Da San Stefano de Zimela (VR)

Mas-cio e dintorni

Porziloto bifamiliare con àlbio personale.

Porziloto classe media.

Porziloto de periferia, però co' vizin un bel figaro.

Destinazion finale: la càmara de i saladi e zìzzoli da magnare co tante fete de polenta.

Ciò, Toni, méteghe ’na bona parola che ’sto ano i se disméntega de mi!

A farme vegner voja de scrìvere ’sto articolo chì a xe stà la letura de le Cronache dialettali de febraro de ’sto ano. El prof. Michele Cortelazzo el scrive che el truogolo del mas-cio el jera de legno e i lo ciamava el veturo. Da noantri el truogolo indóe che i ghe butava el so magnare a el se ciama albio e a l’è de piera. Eco ’lora che meto zo, cussita come che a le me vien in mente, un poche de divagazion sul tema del re de la corte, che tuti a ghe voléino tanto ben da vivo, ma piassè ancora da morto! ’Na ’olta i antichi romani i considerava el mas-cio come sìnbolo de fertilità e de prolificità. Co ’l passare del tenpo in te ’l cristianesimo a l’è deventà sìnbolo de le passion carnali e de la lussuria e parfin fato somejare al diàolo. In te la civiltà contadina invezze el mas-cio el jera sìnbolo de vita e de richezza e, dopo che el vegnéa mazzà, no se ghe butava ’ja gnente de gnente.
A te si un salado; a te si nato in te la càmara de i saladi a se ghe dise a ci che no xe mia massa furbo, e invezze par dire che se xe ’ndà a domandarghe spiegazion a calchedun e no se ga capìo gnente, a se dise che se xe ’ndà drento saladi e se xe vignù fóra codeghini. A l’è stà un codeghin; el ga fato la figura del codeghin se dise de chi ga fato ’na figurazza da ciodi o anca a ci che l’è stà inbrojà.
El ga ’na bela códega, a l’è incodegà o incodezzà, a l’è un codegon se ghe dise a ci che l’è un pochetin invizià o che sta senpre tacà a le còtole de so mama.
El ga ’na casa cussita onta che te pare de nare drento a un porziloto el jera el comento a ci che gavéa poca voja de spazzare e tegnere in ordine le robe. De solito se se imàgina che el mas-cio el vivesse in te ’l sporco e in te ’l luame de i so escrementi.
Mi no go mai capìo se questo a l’era parché a ghe piaséa a lu ’sta situazion o se jera parché i contadini i gavéa poca voja de netarghe el staloto…
Co’ riferimento a la sporcizia a xe vignù fora frasi come: el ga fato ’na bela mas-ciara, no sta’ fare porcade, el magna come un mas-cio, a l’è onto come un mas-cio, el ga fato un bel mas-ciamento, a l’è un mas-cio, a l’è un buelo…
’Na ’olta ricavare del lardo belo alto jera un vanto perché el jera el conziero base, sia cruo, sia siolto in te ’na pegnata e dopo messo in te i buèi e tacà ’ja su i travi e tegnù da conto parché el dovéa durare el pi longo possìbile.
Quando che se faséa ’sta operazion sul fondo de la pegnata restava i zìzzoli, che i jera tochetini de carne bei crocanti che se ghe magnava insieme tante fete de polenta.
’Desso tuti i ga paura de i grassi animài, mentre che ’na ’olta a piaséa i animài grassi…
El fato a l’è che ’na ’olta i tajava le fete de salado o de codeghin bele fine, mentre che ’desso le se taja cussita grosse che le sta in piè da lore sole!
Co’ i scarti de grasso fati cusinare insieme co’ la lissiva a se ricavava ’na polentina che, tajà a quadrati, la deventava saon par lavare le robe e anca i òmeni.
Par tradizion el mas-cio el se pesava e el se valutava dopo èssare stà mazzà e ben curà e cussita a jera vignù fora el proverbio: comerciante e porco el se pesa dopo morto. No la jera mia ’na ofesa par i comercianti, ma la sènplice costatazion che in te ’l comercio a jera fàzzili i alti e i bassi e ’lora i conti a se podéa tirarli solo a la fine de l’atività.

[torna sopra]