nudi e giubberello, / ricci al vento e viso al sole.”
Ma anca i nostri poeti in dialeto no jè de manco. Ghè Berto Barbarani che ’l scrive: “Madama Primavera, / seria fra le pi bele, / predica grassia ai fiori / e stissa su le stele / ma nel cor de la sera / la istiga i primi ardori… / col magico: Fu, fu!... / che l’è la zoventù / calda de umori…” El poeta nostran Bruno Castelletti el scrive: “Sta per entrar marso / su la tera / per maridar / na bela putela.” E Giampaolo Feriani: “I bate marso… / e su le strade smemorià / sbrissia e se desfa / gemi de luna a fiochi.” Saremo la lista co Angelo Savaris: “A son Marzo, l'ombrelaro, / ma ’sta piova inacidà / mena tuti dal stagnaro / e mi son disocupà.”
Eco parcossa el me umore el canbia in mèjo al solo nominar sto mese de marzo: mi me sento za siora co la me fantasia!

[torna sopra]