Zente de Padova

Giovanni Battista Bassani

Giovanni Battista Bassani

’Ndare in serca de personagi nati a Padova che gabia lassà na inpronta, na tracia de lori ne la storia de la zente no xe tanto fàssile. Però, quando te scominsi, la xe come la storia de le sareze, na storia tira l’altra.
Scartabeando, frugando salta fora nomi, personagi che no te te gavaressi gnanca imaginà. Xe el nostro caso.
Giovanni Battista Bassani xe nato a Padova intorno al 1650. Manca però la certessa parché finora se gheva parlà de 1657 o de 1658, ma novi elementi farìa pensare proprio al 1650. El xe stà musicista e precisamente organista. Gnanca su la so formassion musicale ghe xe informassion certe. Pararìa che el gavesse ’vudo come maestri Daniele Castrovillari o anca adiritura Giacomo Carissimi. Studi più recenti i ga stabiìo de le afinità fra lu e l’anbiente venessian, particolarmente co ’l bergamasco Giovanni Legrenzi.
A la fine del 1671 o al prinsipio del 1672 Giovanni Battista Bassani el deventa organista de l’Accademia della Morte a Ferrara.
La storia xe ’ndà cussì: nel 1670 Giovanni Battista Mazzaferrata dal posto de organista el xe stà nominà “maestro di cappella” a l’Accademia della Morte. Al so posto de organista xe stà dà l’incarico al bolognese padre Francesco Passarini che nel 1671 ga abandonà el so posto. Cussì el Bassani lo ga ’vudo lu. Tegnimo presente che sto posto de organista xe stà ocupà da celebri musicisti come Luzzasco Luzzaschi, Ercole Pasquini e Girolamo Frescobaldi. Par chi che màstega storia de la musica capisse el livello artistico del nostro padovan de pura ecelensa.
Oltre che organista Giovanni Battista Bassani xe stà conpositore. Durante el so soggiorno a Ferrara se ga notissia de tre “oratori”, finora del tuto ignorài, che el ga scrito apositamente per l’Accademia della Morte e eseguìi proprio ne la cesa de la Confraternita.
I titoli de ste conposission xe L’Esaltazione di S. Croce, L’Epulone e La tromba della Divina Misericordia. De sto ultimo oratorio, la partitura la xe conservà ne la Biblioteca Estense de Modena.
Tra la fine del 1674 e el scominsio del 1675 el ga molà l’incarico a Ferrara e dal 3 giugno 1677 figura la so agregassion a l’Accademia Filarmonica de Bologna. Però in fra mezo a ste date se considera che el fusse za in raporti con l’anbiente bolognese, tanto xe vero che anca co Arcangelo Corelli ghe xe na rispondensa stilistica. Senpre nel 1677 se stanpa na so òpara da la quale risulta el so trasferimento a Finale Emilia, vissin Modena, col titolo de “maestro di musica e organista”, senpre a la “Confraternita della Morte”.
L’ano dopo, el 1678, se rapresenta a Mirandola ne la cesa de S. Maria Maddalena el so oratorio L’amore ingeniero. Se pensa che el sia passà in sta ocasion al servissio del duca de Mirandola, Alessandro II della Mirandolina, parché nel frontespissio de l’òpara, publicà nel 1680, se dize “maestro di cappella del duca della Mirandola”. No se sa quanto el sia stà a Mirandola, l’ultima notissia su de lu xe l’esecussion de l’oratorio Il mistico roveto in quela cesa nel 1681.
Nel zenaro del 1682 el gera a Bologna come menbro de l’Accademia Filarmonica fin al 1683. In sto ano el xe deventà “maestro di cappella” a l’Accademia della Morte a Ferrara e senpre in sta sità nel 1686 el xe deventà “maestro di cappella” a la Catedrale.
Giovanni Battista Bassani fin al 1712 el se ga stabilìo a Ferrara e in sto ano el se ga trasferìo a Bergamo dove che el 9 majo el xe stà nominà “maestro di cappella” ne la cesa de S. Maria Maggiore e insegnante ne la Pia Scola Musicale de la Congregassion de Carità.
Par brevità go trascurà de nominare le conposission fate da sto nostro consitadin parché gavarìa tirà massa par le longhe. Fare un giudissio su la so produssion musicale no so’ ne la condission de farlo, però da quanto che i dize pararìa che fusse el caso de considerarlo fra i principali musicisti de la fine del 1600.
A Bergamo el xe restà fin a la so morte, el 10 otobre 1716.
Oltre che organista, pararìa che el fusse stà anca un valente violinista. De certo el xe stà un musicista de valore, riconossùo nel so tenpo a Ferrara, Bologna, Bergamo. Padova nò: la lo ga desmentegà. Na strassa de stradeta, un viale, na piasseta, gninte. Se te ghe domandi a i Padovani chi che xe Giovanni Battista Bassani, i te varda e i te risponde: “Bohh”.

[torna sopra]