Da la Bassa Padovana

On tratore salva pecatori: el Landini
El Landini a testa calda el ga rivoluzionà l’agricoltura dopo i poco afidàbili tratori a petrolio, che i morìa de colpo in mezo al canpo, tiràndose drio tante maledission!

I ricordi de infanzia i me riporta a coando in corte mia a ghe jera el primo tratore, conprà par far ponsare le vache, stufe de tirare el versoro, e cossì le faséa anca pi late. El jera on FIAT anteguera a petrolio, con la messa in moto a maneton, difìzile da aviare e che ’l faséa ostiare i òmani de tute le corte che lo gavéa in dotazion.
Dopo averli tirà fora, urtàndoli a man, da le casote indove che dormìa sti tratori e aver girà el rubineto del dopio serbatoio “a benzina”, i òmani de la corte i tentava de métarli in moto con sforzi sovraumani e pericolosi contracolpi del maneton, scanbiàndose el posto par ponsarse.
In corte mia, coando che i riussìa a métarlo in moto, me zio Livio, l’esperto de motori, el spetava che el se scaldesse ben par girare el rubineto “a petrolio” e, se el restava in moto, el partìa co on gran fumo dal tubo de scapamento del FIAT a petrolio, verso i canpi, tirando el versoro guidà da Ciro, el boaro.
A volte, fin che i jera in mezo al canpo drio arare, el motore a petrolio del tratore el se fermava de colpo, lassando me zio Livio e Ciro ne la delusion pi grande. Cossì, me papà, che no ’l gavéa passion de motori, el tacava du pari de vache e el naséa, prima a tirare a casa el tratore e dopo a sostituirlo tirando el versoro con le so afidàbili bestie par finire el laoro.
Non ve digo coanti inproperi e maledission che se ga tirà drio i tratori a petrolio in coéi tenpi, anca da pecato mortale!
I motori a petrolio i brusava on conbustibile che costava poco, ma che ’l sporcava le candele, in pi la sintila la vegnéa dal magnete, che ogni tanto no ’l funzionava ben e in pi a la sera bisognava destacarlo dal tratore e portarlo in casa par paura de i ladri de magneti! Altri tenpi!
Stufi de tute ste soferenze, verso la metà de i ani ’50, grazie a ’na bona anata agraria, a casa mia i ga deciso de sostituire el vecio FIAT a petrolio co on Landini a testa calda, e cossì ga fato tanti agricoltori, anca par far contento el prete del paese che el dovéa assòlvare le rasìe che i tratori a petrolio i provocava.
Penso che la fortuna del Landini sia dipesa anca da coesto: a jera fadiga metarli in moto, ma dopo non i se fermava pi, cossì anca i preti de canpagna i se sentìa solevà in te ’l riferire al vescovo, durante le visite pastorali, che i biastemiadori in parochia i jera calà de nùmaro!

[torna sopra]