Da Lendinara (RO)

A go on sosia!

Na dona, al distributore, la me fa: “Ciò, barbon, te ricòrdito quanti ani ca gavemo lavorà insieme?”

Mi son Renato Scarpi. Se qualchedun ghe pare de somejarme, che ’l se faza ’vanti!

De sicuro a go on sosia, uno ca me someja pure assè. Me par de capire, che sta parsona ora la xe par ben, ora la xe zaltrona, e questo vien fora a seconda de la zente ca incontro.
La me voja granda xe ormai quela de vardare intel muso sto elemento e capire, cossa che ’l fa, dove che ’l sta, come mai el porta in giro la me facia. Anca lu penso dirà l’istesso de mi, considerà el fato che qualcun, scanbiàndolo co mi, lo garà fermà. Parchè ve digo sta roba? Ma parchè me so’ incorto za da tenpo, che parecia zente me saluda e mi, no la cognosso par gnente e, raquanti, i ga giurà ca gero quelo che i diseva lori: roba da restare stracanpìi.
Me so’ domandà più volte sa so’ deventà on poco insemenìo, o forse, che zerta zente me saluda solo parchè me ga visto sonare inte le piaze o inte le sale da balo. Ma, sta ultima considerazion la trovo poco credibile, parchè in giro no fazo gnente de inportante. Pa’ èssare più ciaro, ve fazo on pochi de esenpi. On dì, pedalando longo le strade del me paese, incontro on ciclista ca me saluda alegramente. Mi lo vardo ben senza saludarlo subito e lu el dise:
“Cossa gheto ca no te me saludi?” Mi ghe rispondo che no lo cognosso, e lu:
“Ma me toto in giro?” Insoma sta conversazion la va delongo on tocheto finchè, el va via par la so strada poco contento de quel ca go contà. Nantro dì torno a casa, a ghe digo a me mujere:
“Ma lo seto che oncuò girando par la piaza go trovà on mucio de parsone che me ga saludà e, o no le go cognossù, o se anca zerte le go viste parece volte, tra noantri no se ghemo mai scanbià el saludo. Comunque mi, par rispeto, li go saludà tuti.”
“Ben te ghe fato” me ga risposto ela.
Nantro dì ancora, de matina al marcà del sabo, gero drio passare el ponte de piaza, quando uno me ferma e, alzando la vose, el sómena inte l’aria raquante parolaze, come ca gavesse fato chissà quale robaza. Co tuta la zente ca recezava intornovìa, go provà on senso de vargogna èssare lì a ciaparme ste ofese. El sior, el catava fora ca gero andà inte la so canpagna e in conpagnìa de altra zente gavevo disturbà lu e altri cazzadori, i so can, e fato scanpare osèi, quaje e altra roba da i canpi. Mi go risposto che ’l gaveva le travérgole, parchè no so’ mai andà a disturbare nessun cazzadore in vita mia e che el la piantasse de insultare. Ma lu no voleva savérgane che mi podeva avere on sosia e che, partanto, el sbassasse la vose rajonando co educazion. Anca lu come el ciclista, el se ga ’lontanà da mi poco convinto.
L’ultimo episodio xe quelo ca me xe capità, poco tenpo fà, ca gero fermo a on distributore de benzina e spetavo che i me inpinisse el serbatoio. Co mi, sentà in màchina, ghe gera anca me mujere. In chel momento rivava ’na otomòbile e la dona che la guidava, tirando zo el finestrin, la m’à saludà, diséndome:
“Loris, speta ca te saluda prima ca te vaghi via.” Mi de boto, la me xe parsa ’na mestra che tanti ani indrìo go cognossù ma, quando la s’à vizinà a la me màchina, go visto ca sbaliavo. Cussì tiravo zo el finestrin par dimandarghe cossa che la voleva da mi e, me sentivo dire:
“Vecio barbon, che piazere vèdarte, te me pari Babo Nadale!” E intanto che la me carezava la barba, vardàndola ben da vizin, capivo de averla vista ma no me ricordavo dove. Ela, continuando a carezarme la barba, la diseva:
“Te ricòrdito quanti ani ca gavemo lavorà insieme?” In chel momento la go riconossù dabon, parchè la gavevo vista a l’Ospedale de Tresenta che la faseva l’infermiera. Dovì savere che mi co ela no go mai lavorà, parchè le me fadighe le go fate a Rovigo e a Lendinara e, partanto me go messo el cuore in pase. Ciò, lì vizin, gavevo me mujere che la podeva fraintèndare sto incontro. Insoma la conversazion la finiva squasi subito parchè, intel fratenpo rivava quela del distributore e, la siora la tornava a la so otomòbile.
Par finire, ve digo, sperè de avere on sosia par ben, caso contrario le sarà rogne.

[torna sopra]