|
Da San Giorgio in Bosco (PD)
No se scherzha cu i esami
 | | Al marti ghe ze rivà casa na teefonada da l'ospedàe, che ’e convocava tute de urgensa.
|
Sti ani el tesserin sanitario, dopo ’na obligatoria serie de esami clinici, come che jera justo che fusse, el ghe vegnéa concesso a chi che jera san e a posto pa lavorare inte i negozhi, indove che ’a merce senzha scartozhi jera a contato co ’e man de chi che servìa.
El 18 agosto, de luni, tuto el personàe de ’a becar’a C. che po' jera ’a mare Ema e so fiòe Rosa e Maria, ghea apuntamento co l'ospedàe pa sotoporse a i sòiti esami del sangoe, de orine e feci. Jera romai ’a seconda quindesina de agosto che par lore voéa dire sarare ’a botega par ferie e finalmente ’vere on poca de libertà. Ma prima de ’ndare in vacanzha, secondo l'ordine categorico de ’a Ema, bisognava snetare e disinfetare el negozhio dal sofito al paimento. El 17 agosto, de doménega, ’a Rosa e ’a Maria jera drio lavare e sgrassare goaìvo tuto el locàe, romai stomegàe da 'a spuzha de 'a varichina e moje pa l'afa de agosto. A na zherta ora ze rivà ’a Ema, so mama, da Abano, indove che ’a jera ’ndà farse na setimana de fanghi. Dopo ’e sòite ciàcoe, éa che no ’a moeava mai l'osso de ’a botega pa nessun motivo, ’a ga tacà:
<<Ve ricordé, vero, che doman matina ghemo da ’ndare in ospedàe pa l'anàisi del sangoe e bisogna portarse drio ’e scatoete de l'orina e de ’e feci?>>
’A Maria che ’a jera ’a pi dòvane, ma za ’lora ’a pi speditiva e, al momento, anca stufa morta, ’a ghe ga risposto brutàe:
<<Sta’ tenta, mama, coà semo drio darghe drento ’fà sassine parché pa stasera vurìssimo finire e dopo ’ndare al mare! Ti che no te ghè gnente da fare e no te si maeà, có te te ghè canbià, te ciapi ’e scatoete de ste “feci”, te distribuissi ’a to merce so tute tre e dopo te ghe miti ’e so tichete cu i nomi nostri!>>
<<Ma no se podarìa mia!>>
<<Ma chi se ne frega! Coà semo tute sane e po' chea roba là no 'a ga mia el nùmaro so ’l tearo!>>
’A Ema cussì ’a ga fato e ’l dì dopo ’e ga porta tuta sta mercanzhìa in bussoeotèi a i laboratori de anàisi de l’Usl. Al marti ghe ze rivà casa na teefonada da l'ospedàe, che ’e convocava tute de urgensa, tra ’e paroeasse de ’e tose che jera drio pareciarse pa partire. ’Pena rivàe, mare e fiòe, ’e ze stà introdote so on studio, indove che davanti ’e se ga catà na comission medica che ’a se ga ben vardà dal darghe ’a man. Senzha tante storie, el dotor G. ga tacà in talian:
<<Care signore, ve ghemo convocà de urgenzha parché da ’e anàisi de ’e feci, voaltre risulté tute maeàe de salmonèa e ris-cé, co ’l vostro laoro, de mandare al cesso stàbie medo paese pa na setimana, se ’a va ben! A proposito, come vàea co ’a dirèa?>>
’E fémene de ’a becarìa ’e se ga vardà maravejàe e ’a Maria:
<<Ma noaltre no ghemo nessuna dirèa!>> ’Lora anca i doturi se ga vardà, sorpresi, e el dotor G.:
<<Come nessuna dirèa! Ma questo l'è on caso novo! On caso limite!>> e vardando chealtri doturi: <<Coà, coleghi, ghe ze da fare on studio serio parché l'è on argomento novo e da congressi! Mi propongo che ’e vègna ricoveràe suìto pa studiare ben i sviupi de sta strana salmonèa!>>
A chel punto ’a Maria, vedendo el buron che se verdìa pa 'a fameja e depi pa 'a so atività che ris-ciava sputanamento e disfata, ’a ga inbrancà sù tuto el so corajo e ’a ga tacà:
<<El me scusa, dotore...>> e ’a ghe ga contà come che ’e robe jera ’ndàe davero. No 'a ghea gnancora finìo che el dotor G. l'è saltà in pie, co 'e canàgoe sgionfe e rosso come on pito, prima el ga verto e sarà ’a boca on par de volte pa tirare el fren a man de ’e paroeasse e dopo el ga tacà sbajare:
<<Ma co chi credìo de ’vere a che fare, voaltre, che vegnì coà torne pa 'l... in giro! Caso mai che no ’o saìssi, noaltri coà semo speciaizài e professionisti seri...>> e ’vanti pa un bel tòco, co tute ’e razon del mondo. Coando che ’a rabia ga scominzhià caearghe, ’ncora ’a Maria, co maniera pa no reinpizharghe i retrorazhi, ’a ga rajonà che, se so mare se ghea inpestà inte l'hotel de Abano, jera là che i ghea da indagare e che lore dó sorèe jera disposte a sotoporse a ogni tipo de esame e ’a botega a ogni tipo de sopraluogo, pagando coéo che ghe jera da pagare.
Messa cussì, i doturi i se ga fato conprensivi parché intanto nu i voéa rovinare na atività comerciàe e anca parché i ghea istesso pa 'e man on hotel da morsegare insieme co naltra Uls. ’A so fortuna ze stà che i esami a persone e botega e ’e cure par so mama, ’e ze capitàe inte ’l periodo de ferie, siché, co ’a becarìa sarà, nissun ga saesto gnente; senò seto che ricami de pàcioe che ghe garìa fato sora ’a jente malfidente! Gnanca da pensarghe! Ma ’l spaurazho de coéo che podéa capitare, se ga cussì ben ignarà inte 'e so teste che dopo l'igene de 'a botega da on vanto ’a ze deventà na ossession par tute e, có cadìa ’e ricorenti anàisi, nessuna ga pi fato confusion co ’l “prodoto interno lordo” de chealtre.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che belo el silenzio…
El silenzio el xe la roba pi straordinaria che esista in natura: no ’l xe solo mancanza de rumore, el ga na infinità de significati, el pole èssare studià e interpretà filosoficamente o artisticamente, ma senpre el vole dire: tasere, non parlare, pensare, concentrarse, scoltarse. Solo cussì nasse idée nove, decision inportanti e risposte sicure.
de Mario Sileno Klein
Da Vicenza
Na bala passà in pressia
de Ines Scarparolo
Da Verona
Erasmo da Narni: el Gattamelata
de Mirco Castellani
|
