Zente de Padova

Lorenzo Pignoria

Lorenzo Pignoria, te na incision de Abraham Blooteling.

Naltro padovan degno de èssare ricordà xe Lorenzo Pignoria, nato el 12 otobre 1571. So pare Antonio el gera fatore de le suore de S. Lorenzo. La so fameja la gera modesta ma no puareta. El ga studià ne le scole gesuitiche e el ga frequentà i corsi de filosofia ne l’Università de Padova. El xe stà alievo del gesuita Benedetto Benedetti, de Giovanni Batttista Scorza, de Gerolamo Dandini, de Francesco Piccolomini e de Giacomo Zabarella. Su consilio de so pare el ga seguìo i corsi de giurisprudenza ma no ’l se ga mai laureà. Forte de na preparassion letararia e filosofica el xe entrà nel grupo de quei che i se ritrovava co Gian Vincenzo Pinelli e a la so celebre biblioteca, tra le più famose d’Europa. Par farve capire de che grupo se parla, a cito qualche personagio: Paolo Gualdo, Martino Sandelli, Giovan Francesco Mussato, Nicolas-Claude Fabri de Peiresc, Galileo Galilei, Torquato Tasso, Giusto Lipsio.
Nel 1602 el xe stà consacrà prete dal Vescovo de Padova, Marco Corner, che se lo ga tegnudo come segretario e quando nel 1605 el se ga trasferìo a Roma el se lo ga portà drio. Ne i dó ani che el xe stà a Roma, Lorenzo Pignoria el xe entrà in contato co Angelo Rocca che el xe stà el fondatore de la Biblioteca Angelica e che el gaveva vissudo e studià a Padova. Co altra zente inportante el xe stà in òtimi raporti: el futuro cardinale Scipione Cobelluzzi al quale el ga dedicà dó so lavori, co ’l cardinale Cesare Baronio al quale el ga dedicà un so lavoro, e co Francesco Barberini e co Cassiano Dal Pozzo.
Anca se el ga ’vudo ocasion de védare le antichità de la sità, la so permanensa a Roma no lo ga de serto sodisfà. El 17 dissenbre 1605, in na létara indirissà a Paolo Gualdo cussì el se esprimeva: “Roma non m’ha a vedere mai più: che per uomini benestanti è Patria miracolosa, per noi altri cialtroni… è da fuggirsi.”
Dopo sta esperiensa romana el xe tornà a Padova e el 5 febraro 1609 el xe stà nominà capelan a S. Lorenzo, nel convento de le suore de S. Stefano, dove che el xe stà anca confessore. In sto periodo i ghe gheva proposto, tramite l’amico Galileo Galilei, la càtedra de “umane lettere” a Pisa, che el ga rifiutà par poderse dedicare a i so studi. Qua a Padova, anca se esterno a l’anbiente universitario, el ga frequentà i so magiori esponenti, come Fortunio Liceti. A sto punto ve domandarè parcossa che sto omo merita de èssare ricordà. Cossa galo fato de speciale?
Lorenzo Pignoria el xe stà un eminente studioso de storia e un inportante antiquario. El ga scrito tanti libri de storia nel 1605, nel 1613, nel 1656. Una de le so òpare xe stà modelo par Ludovico Antonio Muratori quando che el ga scrito “Dei servi e liberti antichi”. Par la so sità el ga scrito “L’Antenore” e “Le origini di Padova”. Sta ultima òpara ga mosso tante discussion a l’epoca parché el ga messo in dubio tradission de “patavinitas” ormai consideràe come verità storica. Tra le altre robe, el se ga rifiutà de considerare come padovan el giureconsulto Giunio Paolo che ghe ga fato nàssare tante critiche da i contenporanei.
Lorenzo Pignoria el xe conossùo anca co i nomi “Laurentius Pignorius” e “Menippo Filosofo”. Nel 1630 el ga otegnudo un canonicato a Treviso. E là el xe morto el 13 giugno 1631 durante na epidemia de peste. Qua a Padova l’aministrassion comunale se ga ricordà de lu, dedicàndoghe na strada, ma penso che pochi padovani sapia cossa che el ga fato.

[torna sopra]