Da la Bassa Padovana

A Marzo ogni mato naséa descalzo

A ghe jera el contato fisico con la tera dopo el giazzo invernale, e cossì i capìa se la jera laoràbile con la zapa o co ’l versoro.

No ghe jera marzo senza aquila: cussì a se coréa fin sera…

I grandi i riprendéa el laoro de i canpi e noantri toseti i zughi in corte, tuti descalzi. Jèrino sul serio mati?
Osservavo, ne le matine de i primi de marzo, me papà vestirse con ’na camisa a coadri e el gilè, lassando tacà al ciodo, soto scala, la jacheta. No ’l metéa gnancora el fazoleto al colo, piegà a triangolo, acessorio estivo sugasuóre e anti abronzatura del colo par non parer strani có se naséa a messa in camisa bianca.
Le matine le jera tiepide, sute e lìnpide e le invitava a stare fora. Prima de partire con la me bicicletina par la scola a lo vedéa ciapare la strada de i canpi, con so cusin braciante Ivano, con la baila in spala par ’nare a sistemare le cavezagne, rassando la gramegna ’torno a i traversi de fromento, coasi par incornisarli.
A osservavo anca che me papà e Ivano, alontanàndose da la corte, non i gavéa pi a i piè le pesanti sgiàvare invernali, ma i caminava legeri so la sgoazza “... a piè descalzi!”
Jera rivà la primavera che no la spetava mia el 21 del mese! Pedalando verso la scola a pensavo che, tornando indrìo, dopo aver rancurà de le viole in te i fossi par me mama, a me sarìa anca mi deliberà da le scarpe par zugare in corte piè descalzo!
Par el contadin, ’nare in canpagna piè descalzo non jera ’na pazzia come che dise el proverbio, ma oltre al benessere de i piè, a ghe jera el contato fisico con la tera dopo el giazzo invernale, e cossì i capìa se la jera laoràbile con la zapa o co ’l versoro, se la jera seca o umida, freda o za tiepida par somenare el fromenton.
Ma par noantri toseti marzo el portava ’na gran voia de zugare e de farse l’aquila o volanda, dato che a marzo a se movéa el venteselo giusto par farla zolare.
Par fare l’aquila bisognava rispetare precise regole geometriche, doparare materiali legeri e de nessun costo. La carta velina la jera l’unico costo e bisognava nare fin a Montagnana, in cartoleria a torla. I te la consegnava rodolà e, tornando in bicicleta a casa, a staséa atento a non farghe le pieghe parché senò l’aquila non la gavarìa zolà ben! Par la cola a smissiava farina bianca e acoa e la scaldava so la stua parché la tachesse de pi. Le canevere le catava in te ’l fosso, par la cóa a faséa anèi de carta de giornale e par el spago a ghe lo domandava a me nono che el me daséa el ròdolo de gaveta vanzà par ligare i saladi du mesi prima e che el tegnéa par l’inverno dopo. Non ghe jera ano senza mas-cio.
Visti i me incerti tentativi par fare l’aquila, a casa mia i me ga mandà a inparare da uno che el staséa in fondo a i canpi, in te on posto indove ca non jero mai stà. On dopodisnà a go tolto sù tuto el materiale e son nà da sto toso che me ga insegnà i segreti par fare l’aquila, e con coesta a son tornà a casa contento e a piè descalzi, faséndola zolare drìo la cavezagna. La xe nà cossì alta che coasi non la se vedéa pi, ma me nono el gavéa in mente la gaveta che dovéa darghe indrìo.
’Sto zugo el fa sognare i toseti de tuto el mondo che i zerca de scoprire i segreti del zolo da i tironi che l’aquila la dà al spago fin che te lo tieni in man. ’Desso, da pluri-nono a osservo i neódi zugare, on poco anojà, in casa col bruto tenpo, ma ne le bele giornate de marzo i se cava le scarpe e i ghe core drio, in giardin, a on vecio balon de plastica. E i pare mati!
Anca a lori se àplica el proverbio?

[torna sopra]