Da Lugo de Vicensa

Tiro a la sàgoma

Tanto par confermare che Claudio Cappozzo l'è na sàgoma, ve conto come che ’l se ga presentà a na serata in veste de intratenitore. Xe sucesso l'istà de qualche ano fà su a Tresché Conca, so l'Altopiano de Asiago, dove che ’l pàroco, za capelan al nostro paese, par tegnere alegri i vilegianti el ga vìo l'idea de invitarlo so on teatro tenda piassà... in piassa. Ghe so’ stà de conpagnìa e, par no rivar tardi, semo rivà anca massa presto. No savendo cossa fare, altro de mèjo no gavemo catà che sentarse dentro a sto teatro. El Claudio se senta vissin a na veciota e, de paca come che l'usa fare, el taca discorso, domandàndoghe da che paese che la vien, se la xe contenta de l'albergo, se ’l posto l'è de so gusto e se dal caso la sa cossa che ghe sia in programa par la serata. Tuto in gran confidensa tanto che ormai el la ciamava sàntola. E la sàntola, a l'ultima domanda ghe risponde:
"Ah, fiolo, qua stasera dovarìa vegnere uno che fa rìdare."
"Ah ben – ghe fa Claudio, – spero propio che ’l fassa rìdare, ghin avemo propio bisogno!"

Xe stà lì che, a tendon ormai pien, el prete lo ga ciamà so ’l palco e la sàntola xe restà de sasso e co i oci for da la testa. E ancor de pi dopo parché co le so storie el ghe ga dà modo de piànzare dal rìdare.
Torno a Claudio, el deontologo, che ’l resta ligà co la cavessa a la medissina naturale e popolare. Le essense de le erbe e i onti de i animài i resta la base de i so trataminti... teatrali. Ma, come che ghe càpita a puchi, la sorte ghe ga dà par sora anca na serie de misteriosi poteri, tipo quei de i stregoni, de i radomanti, de quei che lèse nel pensiero...
La xe 'ndà a sto modo. On vecioto da le parte de Ciùpese che gaveva sto dono, dopo ’verghe osservà le man, el ga capìo che ’l nostro podeva avere sti poteri. Bastava che in primavera, te na note de luna, el Claudio ciapasse na ciupinara mas-cio, ciamémolo ciupinaro, e ’l lo strossasse co tuta la forsa de le man. Sì, va ben. Ma come capire se la gera na ciupinara o ’n ciupinaro? Fàssile, bastava vardarghe i oci: se te i vedevi russi e for da la testa parché ’l gera in amora, altro no ’l podeva èssare che on ciupinaro. Trovà el ciupinaro e la luna giusta, lotando co tute le fòrse parché el ciupinaro no ’l voléa savèrghene de morire, Claudio l'è vegnesto a cao del rito e ’l ga fato suo tuto el furore riprodutivo de la bestia e te le man ghe xe restà na forsa tremenda e miracolosa.
Tante volte in teatro Claudio el se fa conpagnare dal so assistente, Siro, on amico che tegnéa na ostarìa vissin a casa sua. (Buto chi on traparentesi par dire che par mesi Claudio ga fato girare in paese el mantra "Siro sara" tanto par... far musica!). Tornemo so ’l palco del teatro dove che Siro el se presenta e Claudio, a prova de i so poteri, el ghe posa le man so on brasso malà de on malano... inventà. Come che ’l lo toca, Siro ’l ritira de scato el brasso, come brusà dal fogo, ma guarìo!
Sti trataminti, che par dimostrare che l'è studià Claudio no ’l manca de definire "topici", i va fati co le giuste dosi de intensità. Na sera gero sentà pacìfico in seconda fila a scoltarlo, quando che a sorpresa el me fa dal palco, riferéndose a me zio che ’l gera on so passiente:

"Ciò, Bepe, come stalo to zio?" Altro no podevo dirghe se non che ’l gera morto. "Cura massa forte!" el so comento!
Passiensa par me zio che l'era vecio, ma Siro che l'è ancora zóvane el lo ga za fato morire no sò quante volte co l'inposission massa forte de le man.
Se fusse par quelo, anca so zia Màbile, che la gode ancora òtima salute, el la ga fata morire a ripetission: quando che i lo invita a movimentare qualche serata, se la conpagnìa no xe de so gusto, el se la cava disendo con parole sbonbe de tristessa che, morta so pora zia Màbile, come podarìsselo métarse a far rìdare la gente e fare festa?
I lo invita a tegner alegri i comensali a i matrimoni, a i batesi, a le comunion, a le lauree, a le premiassion de ogni sorte. Ormai ghe manca solo i funerài.
Tornando a bonba, sa gavissi bisogno de consulense o de visite pa i vostri malani, so preciso ordine del dotore ve fasso aviso che, con tute le facende che ’l ga par man, el riceve solo a le quatro de matina prima de scomissiare a mónzare.

[torna sopra]