Zente de Padova

Sibilla de’ Cetto

Afreschi (D. Varotari, 1579) ne la “Sala della Carità”, con i ritrati de Baldo e Sibilia; nel sfondo, l'Ospedale, la cesa e el Convento de San Francesco.

Interno de la cesa de San Francesco Grande.

La via che el Comune de Padova ga dedicà a Sibilla de’ Cetto.

Ve sarì inacorti che mi vado in serca de personagi nati qua a Padova, che par qualche razon vale la pena de ricordarse e che xe ’ndà in desméntega.
Sta volta ve conto de sta siora che xe nata qua su sti sassi circa nel 1350. So pare se ciamava Gualperto, el gera un rico mercante, proprietario teriero e el prestava schei; ’desso el se gavarìa ciamà usuraio, forse anca alora. So mare se ciamava Benedetta di Primo Campagnola.
Sibilla la se ga maridà co Bonaccorso Naseri de Montagnana che el gera giureconsulto e consiliere de Francesco I da Carrara. Da Bonaccorso la ga ’vudo de i fioli che xe morti da picinini e che i xe sepolti ne la cesa de San Lorenzo. El marìo, nel 1388, el xe passà da la parte de Gian Galeazzo Visconti, quando che el ga ocupà la nostra sità e quando i Carraresi i xe tornà a Padova el xe stà giustissià. Infati Francesco Novello da Carrara, inbestiaìo par el tradimento, el ga ordinà che ’l fusse inpicà in Piassa dei Signori.
In seconde nosse Sibilla la ga sposà Baldo Bonafari che, originario da Piombino, sitadina toscana, gera rivà a
Padova par seguire i studi de dirito a l’Università e deventà, dopo, consiliere de Francesco Novello da Carrara.
La nostra eroina, ’jutà da Baldo Bonafari, la xe riussìa a otegnere in sede legale i so diriti su l’eredità paterna e dote malgrado le rivendicassion de Giovanni Naseri, pare del marìo de­funto. Metendo insieme i so schei e quei del so novo marìo, i sposi ga fato sù un bon patrimonio e sicome i gera tanto vissini al messagio francescano e in particolare a i frati minori de l’Osser­vansa, i ga deciso de realizare la co­strussion de “l’Ospedale di San France­sco Grande” che gavarìa dovudo assi­stare i puareti e i malài. Sta so decision gera, par chei tenpi, grandiosa e, ote­nuda l’autorizassion da le autorità reli­giose, el 25 otobre 1414 i ga scominsià i lavori. Sto ospedale vegneva sù in con­trada Santa Margherita, in na zona conpresa fra via San Francesco e via dei Vignali (l’atuale via Galilei). De fianco vegnarà sù la cesa e el convento de San Francesco.
Nel 1418 Baldo Bonafari xe morto e solo par l’abilità e la determinassion de Sibilla i lavori ga possudo continuare. I dó sposi nel fratenpo i se gera spostài de casa dal palasso de piassa del Domo, apunto vissin a la costrussion. Sibilla de’ Cetto poco prima de morire ga fato testamento, scrito el 21 noven­bre 1421, lassando so eredi universali i “pauperes Christi”, i puareti de Cristo. La ga lassà scrito anca che dopo la so morte, la gestione de l’ospedale ga­varìa dovudo èssare fata da el “Collegio dei Giuristi di Padova” e la xe morta se­renamente el 12 dissenbre 1421. Se­condo la so volontà, Baldo e Sibilla i xe stà sepelìi in abito francescano ne la cesa de San Francesco. Uncò la so lastra tonbale se trova presso la cesa de Santa Maria della Neve, dentro al con­plesso de l’Ospedale Civile.
Sibilla de’ Cetto e Baldo Bonafari sarìa passà siti siti ne i sècoi e de lori no se gavarìa parlà se no fusse par el fato che i ga ’vudo l’idea de vèrzare un ospedale par ricoverare la zente pua­reta e anca malà. Sto ospedale xe de­ventà ne i secoli XV-XVI la più inpor­tante istitussion assistensiale de la sità. El xe deventà un ospedale nel senso moderno, metendo in pratica i pro­gressi de la medissina realizà in con­tenporanea da l’Università de Padova.
Nel 1543 Giovanni Battista Da Monte ga scominsià la prima clinica medica par studenti de medissina che funsionarà fin al 1798 cioè fin quando xe sta fato el novo ospedale. L’Ospedale de San Francesco el ga finìo la so funsion quando, a la fine del 1700, xe sorto apunto l’Ospedale Giustinianeo, quelo che ciamemo uncò “l’ospedale vecio”. La Amministrassion comunale no se ga desmentegà de sta siora che tanto ga fato pa la so sità e la ghe ga dedicà na strada.

[torna sopra]