Editoriale

Ciao, cari Wanda e Milosc…
Oncora na volta ne toca saludare persone care che xe ’ndà ’vanti e che ghemo fato tanta strada insieme par difèndare e salvare el nostro dialeto che ’l rapresenta el passato e, in parte, anca el nostro presente

Wanda Girardi Castellani

Xe giusto dirghe “ciao” e non “adìo” a la nostra WANDA GIRARDI CASTELLANI che, a le cinque del dopodisnà de l’8 setenbre, a 86 ani, la ga finìo de patire, ciamà de urgenza in celo par la festa de conpleano de la Madona.
La saludemo co ’l “ciao” parché la Wanda la continua a vìvare nel pensiero e nel ricordo de tuti quei che la ga incontrà, conossùa, aprezà e ghe ga volesto ben: tra i tanti, la Fameja de Quatro Ciàcoe. Quanta strada ghemo fato insieme da chel lontano 1985, quante parole, quanti articoli, quanta poesia, quanti incontri par studiare, conóssare, organizare e tegnere in vita sto nostro mensile che ga visto passare so le so pagine “fiumi di parole” e soratuto l’amore e la testimonianza che el dialeto xe oncora on pan bon par tuti i denti.
La enorme produzion leteraria de la cara Wanda, poetessa, giornalista publicista, Cavaliere Ufficiale a l’Ordine de la Repubblica per meriti culturali, xe la conferma del so grande inpegno per la cultura e tuto el resto: fameja, fiòi, amici, associazion… Dal 1949 la faseva parte del Cenacolo “Berto Barbarani”, a fianco de Beltramini, Zago, Etrari, Bertolaso Nalin, Bepi Sartori, Piero Sartori, passando da segretaria a l’atuale carica de Presidente Onoraria. Par no sò quanti ani la ga tegnù la carica de Araldo della Castellania di Suavia; la ga publicà na quindesina de libri de poesia; la ga tegnù raporti con i pi grandi poeti dialetali italiani (da Loi a Buttitta); significativo l’inserimento nel libro del prof. Semi de l’Università de Padova, Il dialetto Veneto dall’VIII al XX Secolo, e nel libro Letteratura veronese del ’900 con Bepi Sartori, Giampaolo Feriani e Dino Coltro.
No parlemo de i Premi leterari organizà (Castion, Albaredo, Pescantina, Castelrotto), de i programi radio e television portà in porto, del so entusiasmo organizativo par el mondo de la lirica, parfin ideando el Premio Villa Vento e presentando a l’Arena tenori famosi, come Domingo, Carreras, Di Stefano, Corelli… Insoma, na vera “operatrice culturale”.
I so ultimi ani, tormentà da la malatìa, no i la ga mai piegà: el so caràtere forte e l’amore par… l’amore e par la vita i la ga sostegnù e conpagnà fin a la fine. Propio come sucede a chi sa de èssare “’na nina de tera con drento semensa de cel”.
A i fiòi Mirco con Annalisa, Flavio con Maria Rosa, e a tuti i familiari on vivo sentimento de cordolio da parte de tuta la Redazion.

Milosc Voutcinitch

E cossa dire de la partenza del nostro MILOSC VOUTCINITCH, uno de i fondatori de la nostra rivista, che dal 1983 no ’l se ga mai destacà on àtimo, seguendo el percorso de la Cooperativa EDITORIALE PADOVA che la tegneva in vita.
Anca Milosc, ne la note tra sabo 16 e doménega 17 setenbre, a quasi 82 ani… senza ari né stari, el xe ’ndà ’vanti. Noantri ghemo perso on amico. El teatro veneto in dialeto ga perso na colona, on interprete, uno de i pi grandi interpreti del Ruzante e, par tanti ani, “Governatore” de la legendaria “Partita a scacchi” de Marostica (VI), dove el ga ricevù la citadinanza onoraria, anca par el fato che el xe riussìo a portare la “Partita” in Brasile.
Ne i ani Sessanta el jera deventà on amico inseparabile de Lele Fanti, co ’l quale el faseva parte de la Compagnia d’Arte “Il Ruzante” de Padova, fondà e direta da Gigi Giaretta. Na Compagnia veramente specializà ne l’interpretare le opere del Beolco in dialeto pavan antico e non in quelo italianizà.
Insieme al fradelo Mirko, a Vittorio Busan, a Gherardo Bianchi el ga fondà la “Colonna Portante”, na associazion culturale padovana frequentà da artisti come Gioacchino Bragato, Andrea Calore, Lorenzo Rosa, Giovanni Ongaro, Quinto Rolma e altri.
No podemo desmentare anca el so inpegno per l’insegnamento de l’arte teatrale; ricordemo che proprio a Pernumia el tegnéa corsi de recitazion e interpretazion. Dal 1998 el gera giornalista publicista e el so contributo scritorio in dialeto so le pagine de Quatro Ciàcoe el faséa s-cianzo parché lu el parlava “amorevolmente” de i altri, magari persone umili, e senpre “visti da vissin”. Questo xe el Milosc che no desmentegaremo.
A la mojere Anita, a le fiole Elena, Chiara, Luisa, Vera e a tuti i familiari on pensiero de vicinanza e de cordolio da parte de tuta la Redazion.

[torna sopra]