|
Editoriale
Nadale insieme e… piassè boni
Eco l’ocasion pi adata par pensare, volere e donare la pace, l’armonia, l’amore, la solidarietà… Ma no la xe na roba da fare da soli: ocore volerlo e farlo insieme. Senò, che Nadale xelo se ’l vien pensà, visto e vissùo come quelo de on polastro sarà da elo solo in caponara?
Non solamente a Nadale, ma ogni giorno se dovarìa sentire el bisogno de darse na calmada, corendo piassè pian, metendo da parte l’istinto de la bestia che se portemo drento l’ànemo. Xe proprio ora de pensarghe.
Eco ’lora che Nadale deventa l’ocasion bona de no far finta de gnente e de scoltare l’invito che ne riva da tanti pùlpiti par realizare insieme el sogno de na vèra pace, de na fradelanza senza se e senza ma: in fameja, ne la socetà, nel laoro, ne la polìtica, nel Governo de i nostri Comuni, Province, Region, Nazion, Europa e Mondo intiero.
In sto modo vien butà via chel paraoci che ne fa védare solo te na direzion, magari quela del nostro personale tornaconto. Partemo dal pìcolo par rivare al grande: da la nostra pìcola fameja a quela piassè granda de la parochia (comunità), del paese, sità, region, popolo, popoli diversi…
Propio st’ano 2018 semo drio sarare la comemorazion de i 100 anni dalla Grande Guerra, na ricorenza vissùa da tuti i italiani ch’i ga ricordà quanto bruta, terìbile, nefanda, inùtile xe la guera dove, a la fine, no ghe xe mai chi ga vinto e chi ga perso, parché tuti xe vìtime. Nessuna guera ga risolto i problemi, anzi la ga portà e la ga zontà problemi a problemi, odio a odio, vendeta a vendeta, distruzion a distruzion, miseria a miseria, morte a morte.
Ne vien anca da pensare a quanti dialeti italiani e stranieri se ga unìo al dialeto veneto par rivare a chela data del 3 Novembre 1918, che xe finìa la guera.
Dopo 100 ani tuti pensa che sta guera chì se podéa far de manco de farla e che i “nuovi confini” da soli no i ga portà la pace.
A la pace ga contribuìo on novo modo de pensare, manco streto, piassè largo, piassè verto a le culture, a le esperienze, a la vita de i altri popoli, spece a quei che gira intorno al nostro “Stivale”.
Qualchedun ga dito che la pace xe come la speranza: no la xe solo on dono de Dio, prima de tuto la xe on “dono” che podemo farse tra de noantri.
Difati, no podemo desmentegarse che i 74 ani de pace da la fine de la Seconda Guera Mondiale, xe el “dono” de l’integrazion europea, anca se vedemo co i nostri oci che i xe oncora tanti i problemi da risòlvare da l’Unione Europea.
La xe tanta la strada che i popoli de la nostra Europa ga fato insieme in tuti sti ani. Se da i altri “mondi” i ris-cia la vita pur de rivare tel nostro, na rason la ghe sarà: ghemo la libertà (anca massa!), la sicurezza (mia massa!), on zerto benèssare (insoma!?), storia, cultura, istruzion, sienza, governo (quelo che se meritemo!)… No se pole avere de pi!
Se metemo a confronto le nostre storie e i nostri Nadài con le storie e i Nadài de i nostri genitori e noni, se rendemo conto de la difarenza e che dovemo èssare senpre piassè uniti e colaborare par el ben e par i valori de tuti.
Eco alora che el Nadale xe l’ocasion par ricordare, riflètare e decìdare che l’èssare piassè boni no ’l riguarda solo l’intimo personale, ma ’l ga come obietivo on orizonte sociale che va al de là del “mio de mi”.
Se rendemo conto che, in parte, semo nel canpo de i sogni, ma propio la nàssita de sto Banbin Gesù, ricordà co ’l Nadale, ne dise quelo che domila ani fà ga fato sta Creatura, non par ela sola, ma pa ’l ben de tuti. Alora… Bon Nadale insieme e… piassè boni!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Nadale insieme e… piassè boni
Eco l’ocasion pi adata par pensare, volere e donare la pace, l’armonia, l’amore, la solidarietà… Ma no la xe na roba da fare da soli: ocore volerlo e farlo insieme. Senò, che Nadale xelo se ’l vien pensà, visto e vissùo come quelo de on polastro sarà da elo solo in caponara?
de Mario Sileno Klein
Da la Bassa Padovana
Spetando Nadale, tra fòle, storie e stracaganasse
Prima de l’arivo de la corente elètrica anca ne le canpagne, bastava uno bon de contar storie par tegnere sveja ’na contrà, ma senpre con ’na morale. ’Desso l’eletricità e la television ne tiene sveji, ma con la morale del Grande Fratello Vip!
de Roberto Soliman
|
