Da Piove de Saco (PD)

Monsignor Claudio Bellinati

Monsignor Claudio Bellinati, “Padovano Eccellente”, tra Alessandra Breda Mineo e el dr. Walter Ragno.

A 96 ani, dopo ’na vita dedicà a arte e cultura, oltre che a eà so mission sacerdotàe, xe mancà Monsignor Claudio Bellinati, una de ’e personaità più de spico a Pàdoa e no soeo. Don Claudio xe nato a Ponteongo, da ’na fameja operaia emigrà in te ’sto paese da Occhiobello in te ’l 1914, dopo eà costrussion in paese del Zucherificio. Presto el xe entrà in seminario e, ’na volta ricevù i ordini, el xe partìo pa eà Francia par fare el prete operaio. El ga dovùo, però, ritornare presto par rason de saeute e i eò ga ciamà in Curia a Pàdoa.
Qua i ga fato presto a incòrzarse de ’e so capacità e de eà so cultura. El xe stà nominà Curatore de eà Biblioteca Diocesana e po’ Canonico de eà Catedrae. Come curatore de ’na biblioteca cussì rica e inportante el ga ’vu eà possibiità de coltivare eà so passion culturàe, spessie par eà storia de eà arte e de eà leteratura. I so studi eò ga portà a ’na eonga serie de publicassion e de coeaborassion co altri studiosi: basta pensare a òpare come coéa so ’l Domo e so ’l Batistero, so tante cese e oratori, so Giotto, Mantegna, Giusto de’ Menabuoi, so eà Basìica del Santo e po’ so Dante, Petrarca… Studi e publicassion fondamentài par conóssare Pàdoa e ’e so eceénse.
Monsignor Bellinati jera ’na persona autorevoe par eà so cultura, par eà so coerensa, par el so equiìbrio. Ma ghe xe on lato del so caràtare che no tuti forse conosse: come tute ’e persone veramente inteigenti, monsignor Bellinati jera on omo conpletamente disponìbie, disposto a diaeogare co tuti, senpre pronto a ’scoltare. Mi me ricordo de éo coando − e jero soeo un bocia − ne i ani Çincoanta, el tornava a casa da i sói, prima dal seminario e po’ da eà Curia, e el se intrategneva co tuti, anca co mi, anca se ghevo sédeze ani manco de éo. Senpre afàbie, de ’na disponibiità genuìna. I nostri raporti, anca se ormai se vedévimo poco a causa de i so inpegni e de i mii, xe senpre stà i stessi. E mi ghe so’ grato par i insegnamenti e i esenpi che el me ga dà e che me ga jutà a créssare.

[torna sopra]