“La Sguaratà” - Ciàcole adriote

Case ca ride

Coloremo le nostre case, coloremo le nostre cità, coloremo la nostra vita. In mezo al grigio, ca ne segna drento co le so tristesse, serchemo de rimediare, per quelo ca podemo, almanco co i aspeti esterni e co ’l colore chl’è un segno de grassia e alegrìa ca se riflete in te l’ànema e in tel pensiero.
Pare proprio, almanco da qualche tenpo, che sto indirisso se fassa strada in diversi paesi e cità, dove ufici e burocrassìa ga molà un poco e dove, in tel rispeto de stili e de storia, se lassa colorare le case co diferenti gusti ca se richiama a i bei colori de Murano e Burano, isole venessiane, e ca dà un risalto de sinpatìa a i veci quartieri.
Na volta inperava grigio, zalo scuro e bianco co colori tabaconi. Ancuò se vede colori vivi ca fa vivere na casa vissin a st’altra. Sia zalo, rosso, verde, celeste e, chi selie el bianco, mete porte e balconi de color vivo e de contrasto ca fa ridere ancora i veci quartieri, i paeseti, i borghi e le cità.
Sti colori te mete gioia drento, te ralegra, te fa cantare el cuore e te ripaga, in parte, del fumo de le nebie e de la calìsine che, anca colpa nostra, còpa zo e fiaca le nostre giornate, spece ne i mesi invernali. No male, dunque, per chi sistema e ristrutura case, e, malasorte, per chi ufici comunali che ancora se tien tacà a vece legi, disposission e istanse che, pur non ligà a rispeti de stile e storia, proibisse i colori vivi e alegri.
Ridémoghe gusto de vivere e sinpatìa a i nostri paesi e cità, naturalmente, dove se pole ancora fare qualche selta de sto tipo, come dito, nel rispeto del tenpo e de le tradission. E, dove no se pole, piantemo fiori ca conosse la sapiensa del colore, del profumo e… tanto altro.

[torna sopra]