Da Ponzano Veneto (TV)

El soranome speciava la so storia

De sti driti no senpre se saveva el nome scrito su le carte de batiso.

I artisti del mondo de i driti (giostrari), proprio come capita par el cinema o teatro, dove quasi tuti i ga nomi che no ga gnente a che far co quelo che i ghe ga dà, drìo le carte có i xe nati, i xe conossù, non co el nome de batiso, ma grassie a ’na nomenansa che mete in risalto quelo che i carateriza nel corpo o par el lavoro che i fa o i ga fato. Eco ’lora ’na sfìlsa de àneme o mèjo articoli che me xe restà inpressi: el Finco, cussì ciamà par via de ’na so ciassosa magagna su un ocio, stramenciada lavorando. Sta de fato che el gaveva un ocio senpre serà, par conpensa e par védarghe mèjo, st’altro se gaveva slargà fora de i modi. ’Sto omo gera uno de i pochi che de soranomi el ghe ne gaveva più de uno, el gera ciamà anca Marioneta o Mastroiani. Marioneta parché, metendo sù le so Gabie (tipo de giostra) el se ga fato tanto mal, cussì el gaveva la gran crose de ’ver ’dosso ’na salda inbragadura che ghe tegneva sù la schena, un bel strussio che lo faseva móvar come un Puricinel, a la Totò, par intèndarse; invense i lo ciamava Mastroiani parché el gaveva fato da conparsa nel film intitolà Signore e Signori de Pietro Germi che gera stà girà quasi del tuto a Treviso. Ghe sarìa ancora tanto da dir su ’sto personajo, ma vojo dar logo anca a altri e recordarli.
El mondo de i Driti, come in quelo de i Sinti, ga tra le so creature de le tose che xe tòchi de àneme, gran belesse che cava el fìà, sul gènare de quele del nostro meridion, ciamàe belesse mediteranee; mi vojo mensonar le dó più moscardine, bele che imagava: le sorele Sgarbeose, che gaveva da ’ver el mal de l’aqua, parché sensa falo, có par caso le catàvimo a la matina, le faseva védar de quele sgarbele ’torno i oci, che gera parfin deventàe dure fintanto che le dormiva de note. Xe vero che in carovana gera scomodo lavarse, ma lore no diseva de sì gnanca a ’na lavada a seco o a ’na passada co ’na strassa suta par farse presentabili a i tanti bari mucini (toseti) del luna Park che ghe perdeva drìo le bave.
Coalchedun se ricordarà del Bestiaro, creatura stranba che co el so serajo menava de girandolon par i vari paesi e contrà, quele bestie foreste, ’desso se ghe ciama esotiche, che ben pochi gaveva podùo mirar dal vivo in qualche zoo, tanto manco ne le so tere de provenienza.
Po’ ghe gera BamBam, soranome che da solo dovarìa far capir de bòta calda, in cossa el gaveva la manina santa. El gaveva l’abitudine de ’ndar in giro co ’na caramascari (pistola) in scarsela, pronta par ogni evenienza, parché no se sa mai. Ghe gera el Canguro, un tosaton che có el caminava el gaveva l’anda de quela sinpàtica bestia orionda de l’Australia, pitosto che de un cristian come che se comanda. Coreva vose che el praticasse quele done che el cabaretista Angelo Cecchelin deTrieste ciamava perdute, anca se tuti saveva dove trovarle.
No se pol desmentegar el Bacalà, famoso pajasso che in zoventù gera un pilon del Circo Togni, che gaveva ’na bravura straordinaria nel sonar quel mantesin o mèjo fisarmonica co pochi tasti che somejava a un bisson che se slongava a rota de colo. Bacalà gera el pare de Solidea, un bisù de balerina, che da tosa, có la belessa ghe lo permeteva, la balava in un baracon de entrata, cussì se ciamava un teatrin anbulante, che no gera altro che ’na carovana adatada, ato a invojar i fermi.
’Sta dona gera la muger de Cimino, un fermo, za pugile che se ga ris-cià de métar pìe nel mondo de i driti, dove, se ocoreva, el deventava Valcaregi, el comissario tecnico de la squadra de calcio del nostro luna Park, anca se de ’sto sport no el capiva quasi gnente; ma el se tegneva che mai in bon a sentirse ciamar cussì.
Ghe gera el Rosso, cussì dito par via de la tinta de i so cavéi, marìo de una de le dó Sgarbeose. ’Sta copia de sposeti ga ’vùo ’na disgrassia granda: gera de inverno có la so carovaneta postada de fassa a la cesa ga ciapà fogo par via de ’na stueta elètrica che funsionava mal. Nel fogo xe morto el so primo tato, e solo par miracolo xe stà salvà la Sgarbeosa; i driti co corajo i la ga tirada fora prima che el fogo divorasse anca ela.
No me desmentegarò mai del Mato, omo balengo che gaveva stanpà nel muso un ghigno perpetuo, difìssile stabilir se el fusse un drito o un sinto, parché el diseva de èssar questo o quelo a seconda del so tornaconto, el se moveva co ’na vecia coriera adatada dove viveva tuta la so gran fameja.
Sul Mato e su altri strafanti, come la Cocarda, el Parucon, el Batioci, el dotor Sfesa, Mestieri sbaliài , i Buranèi, Gigi el Boaro, l’Indian, Oci da bo, Siesento... se podarìa scrìvar a no fenir.
Li mensonarò tuti prima o dopo, parchè i merita; ’ste àneme co la so sìnpatia e s-ceteza, el so estro e bonarietà i ga donà tanta alegressa nel nostro mondo.

[torna sopra]